Fapea Kronikols 25 - Buka Blahi Ka Cheke Holo

¹ Amasaea neke varadaki glima finogha gna neke king nga, mana neke king Jerusalem varadaki nheva finogha. Idogna mana na, Jehoadin thaugna Jerusalem.

² King igne mana edi unha te doglo ka tathagna Lord, nu mana theome edi ka nagnafa gna fateote'o.

³ Eghuteuna kate king Amasaea gna Juda igne, nogna nolaghi mana na ne rheta fara ne salaꞌui, mana ne falehedi phei mae teke faleheni mae kmagna na.

⁴ Nu mana neke theome falehedi thugna manare, naugna mana leghuni unha teke chekeni Lord ka nogna vetula mae Moses. Ka vetula igne Lord neke cheke eghu faheta, “Jame kaisei mae sitei huhughuni vetula na, eghuteuna mana nabagna te lehe tagna na, ghotilo theome tangomana te faleheni kmagna mana na. Eghuteuna jame kaisei mae huhughuni vetula na, eghuteuna mana nabagna te lehe tagna na, ghotilo ginauna thosei faleheni thugna mana na. Mana thegna mala lehe eigna nakhibogna thegna na.”

⁵ King Amasaea ne kilo meidi maedi Juda mae iheire te thokeni varadaki finogha haghe. Aonu mana fofotadi ka nogna tothoghei armi na. Mana fofota maedi Juda nei Benjamin leghu tharakna. Mana vavahi keha mae komanda ka kaisei thogha soldia, eghuteuna keha mae komanda ka kaisei gobi soldia. Khaputudi re thokeni thilo gobi thogha soldia, mae iheire te lase loku goru nei greoreo te mala tafra jata, eghuteuna mare tarabana fabrahu mala tei ka magra.

⁶ Eghuteuna mana jaola hata kaisei gobi thogha famane soldia Israel. Mana foli thilo thogha fati gobi kilo silva ka king gna Israel te mala hata soldia igre.

⁷ Nu kaisei profet tei ne filoni King Amasaea, ne cheke eghu ka mana, “King, iagho theome tangomana te hata soldia di Israel te tei balumu ka magra na, naugna mare theome leghuni Lord, nei theome au baludi mare, eghume mana jaola theome au baludi soldia di Efrem.

⁸ Jau iagho gaoghathomu na, mare ginauna togho nigho mala nheta ka magra eghu, nu neuba iagho ne theome mhaghu ka magra, God ginauna koko soru nigho ke uludi nou naokare. God ngala te au nolaghi te mala togho nigho ba theo.”

⁹ Nu Amasaea ne ghusna eghu ka profet, “Ba, na faꞌunhadi tahati sileni teke tusu laohi te mala folidi mare ra?” Aonu nogna mae gloku God na ne cheke eghu ka mana, “Lord tangomana te tusu ari kmana ka iagho salaꞌudi teke koko iagho re!”

¹⁰ Aonu King Amasaea neke kuru fapulodi soldia di Efrem nei Israel. Eghuteuna kate ke pulo ka namono na, mare ne diꞌatadi fara ka maedi Juda.

¹¹ Nu mae Amasaea ne rheta gaoghathogna na ne batudi nogna soldia re ne tei ka glogu te kiloi mare “Glogu mala Hata Solt.” Ka vido igne, mare ne magra ka soldia di Idom ne aknu falehe nabotho thogha soldiadi Idom.

¹² Eghuteuna armi gna Juda igne ne hata karha nabotho thogha soldia di Idom, aonu mare hatadi ne haghe ka kaisei thogele ne koko sorudi funu ka phegu te ninhigrana fara na ne soru bruja ka thina ne kafe lehe.

¹³ Nu ka narane tuana, soldia di Efrem teke kuru fapulodi Amasaea igre, mare tei ne goigoni nodi namono naiknodi Juda funu Samaria tei posa Bet-Horon. Eghuteuna mare ne aknu falehe thilo thogha naiknodi Juda, eghuteuna mare blau kmana glepo hata neke figri baludi.

¹⁴ Kate mei King Amasaea te aknu falehe kmana soldia di Idom ka magra igne, mana hata ne mei nodi god mare re balugna. Aonu mana ne fakegra haghe nodi mumuju blahi mae bongihehe igre mala tarai, nei gahu insens eghu tadi.

