Fapea Korin 12 - Buka Blahi Ka Cheke Holo

Keha glepo ne thakle ka mae Pol

¹ Iara mala cheke fahaehaghe fabrahu, neubane theome tangomana te togho ghita na. Iara na chekedi mifi nei glepo teke poru eghu te fatakle Lord ranghi ghau iara re.

² Iara laseni God hata ghau iara neke haghe kligna ka nabotho fati finogha te liu ra. Iara theome raꞌe laseni jame teke eni tutuani ka thinigu iara na ba neke khogla ka mifi kolho, nu God ngala te laseni na.

^3-4 Eghuteuna iara laseni God neke hata ghau iara neke tei ka namono Paradaes. Nu iara neke nomhidi glepo te theome naba iara te chekedi nei jaola blahi fara te mala toutonudi iara re. Nu iara theome raꞌe laseni jame teke eni tutuani ka thinigu iara na ba neke khogla ka mifi kolho, nu God ngala te laseni na.

⁵ Eghume iara na cheke fahaehaghe ka unha teke eni ka iara na. Nu iara ginauna theome cheke fahaehaghedi kmana glepo teke edi ka nakarhagu na nu iara ginauna cheke fahaehaghedi glepo te falaseni te mae nigra kolho iara na.

⁶ Neuba iara ne cheke fahaehaghe eidi mifi igre, iara theome mae meomekro, naugna iara tangomana te chekedi kolho glepo te tutuani re. Nu iara ginauna theome cheke fahaehaghe, naugna iara theome magnahagheni kaisei naikno te ghatho tahu ghau iara fara uluni unha te eni iara na, ba unha te chekeni iara na.

⁷ Kaisei khabru te thoke ghau iara na jateula kaisei nila eghu ka thinigu iara na. Khabru igne jateula nogna mae gloku Satan te puri ghau iara eghu. Naugna igne iara theome tangomana te fahaehaghe fara eidi glepo biꞌo te fatakle meidi God ka iara gre.

⁸ Iara neke thilo fata toreni Lord mala hata fadelei ka iara puhi biꞌo igne.

⁹ Nu Lord neke cheke eghu ka iara, “Nogu khokofakasai iara igne ngala te nabamu iagho na, naugna kate nigra iagho na, nogu nolaghi iara na heta fara!” Eghume iara gleale'a fara te cheke fahaehaghe eigna nogu nanigra na, eghuteuna nogna nolaghi Kraes na tangomana te au balugu iara na.

¹⁰ Eghume iara gleale'a fara kate papara naugna iara nogna mae Kraes. Tutuani, kate nigra na, kate cheke fadiꞌa ghau na, ba ka vido te ninhigrana ba ka vido te au papara, ba ka thua nafnata hoholo fateo, iara gleale'a fara naugna ka vido igre Kraes tangomana te tusu mei ka iara nogna u nolaghi biꞌo na.

Mae Pol ghathodi fara naikno khiloau ka namono Korin

¹¹ Iara cheke jateula kaisei mae te fameomekro eghu, nu ghotilo huhuru ghau iara mala eni igne. Nabami ghotilo te mala chekedi nogu gloku te keli te edi iara gre. Iara laseni te fiti mae kolho iara na, neuba, iara theome au ke paridi mae iheire te kilodi ghotilo “Hatimare mae khuru keli fara.”

¹² Kate loku ka ghotilo na, iara theome babaꞌo te edi keha fagaglana nei kofubobhoi te mala filoni ghotilo nogna nolaghi God na. Igre glepo teke edi iara re mala laseni ghotilo te thofno mae khuru iara na.

¹³ Eghume iara neke togho ghami ghotilo jateula te edi ka keha khiloaura eghu. Kaisei glepo kolho te theome eni iara ka ghotilo na, iara neke theome tore ka ghotilo mala togho ghau ka sileni. Tore! Jame te ghathoni ghotilo te jafra iara ka igne na, iara tore ghami ghotilo mala hata fadeleidi nakhibogu iara re eigna igne!

¹⁴ Iara gognaro na tarabana mala fatilo ari sigho ghami ghotilo, nu iara na theome toreni kaisei glepo ka ghotilo. Naugna iara magnahaghe ghami kolho ghotilo. Ghotilo laseni, goro suare theome tangomana te mala reireghi idodi nei kmadi teure, nu idodi nei kmadi teure te mala reireghi thudire.

¹⁵ Eghume iara thofno gleale'a fara te tusu ari ranghi ghami gobigna lepo te au ka iara igre nei jaola snakreni thinigu na mala togho ghami ghotilo. Ba, ghotilo ginauna namha faꞌikoi ghau iara kolho, naugna te namha ghami fabiꞌo fara iara gne?

¹⁶ Tutuani, ghotilo laseni eigna iara gne theome hata kaisei glepo ka ghotilo. Nu jame keha naikno chekeni ne chaichaghi ghami nei saosagro ghami neu kolho iara teuna.

¹⁷ Ne faꞌunha? Ba, iara neke chaghi ghami ghotilo ka mae teke kuru ari iara ka ghotilo ra? Theo.

¹⁸ Iara neke toreni mae Taetus mala ari ka ghotilo, eghuteuna iara jaola neke kuru ari kaisei mae thabusigna balugna mana. Ba, mae Taetus neke chaghi ghami ghotilo? Theo! Ghotilo laseni ghepa mae Taetus au kaisei gaoghatho kolho nei leghuni kaisei puhi ngala eghu ka gloku na!

¹⁹ Ba, ne riso ari ghehati glepo igre mala tafra ghami ghehati themi neu si ghotilo ia? Theo! Ghehati chekedi glepo igre ka puhi te magnahagheni Kraes te mala eni ghehati ka tathagna God na. Eghuteuna gobigna lepo te risodi ghehati gre, kheraguro, mala tangomana te farhetadi nomi fatutuani ghotilo re.

²⁰ Eigna iara nanga nogu mala ari posa ka ghotilo, na eghunu jafra ghotilo ka unha te magnahaghei filoni iara ka ghotilo na eghu. Jame te eghu na, iara ginauna jaola na jafra ka unha te magnahagheni ghotilo na. Kate ari posa iara ka ghotilo na, theome keli te filoni iara ke lamnami te magra, goghotu, diꞌatami faghose, ghatho ghami themi kolho, nhagho, buiburi naikno, fahaehaghe, nei theome au fodu.

²¹ Iara nanga nogu fara te mala ari posa ka ghotilo na, naugna theome keli glepo teke edi tifa ra jaola teke edi ghotilo ginauna. Jame te eghu na, God ginauna te famamaja ghau iara eigna unha teke eni ghotilo. Iara ginauna diꞌanagnafagu fara eidi naikno kmana te tapla jafra ka nakhibo teke edi la tifa ra. Tutuani iara ginauna jaola diꞌanagnafagu naugna mare ne tirodi tughu nagnafa ka puhi te gnognoro, eni puhi te diꞌa, nei keha glepo te famamaja ikno.