Fapea Kronikols 23 - Buka Blahi Ka Cheke Holo

Joas ne kegra king

¹ Ka fafitu finogha te poru Joas igre, Pris Jehoada ne au gaoghatho heta te mala eni kaisei glepo. Aonu mana tei ne cheke baludi glima mae komanda ka tothoghei kaisei gobi soldia. Mare ne kaisei gaoghatho te mala king mae Joas na. Nanghadi glima mae komanda igre: Mae Asaraea thugna mae Jeroham, mae Ismael thugna mae Jehohanan, mae Asaraea thugna mae Obed, mae Masea thugna mae Adaea nei mae Elisafat thugna mae Sikri.

² Mae komanda igre tei ka namono te gnafa Juda mala kilo meidi hatimare mae Livaet baludi mae lida ka vikedi mae Israel mala mei Jerusalem.

³ Eghuteuna mare ne khapru ka nogna Sugablahi God na ne eni kaisei nhaꞌa cheke balugna King Joas. Pris Jehoada ne cheke eghu ka mare, “Thugna king te mala king na! Tuana unha teke nhaꞌa chekeni Lord eigna vikegna King Devet.

⁴ Glepo igre nate edi tahatire: kaisei tothoghei ka mae pris ra nei ghotilo mae Livaet te mei te eni nomi gloku na ka narane Sabat ra, ghotilo mala reireghi grengatha Sugablahi.

⁵ Keha tothoghei na mala reireghi sugagna kuin, eghuteuna fatilo tothoghei na ginauna mala reireghi khotogna grengatha tuana. Eghuteuna keha mae Livaet te gnafa ra, ghotilo mala mei khapru ka glalaba ke ulugna nogna Sugablahi Lord.

⁶ Theome snakreni kaisei naikno te ruma ka Sugablahi na. Mae pris nei mae Livaet eghu te loku ka narane igne kolho nate ruma lamna na, naugna mare la gaehi ka tathagna Lord na. Ghotilo keha mae Livaet ra mala leghuni chekegna Lord na mala au kosi.

⁷ Ghotilo mae Livaet ra hata nomi glepo mala magra ra mala kegra faligohoni king, eghuteuna ghotilo mala reireghi fakelini mana. Jame ihei te fariuriu ruma mei ke lamnagna glalabagna Sugablahi igne na, ghotilo akni faleheni mana.”

⁸ Aonu hatimare mae Livaet baludi keha naiknodi Juda teu igre ne leghuni unha te chekeni Pris Jehoada ka mare na. Eghuteuna ka narane Sabat na mare hata ne mei nodi soldia re ka mana. Mare te gnafa na ne kafe tarabana naugna Jehoada theome snakreni kaisei ka mare te gnafa ka narane igne. Aonu iheire te gnafa loku, nei iheire te funu loku teu ka narane Sabat igne, mare mala kafe mei.

⁹ Aonu Pris Jehoada ne hata fajifla ka nogna Sugablahi God na nogna goru, nei nogna greoreo biꞌo, nei greoreo ikodi teku King Devet tifa ra ne tusu lao ka hatimare mae komanda.

¹⁰ Eghuteuna Jehoada ne chekedi mae te mala reireghi igre mala hata nodi glepo mala magra re mala kegra rhegna king mala reireghini mana. Mare kegra rhegna olta ka Sugablahi na, nei ka vido te gnafa ka Sugablahi na.

¹¹ Jehoada baludi mae thugna re batuni ne mei Joas, thugna King Ahasaea igne ne nhaꞌa lao nogna khepi nafnakno king na ka mana. Eghuteuna mare ne tusu lao ka mana kaisei buka nogna Vetula God ka mana. Pris Jehoada baludi thugna mana re eghu ne tofa oel ka phaꞌugna mae Joas. Mare ne eha eghu fabiꞌo, “Iagho king fabrahu!”

¹² Kate nomhidi Kuin Atalaea naogladi naikno te chari tafri nei eha fabiꞌo balu kilo fnaknoni king teu igre, naꞌa ghosei ne tei ka nogna Sugablahi Lord mala filoni unha te eni jare na.

¹³ Aonu naꞌa ne filoni king te kegra teu ka nogna vido king rhegna kegra biꞌo ka grengathagna Sugablahi na. Eghuteuna hatimare mae komanda kegra falithuini mana, eghuteuna mare ifu ka trampet. Eghuteuna naiknore ne eha fabiꞌo balu koje, naugna mare thono glealeꞌa fara. Aonu Kuin Atalaea thofno diꞌanagnafagna fara ne rerheku nogna pohe na. Eghuteuna naꞌa ne eha eghu fabiꞌo, “Ghotilo naikno diꞌa! Ghotilo eni puhi te diꞌa na, magnahaghei te fapari ghau iara!”

¹⁴ Pris Jehoada theome magnahagheidi mare te faleheni naꞌa ke lamnagna glalabagna nogna Sugablahi Lord na, aonu mana ne cheke eghu ka hatimare mae komanda, “Ghotilo hata fajiflani naꞌa ka hatimare mae greireghi are. Eghuteuna jame ihei te fariuriu fakarhini naꞌa na, ghotilo jaola aknu falehe mae tuana.”

¹⁵ Aonu mare hatani naꞌa ne tei ka grengatha te mala rumadi hose rhegna nogna Suga Biꞌo king na ne aknu faleheni naꞌa jare.

Pris Jehoada ne paꞌe soru nogna Sugablahi Baal

¹⁶ Jehoada hata King Joas baludi naiknore mala nhaꞌa cheke leghuni nogna nhaꞌa cheke Lord, aonu mare ne nhaꞌa cheke mala au jateula nogna naikno Lord eghu kolho.

¹⁷ Aonu naiknore ne leghuni nogna cheke mana igne ne kafe tei paꞌe soru nogna Sugablahi Baal igne. Eghuteuna mare ne goigoni olta te gnafa nei mumuju te gna teu ka vido igne. Eghuteuna mare ne aknu faleheni mae Matan nogna pris Baal igne rhegna olta na.

¹⁸ Eghuteuna Jehoada ne vahidi keha mae pris ka vikegna mae Livae mala filodi gloku ka nogna Sugablahi Lord. Nodi gloku mare na mala edi gloku teke tusu lao King Devet ka kuꞌedi mare tifa ra. Aonu mare koje nei glealeꞌa fara neu kate gahu fafara ka Lord jateula te chekeni ka nogna Vetula mae Moses naia neu.

¹⁹ Eghuteuna mana lilisei mae greireghi ka grengatha gna Sugablahi na, mala tangomana mare te lhotini ihei te theome gae ka tathagna Lord na te ruma lamna na.

²⁰ Aonu Jehoada ne hata mae komanda baludi mae biꞌo nei mae lida nei keha naikno eghu ne hatani King Joas ne jifla ka nogna Sugablahi Lord na. Mare ne tei ruma ka grengatha te kiloi mare Grengathagna Kligna na ne tei fagnokroni King Joas ka nogna sape nafnakno ka nogna suga biꞌo king.

²¹ Aonu naiknore ne thofno glealeꞌa fara. Eghuteuna namono biꞌo na ne au kmu, naugna mare neke hata naflahi mala magra na neke aknu faleheni Kuin Atalaea.