Fapea Korin 3 - Buka Blahi Ka Cheke Holo

¹ Ba, ne fapea fariuriu fafnakno ghami themi kolho ghehati neu si ghotilo ia? Theo. Ghehati theome jateula keha naikno te magnahaghei kaisei mae te mala rioriso letas eidi thedi ka ghotilo te mala laseni ne thofno nogna mae gloku God tura eghu sia. Tutuani, ghehati jaola theome magnahaghei kaisei letas funu ka ghotilo ba funugna ka iheinga.

² Ghotilo themi ngala te mala jateula kaisei letas teu te mala toutonu eigna nakarhami themi ghehati na ke lamnami ghotilo. Letas tuana theome rioriso ka pepa nu rioriso ka nagnafami ghehatire! Eghuteuna naikno te gnafare tangomana te kafe iu'ijuni nei laseni eghu letas igne.

³ Eghuteuna naiknore thofno laseni igne, ghotilo jateula letas teke risoni Kraes hata teke ari ghehati ia eghu. Letas igne Kraes neke theome rioriso ka ink, nu ka Tharunga gna God mae ihei te karha te tifa teke rioriso na. Eghuteuna mana neke theome rioriso ke kligna thina te tataba, nu neke rioriso ke lamna nagnafami ghotilo re.

⁴ Ghehati tangomana te chekeni igne, naugna ka Kraes ghehati biꞌo nomi fatutuani na ka God.

⁵ Tutuani, ghehati theo kaisei nomi nolaghi themi te mala chekeni ghehati nabami si te mala eni gloku igne teuna. Nu God ngala te fatangomana ghami ghehati te mala eni gloku igne na.

⁶ Tutuani, God neke eni kaisei nhaꞌa cheke majaghani baludi nogna naiknore. Mana ngala te fatangomana ghami ghehati te mala loku ranghini mana mala toutonu ka naiknore eigna nhaꞌa cheke majaghani na. Igne u nabrou teke eni mana mala fakarhidi mare. U nhaꞌa cheke majaghani igne theome glepo neke rioriso soru ka nogna vetula mae Moses nu nogna Tharunga te Blahi. Naugna vetula tuana mala faleheni naikno na, nu Tharunga te Blahi na mala tusu meini u karha na.

⁷ Nogna gloku vetula teke rioriso soru mare ke klignadi phei thina tataba igre tifa na, mala falehe naikno kolho. Eghuteuna vetula igne neke mei balu siasigla gna nogna nolaghi biꞌo God, neke siasigla mei ka thinigna mae Moses na. Eghuteuna, neuba siasigla igne ne thoghei ne tei dofini ka thinigna mana na, naiknodi Israel re neke theome tangomana te filo fabrahu ka thinigna mana na.

⁸ Nu siasigla gna nogna nolaghi biꞌo God teke mei balugna nogna gloku Tharunga te Blahi na biꞌo uluni fara teke tifa na.

⁹ Tutuani, nogna gloku vetula na au tagna siasigla nogna nolaghi biꞌo God na, neuba, nogna gloku vetula na mala fate falehedi naiknore. Eghuteuna nogna gloku Tharunga te Blahi na mala fadoglodi naiknore ke ulugna God. Igne au siasigla nogna nolaghi biꞌo God te keli fara ulu tulao gna tifa ia.

¹⁰ Eghume u siasigla teke filoni naiknore tifa ka nogna vetula mae Moses na tuana la sala'uhi gognaro na, naugna siasigla gna nogna gloku Tharunga te Blahi na thofno biꞌo fara.

¹¹ Eghuteuna nogna gloku vetula theome tangomana te au fabrahu na, nu neuba, tifa na au tagna siasigla gna nogna nolaghi biꞌo God. Eghume nogna gloku Tharunga te Blahi na ginauna au fabrahu, eigna au tagna siasigla nogna nolaghi biꞌo God te uluni fara tifa ia!

¹² Eghume naugna ghehati thofno laseni nogna nolaghi biꞌo God te au fabrahu, ghehati theome tangomana te mhaghu kate loku ranghini Lord na.

¹³ Ghehati theome jateula mae Moses eghu. Mana neke toku tafru thinigna na mala theome filoni naiknodi Israel re. Naugna siasigla gna God na ne thoghei ne tei dofini ka thinigna mana na.

^14-15 Nu gaoghathodire neke thono romno fara tifa na. Neuba gognaro gne, kate iu'ijuni naiknore u nogna vetula mae Moses na, gaoghathodire romnou ngala. Tutuani, Kraes na ngala te hata fadelei gaoghatho te faromnodi mare igne kate kaisei mare balugna mana na.

¹⁶ Nu tangomana meu ngala te hata fadelei na eghu, naugna grioriso te blahi na cheke eghu, “Kate figri ihei ka Lord na, mana na hata fadelei gaoghatho te faromnodi mare igne.”

¹⁷ Te chekeni teu ka grioriso te blahi igne “Lord” na mae Tharunga te Blahi, eghume ihei te figri ka Lord na gaoghathogna na thofno snagla mala fatutuani ni mae Jisas Kraes naugna Tharunga gna Lord na au ka mana.

¹⁸ Tahati te gnafa na theome nabada kaisei glepo te mala toku tafrudi thinidare jateula teke eni mae Moses tifa ia eghu kate mei te namo ka Lord na. Nu tahati mala fakakhana u siasigla gna nogna nolaghi biꞌo Lord na. Eghuteuna leuleghu fata na siasigla gna Lord mae ihei te Tharunga igne mana na loku ke lamnada mala ghilei tughu tahati jateula thegna mana eghu.