Fapea Kronikols 29 - Buka Blahi Ka Cheke Holo

King Hesekaea gna Juda

¹ Kate king Hesekaea thugna Ehas Juda na, mana neke varadaki glima finogha gna. Eghuteuna mana king Jerusalem varadaki nhevai finogha. Idogna mana na Abaeja thugna gaꞌase Sekaraea.

² Mana edi puhi te doglo ka tathagna Lord, jateula kuꞌegna King Devet tifa ia neu.

³ Ka nhigra ululahu gna finogha ululahu te funei King Hesekaea igne, mana neke tothora grengatha gna nogna Sugablahi Lord na neke horo fakeli grengatha igre.

⁴ Aonu mana ne kilodi mae pris nei mae Livaet mala thafoni mana ka glalaba gna Sugablahi na fei ke maghati.

⁵ Aonu mana ne cheke eghu ka mare: “Ghotilo ka vikegna mae Livae ra famane fanomho mei. Nogna Sugablahi Lord nodi God kuꞌeda tahati tifa ra, theome gae ka tathagna mana na. Ghotilo fagae ghami themi ka tathagna God, eghuteuna ghotilo mala blahi ka Sugablahi. Hata fadelei gobigna lepo fateote'o te thona nei unha te theome magnahaghedi mana re.

⁶ Kmada tahati tifa ra neke huhughuni Lord. Mare neke edi puhi te diꞌa re neke tei kokoni mana. Mare tirodini Sugablahi te au mana tagna na, eghuteuna mare figri tagruni mana.

⁷ Mare jaola bobotho grengathagna Sugablahi igne, eghuteuna mare ifu falehe jutare. Eghuteuna mare theome gahu insens nei theome gahu fafara ka Sugablahi te mala tarai ka nodi God mae Israel.

⁸ Naugna igne, God ne diꞌatagna fara ka tahati gnafa naiknoda Jerusalem nei Juda. Unha te edi mana Jerusalem nei Juda teu igre farhanadi nei famhaghu ghita eghu tahati. Eghuteuna mare jaola cheke fadiꞌa ghita tahati. Ghotilo la filo tathamihi themi glepo igre.

⁹ Naugna igne, mae naoka ra neke aknu falehe kmada tahati ra eghuteuna mare neke hata khetoda nei thuda teku tahati ra.

¹⁰ Gognarona iara ghaoghatho mala eni kaisei nhaꞌa cheke balugna Lord nodi God mae Israel, mala theome diꞌatagna mana ka tahati.

¹¹ Kheraguro! Ghotilo fanomho ka nogu cheke iara igre! Na glahu glaꞌe soru ghotilo. Lord neke vahi ghami ghotilo mala gahu insens ka mana, nei batudi nogna naikno mana re mala pogho soruni mana.”

¹² Mae Livaet te mala fufunu loku re igre: Ka vikegna mae Kohat, mae Mahat thugna mae Amasae, eghuteuna mae Joel thugna mae Asaraea. Ka vikegna Merari, mae Kis thugna mae Adbi, eghuteuna mae Asaraea thugna mae Jehalelel. Ka vikegna mae Geson, mae Joa thugna mae Sima, eghuteuna mae Eden thugna mae Joa.

¹³ Ka vikegna mae Elisafan, mae Simri ghe mae Joel. Ka vikegna mae Asaf, mae Sekaraea ghe mae Matanaea.

¹⁴ Ka vikegna mae Heman, mae Jehiel ghe mae Simei. Ka vikegna mae Jedutun, mae Semaea ghe mae Usiel.

Mae Pris te fablahi ka nogna SugablahiLord

¹⁵ Aonu mae igre ne kilo meidi mae kheradi re mala kafe mei. Mare te gnafa na ne fagaedi thedi ka tathagna Lord. Aonu mare ne edi gobigna lepo teke chekedi king ka mare re. Mare ne eni nogna Sugablahi Lord mala gae jateula te chekeni ka nogna Vetula Lord na.

¹⁶ Mae pris re ne tei ruma ka Sugablahi igne mala gae ka tathagna Lord. Gobigna lepo te diꞌa ka tathagna God na, mare koko fadelei. Mare lilisei glepo te diꞌa igre ka glalaba na ke kosigna Sugablahi igne. Aonu mae Livaet gre hata ne tei ka Glogu Kidron ke kosi namono.

¹⁷ Ka narane ululahu gna nhigra na, mare neke funu fablahi glalaba te falithuini Sugablahi na. Ka fahana gna narane na, mare loku mei posa ka varanda gna Sugablahi na. Mare neke fablahi ka Sugablahi na keha nhana narane. Aonu, ka nabotho namno narane gna nhigra igne mare ne fagnafa gloku igne.

¹⁸ Aonu mae pris nei mae Livaet teu igre neke figri ka King Hesekaea ne tusu lao ripot di gobigna lepo igre ne cheke eghu ka mana, “Nogna Sugablahi Lord, eghuteuna Olta te mala Gahu Fafara, nei Tevo gna Bret Blahi na, eghuteuna gobigna lepo te mala loku ka Sugablahi igre eghu ghehati edila kafe gaehi ka tathagna Lord.

¹⁹ Gobigna lepo teke hata King Ehas tifa kani teke theome leghuni Lord teku mana ra, ghehati kela kaikaliti mala ke fablahidi. Gobigna lepo igre au ke ulugna Olta te mala Gahu Fafara na.”

