Fapea Kronikols 34 - Buka Blahi Ka Cheke Holo

King Josia gna Juda

¹ Ka narane te king mae Josia Juda igre, mana nhana finogha gna kolho. Eghuteuna mana king Jerusalem tolufulu kaisei finogha.

² King igne mana edi glepo te doglo re ka tathagna Lord, eghuteuna mana leghudi koba nogna baubatu te keli teke edi kuꞌegna King Devet tifa ra, nei edi fabrahu kolho unha glepo te doglo.

King Josia rorhoꞌe nodi puhi mala tarai mae bongihehe ka mumuju

³ Ka fahana finogha Josia te king kate mae sitei fara nga teuna, mana ne funu tarai ka nogna God kuꞌegna King Devet. Eghuteuna ka fabotho phei finogha na, mana ne funu fagagae Jerusalem ghe Juda mala klino ka tathagna Lord. Mana ne goigoni fahui nodi vido blahi mae bongihehe re, nei hata koko mumuju gna god gaꞌase Asera nei keha mumuju langau eghu.

⁴ Mana batudi nogna naiknore ne tei paꞌe soru nogna olta Baal, nei goigoni olta mala gahu insens re. Mana kato soru nogna mumuju brahu god gaꞌase Asera baludi keha mumuju re. Mana kina nguanguja ne koko tafri ke klignadi bekudi iheire teke fafara ka olta igre.

⁵ Mana hata nhubradi mae pris bongihehe re ne gnubra ke kligna olta teke fafara mare tifa ra. Ka puhi igne, Jerusalem ghe Juda neke klino ka tathagna Lord.

⁶ Mana jaola neke eni igne ka fati nohi Manase, nei Efrem, nei Simion, tei posa ke raru Naftali. Mana eni igne ka namono te gnafa ka nohi igre, nei ka vido aheva tela diꞌahi.

⁷ Mana hata koko olta ra nei mumuju brahu nogna god gaꞌase Asera re. Mana poposa nei kina nguanguja mumuju igre ghilei vuhai nakrofu kolho. Eghuteuna mana jaola fadidiꞌa olta te mala gahu insens heva heva ka nohi te gnafa Israel. Aonu gnafa teuna, mana neke figri Jerusalem.

King Josia neke horo fapulo Sugablahi na

⁸ Ka nabotho nhana finogha te king Josia igre, mana ne eni Juda nei nogna Sugablahi Lord teu igre mala klino ka tathagna mana na. Aonu mana ne vavahi thilo mae mala ke horo fapulo Sugablahi igne. Nanghadi thilo mae igre: mae Safan, thugna mae Asalia, mae Masea mae biꞌogna Jerusalem, nei mae Joa thugna mae Joahas. Mae Joa gne mae mala tathajidi nogna buka king.

⁹ Thilo mae igre ne mei ka pris biꞌo Hilkaea baludi sileni mala horo fapulo gna Sugablahi igne. Mae Livaet te mala reireghi grengathagna Sugablahi igne mare hata ne mei sileni igre ka Sugablahi na. Mare neke salo sileni igre funu ka naiknodi Manase, nei funudi ka naiknodi Efrem, nei funudi ka keha naiknodi Israel, nei funudi ka naiknodi Juda, nei funudi ka naiknodi Benjamin, nei funudi ka naiknodi Jerusalem.

¹⁰ Thilo mae igre ne tusu lao sileni igne ka mae funei gloku teke vahidi mare te mala filoni teu gloku te eni mare ka Sugablahi igne. Eghuteuna mae funei gloku igre folidi mae iheire te loku ka Sugablahi igne.

¹¹ Mare jaola tusu lao sileni ka mae kapenta, nei mae iheire te lase loku suga ka thaba nei thina, mala foli thina tela katohi nei thaba gaghaho eghu. Glepo igre mala ke eꞌei fakeli Sugablahi teke snakreni king gna Juda teke fadidiꞌa tifa igne.

¹² Aonu mae te lokure ne ghatho tahuni fara gloku igne. Fati mae Livaet igre te bosigna gloku na: mae Jahat ghe mae Obadaea, phei mae igre vikegna mae Merari, eghuteuna mae Sekaraea ghe mae Mesulam, phei mae igre vikegna mae Kohat. Keha mae Livaet te lase koje igre,

¹³ mare te bosidi mae gloku ka soasopaigna nafnata gloku. Eghuteuna keha mae re mala rioriso soru ka buka eidi gloku igre. Eghuteuna keha re mala reireghi grengathagna Sugablahi na.

Pris biꞌo Hilkaea ne filoni buka gna nogna VetulaLord

¹⁴ Ka narane te hata fajifla sileni teke lilisei teku ka chogho ka nogna Sugablahi Lord na teu mare igne, pris biꞌo Hilkaea ne filo deni Buka Vetula nogna Lord teke tusu lao mana ka mae Moses tifa.

¹⁵ Aonu mana ne cheke eghu ka sekretri Safan, “Iara la filo deni nogna Buka Vetula Lord ia agne ke lamnagna nogna Sugablahi Lord igne!” Eghuteuna mae Hilkaea ne tusu lao buka igne ka mae Safan.

¹⁶ Aonu mae Safan hata ne tei buka igne ka king, ne cheke eghu ka mana, “Mae gloku ra edi gobigna lepo teke chekedi iagho ra.

¹⁷ Mare hata fajifla sileni teke filoni teke au jare ka nogna Sugablahi Lord na la tusu lao ka khamedi hatimare mae bos nei hatimare mae gloku.”

