Fapea Kronikols 19 - Buka Blahi Ka Cheke Holo

Profet Jehu ne cheke faheta ka King Jehosafat

¹ Jehosafat king gna Juda theome ghoreho neke figri ka nogna suga na Jerusalem.

² Ka narane tuana kaisei profet, nanghagna na mae Jehu thugna mae Hanan, mana tei ne thafoni King Jehosafat, ne cheke eghu ka mana, “Ba? Ka gaoghathomu iagho na, puhi doglo te tei toghoni iagho mae te diꞌa na nei fofodu balugna mae ihei te tirognani Lord na teuna? Uve, Lord na diꞌatagna fara ka iagho eigna glepo igne!

³ Neuba, iagho eni unha glepo te keli na. Iagho neke kato soru mumuju gna god gaꞌase Asera, eghuteuna iagho thofno toreni God mala togho nigho.”

King Jehosafat ne fadoglini puhi te mala fatedi naiknore

⁴ Neuba King Jehosafat ne au neu Jerusalem, leuleghu fata na mana tei filodi nogna naiknore funu ke mata Bereseba tei posa ka thogele ke raru kantri Efrem. Mana tei toutonu ka mare eigna Lord na nodi God kuꞌedi mare tifa ra, eghuteuna mare mala ke pulo mei ka mana.

⁵ Ka narane tuana, mana lilisei mae mala fatedi naiknore ka namono te gnafa Juda aheva te bara te ligoho ka thina.

⁶ Mana ne cheke eghu ka mare, “Kate fateni naikno na, ghotilo mala filo fakeli, naugna ghotilo theome fate mala kelitagna naikno na, nu ghotilo fate mala kelitagna Lord. Eghume kate fate na, ghotilo cheke fajiflani te doglo mana na ba mana nabagna te papara, Lord na au balumi ghotilo.

⁷ Ghotilo ghatho tahuni Lord noda God. Fiofilo ghami mala fate ka puhi te doglo, naugna mana tirognani puhi te theome doglo na. Eghuteuna mana jaola tirognani mae fate te phile ka ihei na, ba tirognani puhi te fate famaemahe te mala hata sileni na.”

⁸ Jerusalem na, King Jehosafat vavahi keha mae pris, nei keha mae Livaet, nei keha mae lida ka tharakna re eghu mala fatedi naiknore leghuni nogna Vetula Lord, nei mala fadoglidi nodi fapholai naiknore.

⁹ Eghuteuna mana ne cheke eghu ka mae mala fatere, “Kate eni ghotilo gloku igne, ghotilo mala thofno ghatho tahuni nei ghatho branani eghu Lord.

¹⁰ Eghuteuna kate mei kherada ka keha namono Juda igre mala fadoglidi ghotilo puhi biꞌo te au tadire teuna, ghotilo cheke ranghidi mala leghuni mare puhi te doglo na, mala theome eni mare kaisei nakhibo ranghini Lord. Neubane puhi biꞌo ka puhi te falehe naikno, ba fapholai ka thua nafnata vetula ba chekegna Lord, ghotilo mala cheke ranghidi. Jame te theome kulu cheke faheta ranghidi ghotilo na, Lord ginauna diꞌatagna ka ghotilo nei ka kherada tahati ra eghu. Nu jame te kulu cheke faheta ranghidi ghotilo na, ghotilo ginauna theo kaisei puhi biꞌo nate thoke ghami ghotilo na.

¹¹ “Mae pris biꞌo Amaraea mana au nogna nolaghi te mala fateni ihei ka nogna Vetula Lord. Mae Sebedaea thugna mae Ismael mae biꞌo ka vikegna Juda, mana tangomana te fateni ihei ka nogna vetula king. Eghuteuna mae Livaet mare ginauna mala jaola mala fate. Ghotilo mala heta ka nomi gloku na. Snakreni Lord mae ihei te eni unha te doglo na mala au balumi.”