Fapea Korin 5 - Buka Blahi Ka Cheke Holo

Namonoda na kligna

¹ Tahati laseni kate lehe kau nauthoglu gne tahati tangomana te tei au ka thini majaghani te tusu ranghi ghita God kligna na. God ginauna nake vuavuha thini tahati gne mala au fabrahu. Naikno na theome tangomana te vuavuha thini tuana.

² Gognaro na tahati thono hongo ghitani fara thinida igre. Tahati magnahagheni fara te au ka thini majaghani gna kligna.

³ Naugna kate au tahati ka thini te majaghani na, thini te majaghani igne na au fabrahu ka tahati tifa tifa.

⁴ Nu tahati au ngau ka thinida ka nauthoglu igne eghuteuna thini igre tahu nei hongo ghitani eghu, nu tahati theome magnahaghei te koko thini igre. Theo. Tahati magnahagheni ngala thinigna kligna na te mei toku tafru ghita, eghuteuna thini te lehe igre ginauna thafru kau karha.

⁵ God neke vuavuha ghita mala tughu tahati neku, eghuteuna mana neke tusu ranghi ghitahi u Tharunga te Blahi na igne kaisei nhaꞌa cheke eigna u karha majaghani nate thofno tusu ranghi ghita na.

^6-7 Eghume tahati theome nanga noda kolho, neuba unha ne eni ranghini ghita. Eigna nakarhada tahati na u nakarha fatutuani, theome leghuni unha te filodi tahatire. Naugna tahati laseni te au teu tahati ke lamnadi u thini igre, tahati theome thofno namo ka Lord ka vido aheva te au mana na.

⁸ Uve, tahati theome nanga noda. Tutuani, tahati magnahagheni fara te tei kokodi thini igre mala au balugna Lord.

⁹ Nu igne kaisei glepo te ulu na, neuba tahati ne au ka nauthoglu igne ba namono kligna, tahati magnahagheni Lord te gleale'a ka unha te edi tahatire.

¹⁰ Tahati laseni, tahati te gnafa na ginau ari kegra ka fate ke ulugna Kraes. Mana ginauna taba ghita hui, leghuni unha teke eni tahati ka nakarhada na kau nauthoglu igne, te keli ba te diꞌa.

Tahati kheragna God

¹¹ Naugna igne ghehati tangomana te thofno ghatho tahuni Lord, nei fariuriu mala toghodi naiknore mala fatutuanidi nomi chekere eigna thofno karha. God na lase ghami farahi ghehati, eghuteuna te ghathoni iara na ghotilo jaola lase ghami fara ghehati.

¹² Eghume, ghotilo laseni igne, eigna ghehati theo ngau te fariuriu hironi kaisei nabrou te mala fafnakno ghami themi na. Nu ghehati magnahagheni te falalase ari ka ghotilo unha teke edi ghehati re, mala tangomana ghotilo te fahaehaghe ghami ghehati na. Aonu ghotilo ginauna au glepo te mala chekedi ka iheire te lase fahaehaghe eidi unha te keli fifilodi ke kosire, nu mare theome nangadi unha te au ka nagnafadire.

¹³ Keha naiknore te chekeni na ghehati noli. Jame te eghu na, naugna ghehati ne loku heta malagna God. Nu tutuani gaoghatho te keli na au ka ghehati eghuteuna gaoghatho tuana mala togho ghami ghotilo.

¹⁴ Nogna namha Kraes na sagheleghu ghami ghehati. Naugna ghehati laseni kaisei Kraes ngala teke lehe tughu ghita te gnafa na. Eghume tahati te gnafa na jateula te lehe balugna mana eghu.

¹⁵ Kraes na neke lehe tughu ghita gnafa mala tangomana tahati te karha teu gre mala thosei leghudi gaoghathoda thedare. Tahati mala leghuni gaoghathogna Kraes mae ihei teke lehe tughu ghita nei ke karha fapulo teu gognaro gne.

¹⁶ Eghume gognaro na ghehati theome fateni kaisei naikno leghuni nogna gaoghatho naiknogna nauthoglu gne. Tifa na ghehati neke fateni Kraes leghuni nogna gaoghatho naikno na, naugna ghehati gaoghathomi na ne khogla naikno kolho mana eghu. Nu gognaro na ghehati theome eni tuana.

¹⁷ Tutuani fara, ihei te nogna Kraes na, mana kaisei naikno majaghani. Glepo te thonare la theohi ka mana, eghuteuna glepo te majaghanire teke mei au ka mana re.

^18-19 Gobigna lepo igre God ne edi ranghi ghita. Naugna ka nogna gloku Kraes na, God neke hata fapulo ghita mala au fakeli balugna mana. Eghuteuna mana neke tusu mei ka ghehati gloku igne mala ke hata fapulo keha naikno te snivi fabrahu teu ka nakhibo mala au fakeli balugna God. Eghuteuna mana ginauna theome ke ghathodi u nakhibognare.

²⁰ Eghume God neke kilo ghami ghehati mala toutonu eigna mae Kraes. Eghuteuna kate eni ghehati igne, jateula God thegna ngala teke ehadi naiknore mala mei ka mana. Uve, ghehati thofno tore ghami ghotilo ka nanghagna Kraes mala ke pulo mei ke au fakeli balugna God.

²¹ Kraes na theo kaisei nakhibogna. Nu te mala togho ghita na, God neke lisa lao ke kligna gna mana nakhiboda te gnafare. God neke eni igne mala tangomana tahati te doglo ke ulugna God.