Fapea Kronikols 2 - Buka Blahi Ka Cheke Holo

King Solomon ne tarabana mala horo nogna sugaLord

¹ King Solomon ne ghaoghatho mala horo kaisei Sugablahi mala tarai nei tufru soruni eghu nanghagna Lord. Eghuteuna mana jaola ne magnahaghei te horo kaisei nogna suga biꞌo thegna.

² Aonu mana ne huhurudi fitusalei thogha mae mala hata glepo te mala horodi phei suga igre, eghuteuna nhanasalei thogha mae mala dokha nei kato thina eghu ka thogele ro. Eghuteuna thilo thogha namno gobi mae mala fiofilodi mae gloku.

³ Eghuteuna mae Solomon riso tei ka mae Haeram, king gna namono biꞌo Taea. Mana ne cheke eghu ka letas igne, “Iara magnahaghei nigho iagho te togho ghau iara jateula te sughu edi iagho ka mae kmagu iara Devet tifa ra eghu, iagho neke toghoni mana neke famei thaba gaju sida ka mana neke horo nogna suga ra.

⁴ Uve, iara gognarona tarabana mala horo kaisei Sugablahi mala tarai nei tufru soruni eghu Lord nogu God, nei mala gahu insens te famane sisiri keligna fara. Eghuteuna ghehati ginauna fafara bret blahi na ka Lord leuleghu narane, hamerane nei grafi, ka narane Sabat, nei ka Gaghamu Khafa, nei ka keha nogna narane blahi God. Ghehati ginauna gahu fafara ka Sugablahi igne mala ghatho tahuni Lord. Eghuteuna ghehati ginauna eni igne fabrahu leghuni unha teke chekeni Lord.

⁵ “Iara ghaoghatho mala horo kaisei famane Sugablahi biꞌo malagna mana, naugna nomi God ghehati maemi Israel igne haghe fara salaꞌudi keha god are.

⁶ Tutuani, theo kaisei naikno te tangomana te horo kaisei Sugablahi te mala au God tagna na, naugna neuba maloa gne ne krepa fara, nu theome nabagna God te au ke lamnagna na. Eghume iara theome nabagu te horo Sugablahi igne, jame vido mala fafara nei mala gahu insens teu igne kolho te nabagu iara te mala tufru soruni mana na.

⁷ “Iara magnahaghei nigho iagho te famei kaisei mae te lasedi fara te edi thua nafnata glepo ka gol nei silva, nei bras, nei aean, nei lase susuki thotoghale ka pohe te kakarha, ba te ukru, ba te ngonge. Iara magnahaghei mae ihei te lase horo mumuju nei thotoghale ka gol ne bras nei thina. Mana tangomana te loku baludi nogu mae gloku iara igre ka nohi Juda nei ka namono biꞌo Jerusalem. Mae gloku igre lasedi fara te edi thua nafnata gloku, eghuteuna mae kmagu iara na la vahidihi mare.

⁸ “Iara lasedi fara nou mae gloku iagho ra mare lase kato thaba Lebanon. Eghume iara magnahaghei nigho iagho te famei keha famane thaba ka gaju sida, gaju paen nei gaju almug. Nogu mae gloku iara igre tangomana te ari loku baludi nou mae gloku iagho ra.

⁹ Mare tangomana te kulu kato tughahi thabare, naugna Sugablahi nate horo iara igne ginauna biꞌo fara nei na famane fara eghu.

¹⁰ Iara tangomana te folidi nou mae gloku iagho are ka kaisei gobi phiatutu glima thogha baeg wit biꞌo, nei kaisei gobi phiatutu glima thogha baeg bali biꞌo, nei fati gobi phiatutu thogha lita waen, nei fati gobi phiatutu thogha lita oliv oel.”

¹¹ King Haeram ne nomhini nogna cheke mae Solomon igne neke riso fapulo eghu ka mana: “Naugna nou Lord iagho na namhadi fara nogna naiknore, eghume mana neke vahi nigho iagho mala king frunidi nogna naiknore.

¹² Tahati cheke fakelini Lord nodi God mae Israel! Mana neke vuavuha maloa kligna ghe nauthoglu pari igne! Lord neke tusu ranghini King Devet kaisei mae thugna te lalase fara nei au tagna gaoghatho te keli. Iagho tangomana te horo kaisei Sugablahi malagna Lord, nei kaisei suga biꞌo malamu themu.

¹³ “Gognarona iara faꞌari kaisei mae ka iagho nanghagna na mae Huram-Abi. Mana kaisei mae glalase fara nei jaola kaisei mae keli fara ka nogna gloku na.

¹⁴ Kmagna mana na maegna ka namono Taea, eghuteuna idogna mana na mei ka vikegna mae Dan. Mana laseni fara te horo glepo ka gol, silva, bras, aean, thina nei thaba. Eghuteuna mana jaola lasedi fara te mala susuki glepo ka pohe pipito, te ukru, ba te ngonge, nei ka famane pohe vegha. Mana lase horo tothoghale ka thua nafnata glepo thofno jateula te chekedi iagho ka mana re eghu. Te keli na iagho snakreni mana mala loku baludi nou mae gloku iagho are, nei baludi mae teke loku ranghini King Devet kmamu iagho tifa ia.

¹⁵ “Te keli na iagho famei wit, nei bali, nei waen nei oliv oel eghu ka mae gloku igre leghuni unha teke nhaꞌa chekeni iagho na.

¹⁶ Mare ginauna tei Lebanon mala kato thaba te magnahaghedi iagho re. Eghuteuna mare ginauna pala soru thaba igre ka gratha na mala haru fodu jare. Eghuteuna mare na hata tei phugra gaju igre Jopa. Eghuteuna nou mae gloku iaghore ginauna soru ka vido tuana mala pala tei Jerusalem.”

¹⁷ Mae Solomon ne kaha naiknodi keha kantri te au Israel jateula teke edi kmagna mana King Devet tifa ra neu. Eghuteuna khaputudi mae gloku igre thokeni kaisei gobi glima fulu thilo thogha namno gobi mae.

¹⁸ Eghuteuna mana jaola ne vavahi fitu salei thogha mae mala paladi glepo te mala horodi phei suga igre, eghuteuna nhana salei thogha mae mala dokha nei mala kato thina eghu ka thogele ro. Eghuteuna thilo thogha namno gobi mae mala fiofilodi mae gloku igre, mala tangomana gloku na te tei faꞌulu nei loku fakeli teuna.