Fapea Kronikols 36 - Buka Blahi Ka Cheke Holo

King Jehoahas gna Juda

¹ Naiknodi Juda igre ne vahini Jehoahas thugna King Josia mala kegra king Jerusalem tughuni mae kmagna.

² Ka narane te king Jehoahas Juda igre, mana neke varadaki thilo finoghagna. Eghuteuna mana king Jerusalem thilo nhigra kolho.

³ King Neko gna Ijep ne lokini mae Jehoahas ne koko laoni mana ka suga sosolo mala theome ke king mana Juda. Aonu King Neko huhurudi naiknodi Juda mala folini mana thilo thogha fati gobi kilo silva nei tolufulu fati kilo gol.

⁴ Aonu mana hata Eliakim thabusigna Jehoahas igne mala king tughuni Juda. Eghuteuna mae Neko neke tughu nanghagna mae Eliakim na neke kiloni mana, mae Jehoakim. Nu mana hatani mae Jehoahas ne tei Ijep.

King Jehoakim gna Juda

⁵ Ka narane te king Jehoakim Juda na, mana neke varadaki glima finogha gna. Eghuteuna mana king Jerusalem nabotho kaisei finogha. King igne mana edi glepo te diꞌa ka tathagna Lord nogna God.

⁶ King Nebukadnesa gna Babilonia haghe ne magra ka Jehoakim Jerusalem. Mana lokini Jehoakim ne haru ka chen hata ne tei ka namono biꞌo Babilonia.

⁷ Mana hata ne tei glepo blahi gna nogna Sugablahi Lord na hata nei Babilonia ne lilisei ka nogna suga biꞌo na.

⁸ Keha glepo teke edi King Jehoakim baludi puhigna mana te thono diꞌa fara re, nei nakhibo teke edi mana re eghu mare neke rioriso soru ka Buka Eidi Glepo teke Edi King Di Israel nei Juda. Eghuteuna thugna mana mae Jehoakin tughuni mana neke kegra king.

King Jehoakin gna Juda

⁹ Ka narane te kegra king mae Jehoakin Juda igre, mana nabotho nhana finogha gna. Eghuteuna mana king Jerusalem thilo nhigra nabotho narane kolho. King igne edi kmana glepo te diꞌa ka tathagna Lord.

¹⁰ Kate gnafadi narane te reka nei nakhete teu igre, King Nebukadnesa chekedi nogna soldia re mala hata soruni Jehoakin Babilonia. Eghuteuna mare jaola hata tei glepo blahi gna nogna Sugablahi Lord. Aonu mana hata Sedekaea nebugna King Jehoakin mala king gna Juda Jerusalem.

¹¹ Ka narane te king Sedekaea Juda igre, mana varadaki kaisei finogha gna. Eghuteuna mana king Jerusalem nabotho kaisei finogha.

¹² King igne edi glepo te diꞌa ka tathagna Lord, eghuteuna mana theome nhaꞌa faparini thegna ka profet Jeremaea, mae ihei te toutonuni chekegna Lord ka mana igne.

King Nebukadnesa ne mei roꞌeni Jerusalem

¹³ King Nebukadnesa huhuruni Sedekaea mala eni kaisei nhaꞌa cheke mala leghuni mana. Nhaꞌa cheke igne, phiamare eni ka nanghagna God. Nu ke leghu na, mae Sedekaea ne huhughuni nhaꞌa cheke igne, eghuteuna mana ne theome leghuni King Nebukadnesa. Mana patugama fara ne theome magnahaghei te tughu nagnafa mala teke pulo mei ka Lord.

¹⁴ Eghuteuna keha glepo na, nodi lida mae pris nei naiknore teu igre, mare leghuni puhidi naiknodi keha kantri te au faligohodi mare ra. Mare tarai nei tufru soru eghu ka keha god delei, eghuteuna mare goigoni nogna Sugablahi Lord teke fablahi mana Jerusalem.

¹⁵ Lord nodi God kuꞌedi mare tifa ra, mana neke kuru meidi koba nogna profet ra mala cheke ka mare, naugna mana kokhoni nognadi mare, eghuteuna mana jaola ghatho tahuni nogna Sugablahi na.

¹⁶ Nu mare maꞌedi mae profet igre, eghuteuna mare theome magnahaghedi nodi cheke mare re. Mare cheke faparidi mae profet igre, eghuteuna Lord ne ghilei diꞌatagna fara ka mare mala theo kaisei nabrou te mala fakarhidi mare na.

¹⁷ Aonu Lord ne kuru teini king gna Babilonia mala tei magra Jerusalem. Eghuteuna ka narane tuana, king igne ne kokhoni nognadi mare, aonu maedi Babilonia igre ne aknu falehe mae majaghanidi Juda re. Neuba ne mae majaghani, ba gaꞌase majaghani, mae nalhaꞌu, ba mae khuekuꞌe, God ne snakredi naikno igre mala kafe lehe ka khamegna Nebukadnesa. Neubane poru kehare ka Sugablahi na, mare tei ngala ka Sugablahi igne ne falehedi mare.

¹⁸ Eghuteuna King Nebukadnesa ne hata fajifla gobigna lepo teke au teku ka nogna Sugablahi God na baludi gobigna lepo teke au ka chogho te mala lilisei glepo ka Sugablahi na. Eghuteuna mana jaola hata nogna famane glepo King Sedekaea, nei nodi nogna mae biꞌo mana re. Mana hata ne tei gobigna lepo igre Babilonia.

¹⁹ Aonu mare ne gnubra nogna Sugablahi God na, balugna nogna suga biꞌo king na, nei keha suga Jerusalem, nei jaola famane glepo te gnafa re. Mare jaola ne paꞌe soru gringni biꞌogna namono Jerusalem te bara te ligoho ka thina na.

²⁰ Mare huhurudi naikno te karha teure mala tei Babilonia. Mare tei ne loku jateula nogna naikno sneka king eghu nei vikegna manare. Neu fabrahu ne ghilei thoke ka narane king gna Pesia te funei frunidi mare.

²¹ Ka puhi igne nodi glose mare na ne krogha fabrahu ne ghilei posani fitusalei finogha leghuni unha teke chekeni mae Jeremaea nogna profet Lord tifa ia.

King Saeras gna Pesia ne snakredi naiknore mala ke figri Israel

²² Ka finogha ululahu te funei fruni King Saeras Babilonia igne, Lord ne loku ka gaoghathogna king igne mala eni kaisei cheke. Nogna sekretri mana re ne rioriso sukha cheke igne, eghuteuna mana ne fatei nonomho igne ka namono te gnafa ke lamnagna nogna kantri na, mala iuꞌiju fajifla ka naiknore. Lord ne eni igne mala thoke mei tutuani nogna nonomho Lord teke chekeni Profet Jeremaea ia. Cheke igne neke cheke eghu,

²³ “King Saeras gna Pesia neke cheke eghu: “ ‘Lord, God gna kligna, neke vahi ghau iara mala funei frunidi kantri te gnafa ka nauthoglu igne. Eghuteuna mana jaola neke vahi ghau iara mala ke babana fapulo nogna Sugablahi mana igne Jerusalem, te au ka kantri Juda. Iara toreni God gna Israel mala au baludi nogna naiknore! Iheire teke magnahaghei figri na, mare tangomana teke pulo Jerusalem mala ke babana fapulo nogna Sugablahi Lord, nodi God mae Israel, te pogho soruni mare Jerusalem.’ ”