Fapea Kronikols 24 - Buka Blahi Ka Cheke Holo

King Joas gna Juda

¹ Mae Joas fitu finogha funu karhagna kate king mana Juda. Mana king phiatutu finogha Jerusalem. Idogna mana na Sibia, thaugna Bereseba.

² Kani karha teku Pris Jehoada na, mae Joas ne eni unha te doglo ka tathagna Lord.

³ Jehoada ne vahidi phei gaꞌase mala tolaghi ka king, eghuteuna king ne tolaghi ka repa, eghuteuna repa ne au thudi ka mana.

⁴ Ke leghugna igne, king ghaoghatho mala ke babana fapulo nogna Sugablahi Lord.

⁵ Aonu mana ne kilodi hatimare mae pris nei hatimare mae Livaet, ne cheke eghu ka mare, “Ghotilo tei ka namono te gnafa ke lamnagna kantri Juda mala hata sileni teke salo naiknore leuleghu finogha ra, mala ke eni fapulo nogna Sugablahi God igne. Ghotilo mala eni igne gognarona!” Nu mae Livaet gre ne paipalighi fara ne theome faghose eni igne.

⁶ Aonu king ne kilo meini Pris Jehoada, mae ihei te lida ka hatimare mae pris. Joas ne cheke eghu ka mana, “Naugna unha sagho te theome chekedi mae Livaet ra te salo takis ka naiknodi Jerusalem nei Juda teu ra? Mae Moses nogna mae gloku Lord neke chekeni takis igne ka vikegna Israel tifa ra mala foli takis te mala reireghigna Suga Tapuale te Blahi na.”

⁷ (Eigna thugna Kuin Atalaea kaisei thau te diꞌa igne neke blau kmana glepo blahi teke au ka nogna Sugablahi God na hata neke tei mala tarai ka Baal.)

⁸ Aonu, King Joas ne chekedi keha mae mala eni kaisei bokis mala lilisei kosi ka grengathagna nogna Sugablahi Lord na mala nanhaꞌa sileni naiknore.

⁹ Eghuteuna mare ne fatei nogna cheke king igne Jerusalem nei ka keha namono Juda. Mana cheke ka naiknore mala hata mei nodi takis re mala tusu lao ka Lord. Igne u takis teke chekeni mae Moses nogna mae gloku God ka vikegna Israel ke lamna namono nagou.

¹⁰ Eghuteuna mae biꞌo nei naikno te gnafa teure ne kelitadi fara kate hata te mei te lilisei nodi sileni re ka bokis igne fodu ne ghilei salaꞌui.

¹¹ Leuleghu narane na, mae Livaet gre hata mei bokis igne ka nogna mae biꞌo king. Eghuteuna kate fodu bokis igne na, nogna sekretri king ghe nogna mae gloku pris igne, phiamare hata fajifla sileni igne, eghuteuna ke lisei fapulo bokis na ka mala augna na. Ka puhi igne, mare au kmana sileni fara malagna Sugablahi na.

¹² Eghuteuna king ghe Jehoada, phiamare tusu lao sileni igne ka goro mae biꞌo nate ke babana fapulogna nogna Sugablahi Lord igne. Mare folidi mae te mala kato thina, mae kapenta, nei mae iheire te lase horo aean nei bras.

¹³ Mae gloku igre mare loku heta fara mala ke eni Sugablahi igne mala ke famane leghuni unha teke kulu ghathoni mare na. Eghuteuna mare eni neke thofno rheta fara jateula teku tifa na neu.

¹⁴ Kate loku te gnafa mare Sugablahi igne, gol nei silva eghu teke salaꞌui re, mare neke tusu fapulo ka King Joas ghe Pris Jehoada. Phia mare hata neke edi keha glepo blahi mala loku ka nogna Sugablahi Lord. Tuare glepo mala fafara te gahu te krono, dis nei keha glepo ka gol nei silva. Kani karha teku Pris Jehoada na, mare gahu fafara koba ka Sugagna Lord.

¹⁵ Nu Jehoada neke thofno kuekuꞌe fara. Mana neke thokeni kaisei gobi tolufulu finogha gna neke lehe nga.

