Fapea Korin 11 - Buka Blahi Ka Cheke Holo

Hatimare mae baubatu chaichaghi ka khiloau Korin

¹ Iara magnahaghe ghami ghotilo te snakre ghau iara te mala cheke jateula mae te meomekro eghu katha vido kmoꞌei. Tutuani, ghotilo la kulu snakre ghau iara te mala eni tuana!

² Uve, iara reireghi ghami ghotilo fara jateula God jaola te reireghi ghami ghotilo, naugna iara la nhaꞌa chekehi te mala snakre lao ghami ghotilo ka Kraes na. Ghotilo mala jateula khupi eghu ka narane tholaghi na, eghuteuna Kraes ngala khetomi ghotilo na.

³ Nu iara nanga nogu fara, glahula baubatu fajafradi mare gaoghathomi ghotilo re mala theome klino nei theome namhani eghu ghotilo Kraes. Glahu jateula mogo teke saosagroni Ivi ka chekegna te chaichaghi ia eghu.

⁴ Naugna ghotilo snakredi naiknore te ari toutonu eigna kaisei Jisas te jafra kate toutonuni ghehati gne. Eghuteuna ghotilo gleale'a te mala nomhini eigna kaisei nafnata tharunga nei kaisei nafnata Nonomho te Keli eghu te jafra ka Tharunga te Blahi nei Nonomho te Keli eghu te hata teke ari ghehati ka ghotilo ia.

⁵ Te ghathoni iara na, mae iheire te kilodi ghotilo “Mae khuru keli fara teu are” theome ulu ghau iara.

⁶ Neuba iara ne theome raꞌe lase cheke fara, nu kau Nonomho te Keli gne glalase na au ka iara. Eghuteuna leuleghu fata na ghehati la falalasehi igne ka ghotilo.

⁷ Iara neke theome toreni kaisei taba ka ghotilo kate toutonuni u Nonomho te Keli nogna God na. Iara au fapari ghau thegu mala tangomana ghotilo te au kligna lahu na. Ba, ne jafra iara eghu si ghotilo ia?

⁸ Kate loku iara ke lamnami ghotilo na keha khiloau ka namono ke kosigna Korin are teke foli ghau iara na, eghume iara jateula te blaudi eghu mare te mala togho ghami ghotilo na.

⁹ Eghuteuna kani teke au iara balumi ghotilo ia iara neke ari neke kmo'e ka glepo, eghuteuna iara neke theome chekeni kaisei naikno ka ghotilo. Hatimare mae thabusigna teke mei funu ka namono Masidonia, mare hata neke mei gobigna lepo teke kmo'edi iara re. Eghume iara neke theome fagloku biꞌo ghami ghotilo ka kaisei glepo tifa na, eghuteuna iara ginauna jaola theome fagloku biꞌo ghami ke leghu na.

¹⁰ Kraes na chekeni koba unha te tutuani na nei iara jaola eni tuana. Eghume te chekeni iara ka ghotilo na, ginauna theo kaisei naikno ka ghotilo te au heva heva ka Provins Akaia tangomana te tughu puhigu iara te cheke fahaehaghe igne.

¹¹ Iara chekeni igne ka ghotilo naugna te theome naba iara te hata nomi tothogho ghotilo na, ba iara ne theome namha ghami ghotilo? Theo! God lase ghau iara te namha ghami fara ghotilo na.

¹² Keha naiknore magnahaghei fara te mala fahaehaghedi thedi nei chekeni koba nodi glokure te kaisei nanaba ka ghehati mae khuru gre teuna. Nu iara magnahaghei te mala fanogradi mare ka igne. Naugna igne, iara leghuni fabrahu kolho puhigu thegu na.

¹³ Mae tuare theome thofno mae khuru tutuani nu mare mae khuru chaichaghi kolho. Hatimare chaghi eidi nodi glokure, eghuteuna mare fariuriu mala jateula nogna mae khuru tutuani Kraes eghu ka gaoghathodi naiknore.

¹⁴ Puhi igre theome mala jaglodi tahati. Eigna mae Satan jaola neke fariuriu mala jateu kaisei engel nogna God eghu.

¹⁵ Eghume theome jaglo noda kate fariuriu nogna mae gloku Satan re te eni kaisei glepo biꞌo te mala jateula mae gloku teu te mala loku eigna unha te doglo na. Nu ka narane leghu lahu na, mae khuru chaichaghi igre ginauna au ka fate nabagna unha teke eni mare na.

