Fapea Kronikols 11 - Buka Blahi Ka Cheke Holo

Profet Semaea cheke faheta ka Rehoboam

¹ Kate mei Jerusalem, Rehoboam ne kilodi kaisei gobi nhana salei thogha nogna soldia te rheta lahu ka vikegna Juda nei ka vikegna Benjamin mala tei magra ka vikegna Israel te au ke raru, mala ke pulo mei naikno igre mala ke au ke parigna nogna nolaghi na.

² Nu chekegna God na ne mei ka mae Semaea nogna mae gloku God. Mana ne cheke eghu,

³ “Iagho cheke ka Rehoboam, thugna Solomon, king gna Juda, baludi naiknodi Israel te au ka vikedi Juda nei Benjamin,

⁴ Lord ne cheke eghu: Ghotilo thosei tei magridi thabusimi ghotilo are. Ghotilo ke kafe pulo ka namono, naugna iara ngala teke eni glepo igne!” Aonu mare ne leghuni nogna cheke Lord igne ne theome tei magra ka Jeroboam.

King Rehoboam bara thina ne ligoho keha namono Juda

^5-10 King Rehoboam ne au soru Jerusalem. Mana bara ne ligoho ka thina keha namono ka nohi Juda nei ka nohi Benjamin. Nanghadi namono re igre: Betlehem, Etam, Tekoa, Bet-Sua, Soko, Adulam, Gat, Maresa, Jif, Adoraem, Lakis, Aseka, Sora, Aejalon nei Hebron.

¹¹ Mana bara ne ligoho ka thina namono igre, eghuteuna mana vahidi hatimare mae komanda mala fiofilodi namono igre. Eghuteuna ka namono igre, mana nanhaꞌa gano, oliv oel, nei waen.

¹² Ka puhi igne, mana edi namono igre ne thofno rheta fara, mala tangomana te reireghi fakelidi phei nodi nohi Juda ghe Benjamin.

Hatimare mae pris nei mae Livaet eghu ne mei Juda

¹³ Eghuteuna hatimare mae pris nei hatimare mae Livaet eghu te au ke raru Israel igre mei ne loku fodu ka Rehoboam ke mata Juda.

¹⁴ Mae igre jifla kokodi nodi suga nei glose teure ne mei Jerusalem nei aheva langau ka keha vido Juda are eghu. Naugna Jeroboam nei vikegna mana re eghu ne theome snakredi mae pris te edi nogna gloku Lord.

¹⁵ Jeroboam fablahidi nogna pris thegna re te mala loku ka vido blahire. Mare tarai tufru soru ka mumuju nanigot nei ka sua buluka.

¹⁶ Nu keha naiknodi Israel te au mata igre magnahaghei fara te tarai ka nodi Lord God. Aonu mare jifla Israel ne mei leghudi hatimare mae pris nei hatimare mae Livaet ne mei Jerusalem mala tangomana mare te tarai nei fafara teu ka Lord nodi God kuꞌedi tifa ra.

¹⁷ Ka puhi igne, kantri Juda ne rheta tulao. Mare sutu hagheni King Rehoboam nabagna thilo finogha. Nafnata puhi te sughu edi mare ka kmagna mana King Solomon nei kuꞌegna mana King Devet.

¹⁸ King Rehoboam ne tolaghi ka Mahalat. Mahalat gne thugna gaꞌase mae Jerimot, mae Jerimot gne thudi nalhaꞌu King Devet ghe Abihael. Eghuteuna Abihael gne teuna thugna gaꞌase mae Eliab, mae Eliab gne thugna nalhaꞌu mae Jesi.

¹⁹ Rehoboam ghe Mahalat ne au thilo thudi nalhaꞌu: Mae Jeus, mae Semaraea nei mae Saham.

²⁰ Ke leghu, king neke tolaghi ka Maka gragna mae Absalom, eghuteuna repa au fati thudi nalhaꞌu: Mae Abaeja, mae Atae, mae Sisa nei mae Selomit.

²¹ Mae Rehoboam au nabotho nhana khetogna, eghuteuna mana jaola au namno salei fapea khetogna langau eghu balugna. Nu mana namhani fara Maka salaꞌudi keha khetogna nei nogna gaꞌase teure. Eghuteuna mana au varadaki nhanai thugna nalhaꞌu nei namno salei thugna gaꞌase.

²² Mana vahini mae Abaeja na teke karha ka Maka igne te mala lida ka mae thabusignare, eghuteuna mae Abaeja mala king ke leghugna thegna.

²³ King igne lalase fara, eghuteuna mala tusu lao nolaghi ka mae thabusigna re mala funei frunidi rijon ka phei nohi jare Juda ghe Benjamin. Mare au ka namono aheva te bara te lithui ka thina. Leuleghu fata na mae Rehoboam fatei kmana glepo nei gano eghu ka mare, eghuteuna mana jaola hata mei kmana gaꞌase mala tolaghi ka mae thugna nalhaꞌure.