¹⁵ Aonu Lord ne diꞌatagna fara ka Amasaea ne kuru meini kaisei profet ka mana. Profet igne ne cheke eghu ka mana, “Naugna unha sagho te tarai ka nodi god naiknodi delei grea? Filo sagho, kate tei magra iagho ka mare ra, nu god igre neke theome tangomana teke fakarhidi mare na!”

¹⁶ Kate cheke teu profet ka mana igne, king ne cheke eghu, “Kmu sagho! Iara neke theome vahi nigho iagho te mala tusu mei gaoghatho te keli ka iara na! Jame te theome kmu iagho na, iara ginauna akni falehe nigho iagho!” Kate nomhini profet nogna cheke king igne, mana ne cheke eghu ka king, “Gognarona iara laseni, God na la kulu ghathonihi te mala goigoni nigho iagho na, naugna iagho ne eni glepo te diꞌa igne, eghuteuna iagho jaola tirou fanomho ka nogu cheke iara igre.”

King Amasaea tei ne magra ka maedi Israel

¹⁷ Amasaea king gna Juda nei hatimare nogna mae mala tusu lao gaoghatho te keli ka mana igre eghu ne ghaoghaho mala tei magra ka maedi Israel. Aonu mana ne kurudi keha mae ne tei filoni King Jehoas gna Israel, mala cheke eghu ka mana, “King Amasaea magnahaghei te mei magra ka iagho.”

¹⁸ Eghuteuna Jehoas king gna Israel igne ne cheke tughu ka mana ka cheke naba, ne cheke eghu, “Tifa na kaisei gnarho fachuchuru gna Lebanon ne fatei cheke ka kaisei gaju biꞌogna Lebanon, ne cheke eghu, ‘Te keli na iagho famei thumu gaꞌase ia mala tolaghi ka mae thugu iara gne.’ Eghuteuna kaisei buluka mata tei ne tapla soru gnarho fachuchuru igne.”

¹⁹ King Jehoas neke cheke eghui, “Iara laseni, iagho neke tei magra neke uluni armigna Idom, eghuteuna iagho glealeꞌa fara gognarona. Te keli na iagho au kolho ka namono. Thosei faꞌeiꞌei magra ka ghehati. Glahu ari ghehati goigonidi naiknodi Juda balumu iagho.”

²⁰ Nu King Amasaea ne tirogna fanomho ka King Jehoas, naugna nogna gaoghatho God te mala snakre lao naiknodi Juda ka khamegna King Jehoas. Eghume mare ne tarai ka nodi god mae Idom.

²¹ Aonu King Jehoas balu armi gna Israel tei ka namono Bet-Semes ka kantri Juda ne magra ka Amasaea nei nogna soldia.

²² Ka magra tuana, Israel ne uluni Juda, eghuteuna soldia di Juda rikha neke figri ka nodi namono re.

²³ Eghuteuna King Jehoas gna Israel ne lokini King Amasaea. Aonu King Jehoas balu nogna armi na tei Jerusalem ne paꞌe soru bara thinagna namono na, funu ka Grengatha gna Efrem, tei posani Grengatha gna Kona. Vidogna bara thina te paꞌe soru mare igne jame jateula te kaisei gobi nhanasalei mita eghu.

²⁴ Eghuteuna Jehoas tei ruma Jerusalem ne hata gol nei silva baludi famane glepo teke reireghi teku vikegna Obed-Idom ka nogna Sugablahi God, nei famane glepo te keli la ngau eghu teke au ka sugagna king. Mana hata neke pulo Samaria glepo igre baludi naiknodi Juda teke hata ka magra igne.

²⁵ King Amasaea gna Juda karha neu nabagna nabotho glima finogha ke leghudi narane te lehe King Jehoas gna Israel.

²⁶ Keha glepo teke edi Amasaea re, mare neke rioriso soru ka Buka Eidi Glepo Teke Edi King Di Juda nei Israel.

²⁷ Ka narane te theome funu leghuni King Amasaea puhigna Lord, keha maedi Jerusalem ne ghaoghaho mala aknu faleheni mana, nu mana rikha ne tei ka namono Lakis. Nu mare kurudi keha mae mala tei ke leghugna mana mala faleheni mana ka namono igne.

²⁸ Eghuteuna mare hata thinigna mana na ka hose neke pulo Jerusalem. Mare ne giugiluni mana ka bekudi hatimare mae king ka nogna Namono biꞌo King Devet.