Mae khuru Pol neke parani fara

¹⁶ Iara magnahaghei teke fapea chekei, thosei ghathoni te mae meomekro iara na! Nu ihei te ghathoni ne mae meomekro iara teuna, fanomho mei ka iara jame te mae meomekro iara na mala cheke fahaehaghe ghau iara katha vido kmoꞌei ka ghotilo.

¹⁷ Iara theome cheke jateula Lord te magnahaghe ghau iara te mala cheke, nu iara cheke fahaehaghe fara eigna igne eghu. Tutuani, iara cheke jateula mae te meomekro eghu kolho.

¹⁸ Kmana naikno cheke fahaehaghe leghuni kolho gaoghathogna nauthoglu gne, eghume iara tangomana te cheke fahaehaghe jateula tuana teuna.

¹⁹ Ghotilo themi na ne lalase fara eghu ka gaoghathomire, nu ghotilo gleale'a kolho te fanomho ka mae khuru chaichaghi te meomekro are!

²⁰ Tutuani, ghotilo gleale'a kolho ka mare, neuba mare ne huju ghami tafri ba chaichaghi ghami ba saosagro ghami ba filo fapari ghami ba tapo ghami.

²¹ Iara gleale'a eigna te chekeni iara na, ghehati neke theome eni kaisei glepo te diꞌa jateula mare eghu ka ghotilo! Iara frane te mala cheke fahaehaghe ka unha te cheke fahaehagheni mae ihei na, neuba iara ne cheke jateula kaisei mae te fameomekro neu.

²² Mare cheke fahaehaghedi fara te mae Hibru, mae Israel nei vikegna mae Ebraham teuna. Uve, iara jaola tangomana te cheke fahaehaghe ghau jateula mare teuna.

²³ Mare chekeni koba ne nogna mae gloku Kraes teuna, nu iara jaola nogna mae gloku keli Kraes uludi mare eghu. Iara cheke fara jateu kaisei mae te fameomekro eghu tutuani! Iara loku heta ke tulaodi marei. Iara au ka suga sosolo kmana fata ke tulaodi marei. Naiknore puri ghau ke tulaodi marei. Iara namo lehe kmana fata ke tulaodi marei.

²⁴ Glima fata hatimare mae biꞌodi Jiu mare puri ghau iara ka phukri biꞌo ghilei thokeni tolufulu nhevai.

²⁵ Hatimare mae biꞌodi Rom thilo fata puri ghau iara ka khodo. Kaisei fata naiknore fariuriu mala fada falehe ghau iara ka thina. Thilo fata ghehati ghorho ka vaka, eghuteuna kaisei fata iara tao lamna nhorora kaisei narane nei kaisei bongi.

²⁶ Kmana fata ka nogu thei na, iara namo lehe ka khoꞌu biꞌo ba ka naikno te blau, ka kheragu fofodu mae Jiu, nei ka iheire te theome Jiu. Iara namo lehe ka namono biꞌo, nei ka namhata, nei ka thongna. Eghuteuna iara namo lehe ka iheire te chekeni “Ghehati naikno khiloau” nu mare chaichaghi kolho.

²⁷ Iara theome thuru ka gloku biꞌo nei nakmusa. Eghuteuna kmana fata iara rofo nei roi koꞌu. Kmana fata iara dangna nei reka nei theo pohe.

^28-29 Leuleghu narane na iara nangadi fara khiloau te gnafa gre. Kate nigra ihei na, iara jaola nigra. Eghuteuna kate tapla jafra ihei ka nakhibo na, iara thono diꞌa nagnafagu fara. Eghuteuna, kmana glepo te theome chekedi iara re eidi puhigu iara!

³⁰ Jame te cheke fahaehaghe iara gognaro na, iara ginauna cheke fahaehaghe eidi kolho glepo te falaseni te nigra iara na.

³¹ God nei Kmagna noda Lord Jisas Kraes laseni te theome chaichaghi iara na. Tahati cheke fakelini nanghagna mana na tifa tifa!

³² Kate au iara ka namono Damaskas na, mae te gavana ke parigna King Aretas mana magnahaghei te loki ghau iara. Aonu mana ne lilisei mae soldia faligohoni namono biꞌo na.

³³ Nu keha mae khiloau togho ghau iara. Mare ne lilisei ghau lamna khara'o ne farurhu soru khara'o na ka widagna bara biꞌo teke faligohoni namono na mala rikha iara.