Fapea Kronikols 31 - Buka Blahi Ka Cheke Holo

King Hesekaea ne fadoglini puhi te mala tarai na

¹ Kate gnafa Gaghamu Ghasa-Polho igne, naiknore ne tei ka namono te gnafa Juda igre ne pike nguanguja khegra thina brahure, eghuteuna mare kato soru pari mumuju gna god gaꞌase Asera igne. Eghuteuna mare jaola goigoni nodi vido blahi mae bongihehe nei olta teure. Ke leghu, mare jaola ne eni nafnata puhi igne ka keha vido ka namono Juda nei ka namono ka nohi Benjamin, nei ka nohi Efrem, nei ka nohi Manase. Aonu naiknodi Israel igre neke figri ka namonodi re.

² King Hesekaea ne tufa ka tothoghei hatimare mae pris nei hatimare mae Livaet. Mana tufa ka tothoghei mala edi soasopaigna gloku ka nogna Sugablahi Lord. Mana vavahi keha mala gahu fafara te krono fara, nei fafara te mala au ka pharikeli balugna Lord. Mana vavahi keha mala baubatu ka tharai ka Sugablahi. Eghuteuna mana vavahi keha mala koje balu cheke fakelini Lord.

³ Aonu king ne famei sipu ba buluka mala gahu fafara leuleghu hamerane nei grafi, nei ka narane Sabat, nei ka Gaghamu Khafa, nei ka keha gaghamu te au ka nogna vetula Lord.

⁴ King Hesekaea ne cheke ka iheire te au Jerusalem mala hata mei glepo thufa maladi mae pris nei mae Livaet, mala loku kolho mare ka unha te chekeni ka nogna vetula Lord na.

⁵ Kate chekeni king igne, naiknore ne kelitadi fara te hata te mei gano saro ulu ka nagare nei oel majaghani, nei oliv oel, nei jujurukuli, nei keha gano ka nagare. Mare hata mei fabothodi nodi glepore.

⁶ Naikno te au ka namono Juda igre hata ne mei ne fodu ne salaꞌui fabothodi nodi buluka nei sipu, nei gobigna lepo teke fablahi igre mala tusu lao ka Lord nodi God.

⁷ Mare funu hata mei gobigna lepo igre ka fatilo nhigragna finogha na, eghuteuna mare tothoghei ghilei gnafa ka fafitu nhigra na.

⁸ Kate filodi glepo te kmana igre, king baludi nogna mae biꞌore ne kilo fnaknoni Lord nei cheke glealeꞌa ka nogna naiknodi Israel.

⁹ Eghuteuna king tei ne filodi mae pris nei mae Livaet mala cheke eidi bukrei gano igre.

¹⁰ Pris biꞌo Asaraea ka tharaknagna mae Sadok igne ne cheke eghu, “Funu ka narane teke hata teke mei naiknore gano igre ka nogna Sugablahi Lord te ghilei thoke gognarogne, ghehati au kmana gano. Eghuteuna gano igre theome tangomana nate gnafa na. Ghehati au gobigna lepo igre naugna Lord neke fablahidi nogna naiknore. Eghuteuna kmana glepo au ngau.”

¹¹ Aonu King Hesekaea ne chekedi mare mala tarabana kaisei chogho lamna ka nogna Sugablahi Lord.

¹² Kate tarabanahi mare chogho igne, mare hata ne mei gano nei keha glepo eghu teke hata teke mei naiknore igre ne lilisei ka chogho igne. Kaisei mae Livaet nanghagna na, mae Konanaea te mala reireghidi re glepo igre. Thabusigna mana mae Simei gne te fapea ka mana na.

¹³ King Hesekaea ghe Pris Asaraea ne vavahi nabotho keha mae Livaet mala toghodi phiamare ka gloku igre. Nanghadi nabotho mae Livaet re igre: mae Jehiel, mae Asasaea, mae Nahat, mae Asahel, mae Jerimot, mae Jasabat, mae Eliel, mae Ismakaea, mae Mahat nei mae Benaea.

¹⁴ Eghuteuna kaisei mae Livaet nanghagna na Kore, thugna Imna, mana te reireghini grengatha gna Sugablahi fei ke maghati na. Mare jaola vahini mae Kore mala hata thufa teke tusu ranghini God naiknore, leghuni nodi magnahaghei thedi na. Eghuteuna mana jaola tufa gano igre ka hatimare mae pris nei hatimare mae Livaet.

¹⁵ Namno mae Livaet ne toghoni mae Kore mala tufa gano ka mae pris te au ka namonodi mae pris. Nanghadi namno mae Livaet igre, mae Iden, mae Miniamin, mae Jesua, mae Semaea, mae Amaraea, nei mae Sekanaea. Mare te tufa gano te tei leghu tharaknadi mae pris, neuba mae pris igre ne kuekuꞌe ba mae majaghani.

¹⁶ Eghuteuna mare jaola tufa gano ka thudi nalhaꞌu mae pris te funu ka thilo finogha fei haghe. Mare ginauna au nodi nolaghi te mala tei loku ka nogna Sugablahi Lord. Puhi te tufa gano mare igne leghuni nodi nafnata gloku tothoghei mae pris.

¹⁷ Mare eni nodi nafnata gloku mae pris igne leghudi kmadi tifa ra. Eghume mare leghuni nafnata puhi te tufa gano mare ka mae Livaet te funu ka varadaki finogha te fei haghe. Mare tufa gobigna lepore leghuni nodi nafnata gloku mae tothoghei Livaet ra.

¹⁸ Mare tufa gobigna lepo igre leghuni thura teke rioriso soru mare nanghadi mae Livaet balu khetodi nei thudi teure. Mae Livaet igre mare fagaedi thedi fabrahu nei tarabana mala loku ka nogna Sugablahi Lord.

¹⁹ Keha mae pris ka tharaknagna mae Eron igre, mare reireghi sipu ba buluka ka vido te au falithui ka namonodi re, ba rhedi keha namono are. Hesekaea ghe Pris Asaraea vavahi keha mae Livaet mala tufa gano langau ka mae pris igre. Eghuteuna mare tufa gano langau ka naikno te gnafa teke rioriso soru mare thura nanghadi re ka mae Livaet.

²⁰ King Hesekaea mana edi glepo te doglo heva heva ka kantri Juda. Mana edi glepo te keli igre naugna mana ghatho tahuni Lord nogna God.

²¹ Ka gloku te gnafa te edi King Hesekaea te toghoni nogna Sugablahi Lord na igre nei leghu fakelidi nogna vetula nei nogna cheke teu Lord re, mana hironi nogna God na nei mana thofno kelitagna fara te eni gloku igne. Naugna igne gobigna lepo te edi mana re thofno keli fara.