Fapea Kronikols 14 - Buka Blahi Ka Cheke Holo

¹ Eghuteuna kate lehe Abaeja na, mare ne giugiluni mana ka bekudi hatimare mae king ka nogna Namono biꞌo King Devet. Eghuteuna mae Asa thugna mana na neke funei fruni tughuni mana. Ka narane King Asa te funei fruni Juda, kantri Juda au ka pharikeli nabagna nabotho finogha.

King Asa ne uludi naiknodi Kus

² Asa edi unha glepo te keli nei doglo teure ka tathagna Lord nogna God.

³ Mana hata fadelei nodi olta naikno bongihehe, nei jaola ne fadidiꞌa nodi vido blahi te mala tarai mare ka mumuju god, nei paꞌe soru thina te brahu fara te blahi fara ka mare igne, nei kato soru nodi mumuju god gaꞌase Asera.

⁴ Mana cheke ranghidi naiknodi Juda mala leghuni Lord nodi God kuꞌedi tifa ra, eghuteuna faꞌuvedi nogna vetula nei nogna cheke teu mana re.

⁵ Eghuteuna mana paꞌe soru nodi vido blahi mala tarai ka mumuju god, nei hata koko olta mala gahu insens ka namono te gnafa Juda. Aonu nogna naikno mana re ne au ka pharikeli.

⁶ Ka narane tuare, mana bara ne ligoho namono te gnafa Juda igre, naugna Lord ne eni kantri igne mala au kmu. Theo kaisei naikno mei te magra ka King Asa ka finogha igre naugna Lord neke tusu ranghini mana pharikeli.

⁷ King ne cheke eghu ka naiknore, “Te keli na tahati babana namono gre mala bara ligoho ka thina. Eghuteuna tahati mala horo suga mala toetoe ke klignadi bara thina igre, eghuteuna tahati mala horo grengatha mala bibilakhi ka aean te brahu fara. Tahati ginauna khotogna namono igne naugna tahati ne faꞌuveni Lord noda God. Neubane au faligoho ghita mae naoka gre, nu mana fiofilo ghita fabrahu mala au tahati kau pharikeli.” Aonu mare ne edi gloku igre, eghuteuna mare ne au ka nakarha te keli.

⁸ King Asa au thilo gobi thogha soldia di Juda ka nogna armi na. Mare pala goru nei greoreo biꞌo mala tafra jata. Eghuteuna phei gobi nhana salei thogha soldia di Benjamin, mare hata phaloho nei greoreo ikodi. Armigna Juda nei armigna Benjamin, mare te gnafa na kafe mae nheta mala magra.

⁹ Aonu kaisei mae biꞌogna Kus nanghagna na Sera, mana mei ne posa ka namono Maresa jare Juda. Mana mei balugna kaisei mola soldia, nei thilo gobi chariot mala magra.

¹⁰ King Asa balugna nogna armi na tei ne magrini Sera. Mare te gnafa na tarabana mala magra ka glogu Sefata rhegna namono Merasa.

¹¹ Aonu King Asa ne tarai ka Lord nogna God. Mana ne tarai eghu, “Lord, theo kaisei jateula iagho teuna. Iagho ngala tangomana te togho ghami ghehati mae te glaꞌe fara gre, eigna ghehati theome naba te magra ka mae te nheta fara igre. Iagho togho ghami ghehati gognarogne. Lord, iagho nomi God ghehati, ghehati rouronu kolho ka iagho. Soldia igre kmana fara, nu ghehati mei ka vido igne mala magridi mare ka nanghamu iagho. Lord, iagho nomi God ghehati, iagho thosei snakreni mae tuana mala ulu ghami ghehati.”

¹² Aonu King Asa hata armigna Juda igne ne tei magra ka armigna Kus, aonu Lord ne toghoni Juda mala uluni mare magra igne. Eghuteuna soldia di Kus igre ne kafe rikha.

¹³ Asa balugna nogna armi na ne ngolhidi mare ne ghilei tei posa ka namono Gerara. Eghuteuna naugna kmana ka mare te lehe na, armigna Kus igne ne glaꞌe soru ne theo nodi nolaghi te loku fodu mei teke magra na. Lord ne toghoni nogna armi na ne goigonini fara armigna Kus. Eghuteuna hatimare mae soldia di Juda igre ne hata kmana glepo te keli ka mare.

¹⁴ Ke leghu, armigna Juda igne ne goigonidi namono te gnafa te au faligohoni Gerara. Naiknogna rijon igne ne mhaghu nodi fara ka Lord, eghuteuna soldia di Juda igre ne tei ka namono te gnafa igre ne hata nodi glepo te keli mare re.

¹⁵ Jaola ka narane tuare, nogna soldia mae Asa igre tei ne magridi mae iheire te reireghi sipu nei kamel ka vido igne, eghuteuna mare ne blau kmana sipu nei nanigot, nei kamel. Aonu mare neke pulo mei Jerusalem.