Fapea Korin 10 - Buka Blahi Ka Cheke Holo

Pol thofno mae khuru

¹ Keha naikno ka ghotilo cheke eghu, “Kate au teu delei na mae Pol gne cheke faheta fara ka tahati, nu kate mei agne na mana mhaghu te cheke fabiꞌo na!” Fanomho ka iara. Uve, Kraes na mae keli, eghuteuna mana theome ghosei diꞌatagna. Iara leghuni puhigna mana na. Eghume te chekeni iara ka ghotilo na,

² ghotilo thosei huhuru ghau iara mala cheke faheta ka ghotilo hui kate ari posa iara na. Nu iara ginauna cheke faheta ka iheire ne leghuni kolho ghehati puhigna nauthoglu na teuna.

³ Ghehati au ka nauthoglu igne, nu ghehati theome magnahaghei leghuni puhigna naikno te au ka nauthoglu gne ka nomi magra balugna mae Satan.

⁴ Glepo mala magra te hata ghehati gre theome nogna nauthoglu igne. Theo. Nu glepo neke mei funu ka God te au nolaghi biꞌo te mala tangomana ghehati te tapla sorudi nogna gloku mae Satan re. Eghume ghehati tangomana te tapla sorudi thua nafnata gaoghatho te theome tutuani.

⁵ Eghuteuna ghehati tangomana te tapla sorudi thua nafnata cheke fahaehaghe te edi naiknore eigna thofno glalase nogna God. Ghehati fariuriu mala tuthughu gaoghathodi naiknore, mala thofno leghuni Kraes.

⁶ Kate laseni ghehati te thofno leghuni ghotilo Kraes na, ghehati ginauna kaikaliti mala fateni ihei te tirogna leghuni mana.

⁷ Ghotilo mala filoni unha te ulu! Ihei te chekeni ne nogna Kraes teuna, mana mala ke ghaoghathoni, eigna ghehati jateula mana eghu nogna Kraes.

⁸ Tutuani fara, Lord neke tusu mei ka ghehati u nolaghi te mala mae khuru na. Nu mana neke tusu mei ka ghehati nolaghi igne mala farerheta ghami ghotilo, theome mala goigoni ghami ghotilo. Eghume iara theome mamaja te cheke fahaehagheni fara u nolaghi igne.

⁹ Tutuani, iara theome magnahaghe ghami te ghatho ghau iara kaisei mae te mala famhaghu ghami ghotilo ka nogu letas re.

¹⁰ Kaisei naikno jame cheke eghu, “Mae Pol gne nogna letas re nolaghi fara. Nu kate au baluda tahati na mana theome nheta, eghuteuna nogna cheke mana re theo nafudi kolho!”

¹¹ Ghehati gognaro na theome au balumi ghotilo jare, eghume ghehati chekedi glepo igre ka letas kolho. Nu kate au ghehati balumi ghotilo na, ghehati jaola falalase ka ghotilo u nolaghi te filonihi ghotilo ka letas na igre. Nafnata naikno te cheke fadiꞌa ghami ghehati igre, jame theome laseni kolho unha te eni ghehati na doglo gna na.

¹² Naikno te ghatho tahudi fara thedi igre, mare noli fara kolho! Eghu jame te tutuani mare te keli te ulu ghau iara na, aonu ghehati theome nabami te chekeni ne kaisei nanaba ka mare teuna ba ne keli uludi mare teuna. Nu tuana theome tutuani. Theo fara! Naugna mare ghathodi kolho vetula te mala fatedi puhidi thedire kolho eghuteuna jaola leghudi kolho nodi vetula thedire.

¹³ Nu ghehati theome fahaehaghe eidi glepo ke kosigna gloku mala eni ghehati teku na. Ghehati fahaehagheni kolho u gloku teke tusu ranghi ghami God na mala togho ghami ghotilo.

¹⁴ Jame te theome ari posa ka ghotilo na, ghehati salaꞌui fara nomi fahaehaghe na. Nu theo eghu. Naugna ghehati neke ari ka ghotilo balu Nonomho te Keli nogna Kraes.

¹⁵ Ghehati fahaehaghe salaꞌui ka nomi gloku na kolho. Ghehati theome magnahaghe te fahaehaghe ka gloku tela edihi keha naiknore. Nu te rouronu ghehati na ghotilo ginauna kotu leuleghu fata ka nomi fatutuani na nei ghotilo ginauna toghoni nomi gloku ghehati gne mala kotu e biꞌo.

¹⁶ Naugna ke leghugna na, ghehati magnahaghei te ari toutonuni u Nonomho te Keli na ka nohi ka keha philegna namono biꞌo te au ghotilo ana. Naugna ghehati theome magnahaghei te cheke fahaehaghedi gloku tela kulu edihi keha naiknore.

¹⁷ Grioriso te blahi ne cheke eghu, “Mae ihei te cheke fahaehaghe na, mana mala cheke fahaehagheni kolho unha te eni Lord na.”

¹⁸ Eigna mae ihei Lord te ghatho tahuni na, mana ngala te magnahagheni God na, theome mae ihei te ghatho tahuni thegna na.