Fapea Korin 4 - Buka Blahi Ka Cheke Holo

Toutonu u Nonomho te Keli

¹ God kokhoni ghami ghehati neke tusu mei gloku blahi igne, eghume ghehati theome tangomana te babaꞌo ka gloku igne na.

² Nu ghehati lisei fadelei glepo te poru ke lamnami te tangomana famamaja ghami teu, nei theome lase chaichaghi, nei theome tangomana te tuthughu chekegna God na. Ghehati farirhiuni unha te tutuani igne te falalase ghami themi ka naikno te gnafare. Mare tangomana te lase ghami ka nagnafadire te unha nafnata naikno ghehati na nei jaola ghehati thofno leghuni Lord.

³ Eghuteuna jame te theome fakakhana ka naikno u Nonomho te Keli te toutonuni ghehati igne na, u Nonomho te Keli igne na theome kakhana kolho ka naikno te snivi fabrahu re.

⁴ Eigna Satan mae ihei te funei frunini nauthoglu igne ne faromnodi nagnafadi naikno te theome fatutuanire. Eghume mare theome tangomana te filoni u naphae gna Nonomho te Keli te thofno fatakleni nogna nolaghi biꞌo Kraes na, mae ihei te thofno thotoghale gna God na.

⁵ Ghehati theome toutonu eimi themi, nu ghehati toutonu eigna mae Jisas Kraes na Lord. Eghuteuna ghehati nomi mae gloku ghotilo mala toutonu eigna mae Jisas.

⁶ Naugna God neke chekeni naphae na mala siasigla kate romno na, eghuteuna God tuanala te fasigla mei u naphae gna na ka nagnafami ghehatire. Mana eni igne mala lase fakelini ghehati nogna nolaghi biꞌo God te sigla mei ka thinigna Kraes.

⁷ Nu neuba ghehati ne hatini gloku te mala toutonu u Nonomho te Keli na, ghehati tharuma naikno kolho jateula dis te hohoro ka glose ia eghu kolho. Eghume naikno te gnafare kafe laseni u nolaghi biꞌo te mala laseni gloku igne neke mei funu ka God, theome neke mei funu ka ghehati.

⁸ Kmana fata mare ei puhi biꞌo ka ghehati, nu mare theome tangomana te tapla fapari ghami ghehati na. Kmana fata ghehati nanga nomi fara, nu gaoghathomire theome babaꞌo.

⁹ Kmana naikno para ghami ghehati, nu God na au balumi fabrahu. Kmana fata mare fakabru ghami, nu mare theome tangomana te roꞌe ghami ghehati na.

¹⁰ Leuleghu fata na, nogna glehe mae Jisas na thakle ka thinimi ghehatire, mala jaola thakle ka thinimi ghehati re nakarhagna mae Jisas na.

¹¹ Leuleghu fata na, naiknore fariuriu falehe ghami ghehati eigna ghehati ne leghuni mae Jisas. Ka puhi igne nakarhagna mae Jisas na thakle ka thinimi ghehati te tangomana te mala lehe kolho na.

¹² Neuba ghehati namo lehe koba kate toutonuni u Nonomho te Keli igne, ghotilo tangomana te hatani u thofno karha na.

¹³ Grioriso te blahi na ne cheke eghu, “Iara neke cheke naugna iara neke fatutuani.” Nomi fatutuani ghehati na kaisei nanaba ka tuana. Eghume ghehati toutonu eigna Kraes naugna ghehati ne fatutuani ni mana.

¹⁴ Ghehati laseni God na neke fakarha fapuloni noda Lord Jisas Kraes. Eghuteuna mana ginauna nake fakarha fapulo ghami ghehati jateula mae Jisas eghu. Eghuteuna mana ginauna hata ghami ghehati tei balumi ghotilo ka thofno namono gna mana na. Tahati ginauna kegra fodu ke ulugna mana jare.

¹⁵ Gobigna lepo igre mala togho ghami ghotilo. Eghuteuna jateula igne teu te jifla te tei nogna khokofakasai God na ka naikno te kmanare, naiknore ginauna cheke fakelini God mala fodu salaꞌui nafnaknogna God na.

Tahati fatutuani nogna nhaꞌa cheke God na

¹⁶ Naugna igne ghehati theome nigra ka gloku na. Neuba thinimi gre ne thoghei ne diꞌa nei nigra neu ne tei ngau, tharungamire majaghani fabrahu leuleghu narane.

¹⁷ Ghehati au papara katha vido te kmoꞌei kolho gognaro na, nu hoholo igne mala togho ghami mala hatani u nakarha te keli te theo ka huigna na ka God kligna! Nakarha igne ke uluni hoholo tuana.

¹⁸ Eghume ghehati theome ghaoghatho eigna unha te filoni ka tathada na, nu ghehati ghaoghatho eigna unha te theome filoni nga teu tahati. Glepo te filodi tahati ka tathadare theome au raugha. Nu unha te theome tangomana te filoni tahati na, tuana nate au fabrahu ginauna.