Fapea Kronikols 26 - Buka Blahi Ka Cheke Holo

King Iusaea gna Juda

¹ Katela lehehi Amasaea na, naiknodi Juda hata thugna mana, Iusaea igne mala kegra king tughuni kmagna. Ka narane tuare mana thokeni nabotho namno finogha.

² Keha narane ke leghugna te lehe Amasaea igre, King Iusaea tei ne magra ka namono Elat, mana hata fapulo namono igne fei Juda neke babana fapulo.

³ Mae Iusaea nabotho namno finogha gna kate kegra king mana na. Eghuteuna mana king Jerusalem glimafulu phei finogha. Idogna mana Jekolaea igne thaugna Jerusalem.

⁴ King igne mana leghuni puhigna kmagna, eghume mana edi glepo te doglo ka tathagna Lord.

⁵ Eghuteuna ka narane te king Iusaea igre, Pris Sekaraea ne farirhiuni Iusaea mala ghatho tahuni, nei hironi eghu puhigna Lord. Eghume Lord ne fablahini mana leghu fata.

⁶ Kaisei narane mana tei ne magra Filistia. Mana ne uludi mare ne paꞌe sorudi bara thinadi thilo namono Gat, nei Jabne, nei Asdod. Eghuteuna mana bara ne ligoho ka thina nogna namono mana te au rhegna namono Asdod nei keha namono langau Filistia.

⁷ Ka narane tuare, God ne toghoni mana mala uludi mana ka magra naiknodi Filistia, nei naiknodi Arab te au ka namono Gua-Baal nei naiknodi Meun.

⁸ Naiknodi Amon hata mei sileni nei keha glepo eghu mala foli takis ka Iusaea. Ka narane igre mana neke kegra heta fara. Eghuteuna thoutonu eigna nafnakno gna mana na ne tei tongana ka namono te gnafa re ne ghilei tei posa Ijep.

⁹ Mana ne horo thilo suga rheta mala toetoe ke kligna bara thina Jerusalem. Kaisei na au ke kligna Grengatha fei Sulukhu, eghuteuna kaisei na au ke kligna Grengatha fei Glogu, eghuteuna kaisei na au ke kligna vido aheva bara thina te au ka sulukhu na.

¹⁰ Eghuteuna mana jaola neke horo suga rheta mala toetoe ke lamna namono nagou. Mana dokha kmana seu, naugna mana au nogna kmana buluka ka thogele ke mosu, nei ka sare langau eghu. Mana kaisei mae te magnahaghei loku ka nagare, aonu nogna mae gloku manare joꞌu nagare grep ka thogele, eghuteuna mare tobi ka vido aheva te au glose te keli.

¹¹ Iusaea au phei nogna mae biꞌo, nanghadi phei mae igre Jel ghe mae Masea. Phia mae igre loku ke parigna mae Hananaea mae ihei te nogna mae biꞌo king. Phiamare te mala fadoglidi niha mae soldia ka nogna tothoghei armi Iusaea. Soldia ka nogna armi Iusaea igre lase magra fara, eghuteuna nogna tothoghei mana igre mare tarabana fabrahu mala tei ka magra.

^12-13 Iusaea au thilo gobi fitu thogha glima gobi soldia tarabana fabrahu mala tei magra ka nogna naoka re. Eghuteuna mana au phia thogha namno gobi mae biꞌo ka vike igne, mae igre te mala batudi mae soldia te tei ka magra na.

¹⁴ Iusaea tarabana glepo mala magra: greoreo mala tafra ka jata, nei goru, nei khepi mala magra, nei pohe mala magra, nei phaloho, nei thina mala piri kuava.

¹⁵ Mana jaola au keha mae glalase Jerusalem te edi vido te keli te mala au teu hatimare mae soldia te mala fada jata nei mala fada thina biꞌo ka mae naoka. Mare edi vido te keli igre ka suga te mala toetoe igre nei ka sulukhu di bara thina gna namono igne. Eghuteuna thoutonu eigna nanghagna mana na tei ka namono te gnafa re, naugna Lord na toghoni mana ghilei thoke ka narane te rheta fara mana na.

¹⁶ Nu kate haghe te rheta fara mana te fnakno nanghagna na, mana ne funu fahaehaghe fara ne ghilei groꞌe mana. Mana tapla jafra ka nakhibo ranghini Lord nogna God na kate tei ruma mana lamna ka nogna Sugablahi Lord na ne gahu insens ka Olta mala Gahu Insens.

¹⁷ Nu Pris Asaraea ne tei ruma ke leghugna mana, balugna nhana salei nogna pris Lord te theome mhaghuni king.

¹⁸ Eghuteuna mare ne cheke faheta eghu ka mana, “Iusaea, iagho theo nou nolaghi te mei gahu insens agne te mala tarai ka Lord na! Ghehati pris ka tharaknagna Eron teke fablahi ghami mare gre kolho te au nolaghi te mala gahu insens na. Vido igne thono blahi fara! Iagho jifla gognarola naugna iagho ne khibo ranghini Lord! Mana ginauna na theome ke fablahi nigho iagho!”

¹⁹ Nu Iusaea hata kaisei dis tarabana mala gahu insens. Eghuteuna kate nomhini nodi cheke mae pris igre, mana diꞌatagna fara salaꞌui, aonu kaisei fogra te thono diꞌa fara te kiloi leprosi igne ne mei ka phaꞌugna mana na.

²⁰ Kate filoni mae pris biꞌo Asaraea nei keha mae pris igre teuna, mare laseni khabru leprosi te thokeni phaꞌugna mana igne. Mare ne mhaghu nodi fara, aonu mare ne huhuruni mana mala jifla ka Sugablahi na. Eghuteuna mana magnahaghei fara te mala ghosei te jifla kosi na, naugna mana laseni Lord te parani mana na.

²¹ King Iusaea au khabru leprosi igne ka thinigna na ne ghilei lehe. Mana theome nabagna te tei ka nogna Sugablahi Lord na. Eghuteuna mana ne au sopa thegna ka kaisei suga, eghuteuna mana vahini mae thugna na, mae Jotam mala reireghini nogna suga king, nei batuni gavman gna Juda.

²² Thoutonu di keha glepo teke edi King Iusaea funu ka narane teke kegra king gna te ghilei thoke ka narane glehegna na, Profet Isaia thugna Amoj neke rioriso soru thoutonu igre ka nogna buka na.

²³ Kate lehe Iusaea igne mare theome snakreni te giugiluni mana ka bekudi hatimare mae king, aonu mare ne giugiluni mana rhegna bekudi mae king ka namono biꞌo na, naugna khabru leprosi igne neke au ka mana. Eghuteuna thugna mana Jotam teke tughuni mana na.