²⁰ Hamerane boibongi ka keha narane na, King Hesekaea ne kilodi nogna goro mae biꞌo te gnafa ka namono Jerusalem. Mare ne kafe tei ka nogna Sugablahi Lord.

²¹ Eghuteuna kate mei mare na, mare ne hata ne mei fitu buluka nalhaꞌudi nei fitu sipu nalhaꞌudi, nei fitu sua sipu nalhaꞌudi, nei fitu nanigot nalhaꞌudi. Glepo igre mala fafara ranghini king nei tharakna gna, nei naikno te gnafa Juda, nei malagna Sugablahi na langau eghu mala doglo ka tathagna Lord. King Hesekaea ne cheke ranghidi mae pris ka vikegna Eron mala fafara gano igre ke kligna olta.

²² Aonu ulu lahu na, mare aknu falelehe buluka nalhaꞌudi igre. Eghuteuna mare hata dadaradi re ne thoghei ne fuafusa ne tei ka gerigna olta na. Aonu mare aknu falehe sipu igre. Eghuteuna mare hata dadaradi re ne thoghei fuafusa ne tei ka gerigna olta na. Eghuteuna ke leghu mare aknu falehe sua sipu igre. Mare hata dadaradi re thoghei fuafusa ne tei ka gerigna olta igne.

²³ Aonu mae pris igre hata ne tei nanigot igre ka king nei hatimare goro mae biꞌo te au teu ka vido tuana mala habo lao mare khamedire. Igne kaisei fagaglana eigna tela hata fadeleihi nakhibodire.

²⁴ Mae pris igre ne aknu falehe nanigot igre. Eghuteuna mare ne nhaꞌa lao dadaradi re ke kligna olta. Igne fafara ranghidi naikno te gnafa ka vikegna Israel te mala doglo ka tathagna Lord. Mare eni igne naugna king neke cheke ka mare mala eni fafara te thofno krono fara, eghuteuna mare fafara mala kafe doglo mare ka tathagna Lord.

²⁵ Ke leghu na, King Hesekaea chekedi mae Livaet mala hata nafnata gita nei belo eghu te au ka Sugablahi na leghuni nogna vetula Lord teke chekeni King Devet nei profet Gad, nei profet Natan.

²⁶ Aonu mae Livaet igre mare ne tarabana baludi glepo te mala edi khoje teke tusu lao King Devet ka mare tifa igre. Eghuteuna mae pris re jaola ne tarabana nodi khufli re.

²⁷ Aonu King Hesekaea ne cheke ka mare mala edi fafara te thofno krono fara. Kate fufunu fafara na, mare ne funu koje ne kilo fnaknoni Lord, eghuteuna hatimare mae pris gre ne ifu nodi khufli re, eghuteuna hatimare mae Livaet ne lalahu nodi gita nei thua nafnata glepo te mala koje.

²⁸ Aonu iheire te gnafa te au ka vido igne ne pogho soru ka Lord, eghuteuna mae te au ka kwaea igre ne koje, eghuteuna hatimare mae pris ne kufli. Mare ne eghu ne ghilei thokei vido narane tela kronohi fafara na.

²⁹ Ke leghugna tuana, king baludi naikno te gnafa igre kafe pogho soru pari ne kilo fnaknoni Lord.

³⁰ King Hesekaea baludi nogna goro mae biꞌore ne chekedi hatimare mae Livaet mala kojeni khoje teke rioriso King Devet ghe Profet Asaf. Aonu mare ne glealeꞌa fara te cheke fakelini Lord ka khoje igre, eghuteuna mare ne theome gnafa te pogho soru nei cheke fakelini Lord.

³¹ King Hesekaea ne cheke eghu ka mare, “Gognarona ghotilo fablahi ghami themi ka Lord. Eghume ghotilo hata mei ka Sugablahi gne fafara ra mala tegio ka mana.” Eghuteuna naikno te gnafa igre ne leghuni cheke igne, aonu mare hata ne mei nodi sipu nei nanigot nei buluka teure, nei keha glepo langau eghu mala tusu lao ka God. Keha naiknore glealeꞌa fara ne hata ne mei fafara te thofno krono fara re.

³² Ka puhi igne, mare ne hata fitusalei buluka nalhaꞌudi, nei kaisei gobi sipu nalhaꞌudi, nei phia gobi sua sipu nalhaꞌudi mala fafara mare ka Lord te thofno krono fara.

³³ Mare jaola hata mei namno gobi buluka nalhaꞌudi, nei thilo thogha sipu nei nanigot, eghuteuna mare ne fafara mala laseni te au fakeli mare balugna Lord.

³⁴ Nu mae pris igre theome kmana, eghuteuna mare theome naba te mala aknu falehe nei ligi koko gulidi teu buluka, sipu, sua sipu nei nanigot teu igre, aonu mae Livaet te kheradi mare igre toghodi mare ne ghilei gnafa gloku igne. Eghuteuna keha pris jaola ne gae ka tathagna Lord. Ka narane tuana, mae Livaet ne ghatho tahuni fara te mala fagaedi thedi ka tathagna Lord salaꞌudi hatimare mae pris.

³⁵ Hatimare mae pris ne edi kmana fafara te thono krono fara, eghuteuna mare jaola gahu grisidi fafara re mala laseni te au fakeli mare balugna Lord. Eghuteuna mare hata waen baludi fafara te thofno krono fara. Igne puhi teke fufunu tarai mare ka nogna Sugablahi Lord na.

³⁶ King Hesekaea baludi nogna naiknore ne glealeꞌa fara, naugna Lord ne toghodi mare mala ke faghose fufunu glepo igre.