¹⁶ Mare neke giugiluni mana ka bekudi hatimare mae king ka nogna Namono Biꞌo King Devet, naugna mana neke edi famane gloku ranghidi naiknodi Israel, ranghini God, nei ranghini Sugablahi.

King Joas ne lisa kokoni puhi te keli na

¹⁷ Ke leghugna te lehe Pris Jehoada igne, goro mae biꞌodi Juda igre mei ne pogho soru ne cheke fafnaknoni King Joas. Mana ne fanomho ka nodi cheke mare re.

¹⁸ King baludi naiknore ne lisa kokoni puhi te doglo te mala tarai ka nogna Sugablahi Lord nodi God kuꞌedi tifa ra. Mare ne tarai ka mumuju gna god gaꞌase Asera. Eghuteuna Lord ne thono diꞌatagna fara ka puhi te diꞌa fara te edi naiknodi Jerusalem ghe Juda.

¹⁹ Neuba Lord ne kurudi nogna profet re te tei cheke nogna chekere ka naiknore mala tughu nagnafa nei ke pulo mei ka mana neu, nu mare tirodi fanomho.

²⁰ Aonu Tharunga gna God na ne mei ka Pris Sekaraea thugna Pris Jehoada. Eghuteuna mana tei ne kegra ka kaisei vido aheva naiknore te tangomana te filoni mana na, aonu mana ne cheke eghu ka mare, “God ne cheke eghu, ‘Naugna unha si ghotilo te theome leghudi nogu cheke iara grea? Ghotilo ginauna na theome au ka nakarha te keli! Naugna ghotilo ne lisa koko ghau iara Lord, eghuteuna iara ginauna jaola lisa koko ghami ghotilo!’ ”

²¹ Nu king ne kaisei gaoghatho baludi nogna mae biꞌo re mala falehe mae pris igne. King ne chekedi mare ne fadini mana ka thina ne ghilei lehe ka glalaba ke ulugna nogna Sugablahi Lord.

²² King Joas neke theome ghathodi famane puhigna Jehoada kmagna Pris Sekaraea na, nu mana faleheni thugna mana na. Eghuteuna kate namo lehe na, Pris Sekaraea ne cheke eghu, “Iara toreni Lord mala filodi glepo te edi ghotilo gognaro igre, eghuteuna God ginauna para ghami ghotilo.” Aonu mana ne lehe.

King Joas ne lehe

²³ Kate gnafa narane te nakhete nei reka fara teu ka finogha igne, armigna Siria mei ne magra Juda nei Jerusalem, mare falehedi ne gnafa hatimare mae lida. Eghuteuna mare hata neke pulo kmana glepo te keli ka nodi king na Damaskas.

²⁴ Soldia di Siria igre theome kmana fara, nu Lord toghoni armigna Siria igne mala uludi soldia di Juda te kmana fara re. Mana eni igne naugna naiknodi Juda gre ne lisa kokoni Lord nodi God kuꞌedi mare tifa ra. Eghume ka puhi igne, Lord ne parani King Joas.

²⁵ King Joas ne ghoreho ne diꞌa phari nogna fara ka magra igne. Eghuteuna kate gnafa magra igne soldia di Siria igre neke pulo ka namonodi re. Aonu phei nogna mae biꞌo Joas igre ne ghaoghatho mala ke tughu fapulo unha teke eni mae Joas teke faleheni thugna Pris Jehoada igne. Aonu phiamare mei ne faleheni Joas kate thuru teu mana ka nogna sape na. Mare ne giugiluni mana ka nogna Namono Biꞌo King Devet, nu mare theome giugiluni mana ka bekudi hatimare mae king.

²⁶ Nanghadi phia mae teke faleheni mana re, mae Sabad thugna Simeat gaꞌasegna Amon, ghe mae Jehosabad thugna Simrit, kaisei gaꞌasegna Moab.

²⁷ Thoutonu eidi thugna mae Joas, nei cheke teke chekedi hatimare mae profet eigna mae Joas, nei cheke mala ke babana fapulo nogna Sugablahi God na teu igre mare neke rioriso soru ka Buka Eidi Hatimare Mae King. Thugna mana mae Amasaea neke king tughuni kmagna.