Fapea Korin 6 - Buka Blahi Ka Cheke Holo

¹ Ghehati kafe orio loku balugna God, eghume ghehati thofno tore ghami ghotilo mala ghatho tahuni u khokofakasai teke hata ghotilo ka God igne. Thosei lisa lao khokofakasai igne mala theo nafugna.

² Eigna God neke cheke eghu, “Ka vido narane te mala togho ghami na, iara neke nomhi ghami ghotilo. Ka narane te mala fakarhi ghami na, iara neke togho ghami ghotilo.” Filo si ghotilo! Gognaro gne vido narane God te mala nomhi ghami ghotilo na, eghuteuna gognaro gne u narane God te mala fakarhi ghami ghotilo na.

Vido te ninhigrana ranghini mae Pol

³ Ghehati theome magnahagheni kaisei naikno te filoni kaisei najafra ka nomi gloku ghehati na. Eghume ghehati theome eni kaisei glepo te diꞌa te mala snakreni kaisei naikno te filoni kaisei nabrou te mala cheke faparini gloku te eni ghehati gne.

⁴ Nu ghehati falalase ghami themi te nogna mae gloku God na ka unha te edi ghehati re. Ghehati keli tami kolho te thafodi hoholo ba thua nafnata glepo te ninhigrana te mei ka ghehati.

⁵ Mare puri ghami nei koko lao ghami ka suga sosolo. Naiknore diꞌa tadi ghami nei magri ghami. Ghehati loku heta, keha fatare ghehati theo kaisei vido mala thuru ba te mala ghamu na.

⁶ Ghehati falaseni eigna ghehati nogna mae gloku God ka nomi glalase eigna Nonomho te Keli na. Puhimire klino fara. Ghehati theome tangomana te ghosei te diꞌatami na nei ghehati tangomana te keli ranghini ihei. Tharunga te Blahi na au ka ghehati, nei u namha tutuani te mala namhani ihei na au ka ghehati.

⁷ Ghehati tangomana te toutonuni u cheke te tutuani na, nei nogna nolaghi God na au ka ghehati. Ghehati tangomana te leghuni puhi te doglo ke ulugna God na, eigna tangomana te togho ghami ghehati te mala magrini mae naoka ka puhi te gnafa igre.

⁸ Keha naiknore ghatho tahu ghami, nu keha naiknore fapari ghami. Keha naiknore cheke fakeli ghami, nu keha naiknore cheke fadiꞌa ghami. Keha naiknore kilo ghami mae velepuhi chaichaghi, nu ghehati chekeni ngala unha te tutuani na.

⁹ Mare chekeni ne theome mae khuru tutuani ghehati teuna, nu naikno te gnafare lase ghami ghehati te thofno mae khuru tutuani na. Ghehati namo lehe, nu ghehati karha meu ngala. Mare tangomana te para ghami, nu mare theome tangomana te falehe ghami.

¹⁰ Mare tangomana te fadiꞌa nagnafa ghami na, nu ghehati gleale'a fabrahu kolho. Ghehati kuma fara ka nauthoglu igne, nu ghehati toghodi kmana naikno mala dedei kligna. Ghehati theo kaisei nomi glepo ka nauthoglu igne, nu ghehati thofno khotodi glepo te gnafa te au kligna.

¹¹ Uve kheraguro ka namono Korin! Ghehati cheke ari ka ghotilo gaoghathomi te gnafare, eghuteuna ghehati thofno namha ghami ghotilo ka nagnafamire.

¹² Jame te mei kegra fanogra kaisei glepo ka noda namha na, glepo igne mei funu ka ghotilo. Naugna iara thofno laseni eigna ghehati theome gnafa te namha ghami ghotilo na!

¹³ Iara cheke ka ghotilo jateula te cheke ka thugu eghu. Ghotilo mala falalase puhi te keli teke falalase arihi ghehati ka ghotilo igne. Ghotilo mala falalaseni te namha ghami ghehati tutuani na!

Thosei leghuni puhidi iheire te theome fatutuani

¹⁴ Ghotilo nhogri ka iheire te theome fatutuani, eghume thosei fariuriu loku baludi. Eigna unha te keli na theome tangomana te loku fodu ka unha te diꞌa na. Eghuteuna u naphae na theome tangomana te au fodu ka gromno na.

¹⁵ Kraes na theome tangomana te kaisei gaoghatho balugna mae Satan. Eghuteuna ihei te fatutuani na theome tangomana te kaisei gaoghatho balugna mae ihei te theome fatutuani na.

¹⁶ Nogna Sugablahi God na theome mala fodu ka mumuju. Jaola ghotilo laseni eigna tahati na nogna Sugablahi God mae ihei te karha te tifa! Naugna God neke cheke eghu, “Iara ginauna mala au baludi nogu naiknore, eghuteuna iara ginauna mala tei baludi. Iara ginauna mala nodi God mare, eghuteuna mare ginauna mala nogu naikno iara.”

¹⁷ Naugna igne Lord ne cheke eghu, “Lisa laodi naikno tuare, eghuteuna ghotilo mala au fadelei ka mare. Ghotilo mala thosei haboni kaisei glepo te thona ka tathagu iara na. Jame te leghuni ghotilo igne na, iara ginauna gleale'a mala hata ghami ghotilo.”

¹⁸ “Eghuteuna iara ginauna jateula Kmami eghu ghotilo, eghuteuna ghotilo ginauna jateula thugu nalhaꞌu nei gaꞌase eghu iara. Iara God mae ihei te au nolaghi te gnafa te chekeni igne.”