¹⁸ Aonu mae Safan ne cheke eghu ka king, “Pris biꞌo Hilkaea neke tusu mei buka igne ka iara.” Aonu mae Safan ne iuꞌiju ke ulugna king cheke te au ke lamnagna buka igne.

¹⁹ Eghuteuna kate nomhidi king cheke te au ka buka na igre, mana ne diꞌanagnafagna fara ne rerheku nogna pohe na.

²⁰ Eghuteuna mana ne eha meidi pris biꞌo Hilkaea, nei mae Ahikam thugna Safan, nei mae Akboa thugna mae Maekaea, nei Sekretri Safan, nei mae Asaea nogna mae gloku mana na. Eghuteuna kate mei mare na, mana ne cheke eghu ka mare,

²¹ “Iara nei naiknodi Juda, nei keha naikno te au nga teu Israel igre eghu mala kafe laseni unha te magnahagheni Lord te mala eni ghehati na. Eghume ghotilo tei hironi gaoghathogna Lord eidi cheke te au ka buka teke filoni pris biꞌo igne. Lord na diꞌatagna fara ka tahati, naugna kuꞌeda tahati tifara neke theome leghuni chekegna Lord na nei theome edi unha mala edi tahati teku te chekedi ka buka na igre.”

²² Aonu kaisei gaꞌase profet na au jare, nanghagna na Hulda khetogna mae Salum. Mae Salum thugna mae Tikva gragna mae Harhas, mana mae mala reireghi pohe blahi ka Sugablahi na. Profet Hulda gne au ka kaisei tothoghei majaghani jare Jerusalem te kiloni mare Fapea Nohi. Hilkaea nei keha mae eghu ne tei filoni Hulda ne chekedi ka mana gobigna lepo igre.

²³ Eghuteuna naꞌa ne cheke ka mare nogna cheke Lord nodi God mae Israel. Eghuteuna naꞌa chekedi mare mala ke pulo ka king mae ihei teke kuru meidi mare igne. Nonomho te mala cheke ka king na igne,

²⁴ “Igne chekegna Lord na, ‘Iara ginauna goigonini Jerusalem, nei paradi nogna naiknore jateula thibri te gnafa te chekeni ka buka teke iuꞌijuni ghotilo ke ulugna king gna Juda igre.

²⁵ Naugna naiknore ne tirodi ghau iara ne gahu insens ka keha god delei, eghuteuna puhidi mare igre te thono diꞌatagudi fara iara re. Eghume iara ginauna na fakakhana diꞌatagu na ka mare, eghuteuna diꞌatagu iara igne theome tangomana te gnafa na.’ ”

^26-27 Eghuteuna naꞌa ne cheke ka king gna Juda nogna cheke Lord nodi God mae Israel, ne cheke eghu, “Iagho la tughu nagnafahi ka cheke te nomhidi iagho kate iuꞌijuni ka buka igne. Eghuteuna iagho nhaꞌa fapari nigho themu kate nomhi ghau iara iagho teke cheke faparini Jerusalem nei iheire te au ke lamnagna. Eghuteuna iagho neke tanhi eidi nakhibomi ra, eghuteuna iagho neke rerheku nou pohere neke tanhi ke ulugu iara kate nomhini iagho nate goigonini iara Jerusalem nei iheire te au ke lamnagna. Eghume iara neke nomhidi nou tharai iagho ra.

²⁸ Eghume iagho ginauna na theome filodi puhi biꞌo igre kate karha nga teu iagho na. Ke leghugna te lehe iagho na, puhi biꞌo igre ginauna thoke mei.” Aonu mae iheire teke kuru mei mae King Josia igre neke pulo neke chekeni nogna cheke tughu Hulda na ka king.

King Josia nei goro maedi Juda ne nhaꞌa cheke balugnaLord

^29-30 Aonu King Josia ne kilodi mae mala baubatu te gnafadi Jerusalem nei Juda, nei mae pris, nei mae Livaet, baludi keha mae langau, neubane mae biꞌo ba ne fiti mae kolho. Eghuteuna mare te gnafa na ne tei balugna mana ka nogna Sugablahi Lord. Aonu king hata buka teke filo deni mae pris biꞌo na ke lamna gna Sugablahi na igne. Mana ne iuꞌiju fajifla cheke te au ka Buka Nhaꞌa cheke na igre, mala nomhini naikno te gnafa re.

³¹ Ka narane tuana, king ne kegra haghe rhegna kegra biꞌogna Sugablahi na ne nhaꞌa cheke balugna Lord. Mana ne kaisei gaoghatho mala thofno faꞌuveni mana, nei mala leghudi nogna vetula nei nogna farirhiu nei nogna cheke teu mana re. Eghume nhaꞌa cheke te eni mana igne mala farerheta gna nogna cheke nei nogna nhaꞌa cheke teu mana te au ka buka igne.

³² Aonu king ne cheke ka naikno te gnafa Jerusalem nei ka vikegna Benjamin mala jaola leghuni nhaꞌa cheke igne. Naiknodi Jerusalem igre ne leghuni nogna nhaꞌa cheke God, nodi God kuꞌedi tifa ra.

³³ King Josia ne tei tongana ka namonodi vike te gnafa Israel igre mala hata fadelei mumuju te diꞌa te au ka nodi vido glose naiknodi Israel. Eghuteuna mana chekedi naiknore mala loku ranghini Lord. Eghume ka narane karha teu King Josia igre, naiknore theome figri tagru, nu leghuni Lord nodi God kuꞌedi tifa ra.