Fapea Korin 1 - Buka Blahi Ka Cheke Holo

¹ Iara mae Pol. God neke vahi ghau iara mala nogna khuru mae Jisas Kraes. Ghepa mae kherada Timoti te riso ari letas igne ka ghotilo naikno khiloau te au Korin nei ka keha namono ke lamnagna Provins Akaia.

² Iara toreni nogna khokofakasai nei pharikeli God Kmada nei nogna mae Jisas Kraes noda Lord te mala au balumi.

Mae Pol cheke fakelini God

³ Tahati mala cheke fakelini God nei Kmagna noda Lord Jisas Kraes! Mae ihei te kokhonidi nei tarabana mala toghodi teu naikno te gnafare.

⁴ Mana togho ghami ghehati ka thua hoholo, mala nabami te toghodi keha naiknore te au ka thua hoholo, jateula God te togho ghami ghehati gne eghu.

⁵ Ghehati au papara ka kmana puhi jateula Kraes eghu, eghuteuna God neke tusu ranghi ghami nogna thotogho biꞌo fara eigna ghehati nogna Kraes.

⁶ Eghuteuna God togho ghami ghehati kate au papara eimi ghotilo na. Kate togho ghami ghehati God na, mana jaola farerheta ghami nei togho ghami ghotilo mala hatini u thofno karha na, neuba ghotilo ne papara jateula te eni ghehati gognaro gne neu.

⁷ Ghehati thono lase fakelini eigna ghotilo papara balumi ghehati, God ginauna togho ghami jateula te eni mana ka ghehati gne eghu.

^8-9 Kheraguro, ghehati magnahaghe ghami ghotilo te lase fakelini eigna unha teke eni ranghi ghami ka Provins Esia. U puhi igre ninhigrana fara ranghi ghami ghehati. Tutuani fara, ghehati neke cheke eghu fari themi, “Tahati gne namo lehehi!” Nu puhi te eni igne theome mala rouronu ghami themi, nu mala rouronuni God ngala ihei te fakarha fapulodi iheire tela lehehira.

¹⁰ God neke fakarha ghami ghehati kate namo lehe na, eghuteuna mana jaola ginauna nake fakarha ghami ghehati ke leghu na. Ghehati fatutuani ni fara igne eigna mana na fakarha ghami ghehati fabrahu,

¹¹ naugna ghotilo togho ghami koba ka nomi tharaire. God ginauna nomhidi nodi tharai naikno te kmanare malami ghehati eghuteuna mana ginauna togho ghami ghehati. Aonu kmana naikno ginauna cheke fakelini God kate togho ghami ghehati mana na!

Mae Pol neke tughu nogna thei na

¹² Igne unha te fahaehagheni nei thofno laseni teu ghehati ka nagnafamire, eigna ghehati theome leghuni nogna glalase naikno na kate edi gobigna lepore ka nakarhamire. Theo. Tutuani, naugna God tusu mei u khokofakasai ranghi ghami, ghehati leghuni kolho puhi te doglo te magnahagheni God na nei ghehati cheke tutuani koba. Leuleghu fata ka nakarhami kani au teku balumi ghotilo na, ghehati neke eni fara igne.

^13-14 Ghehati theome neke rioriso ari ka ghotilo glepo te ninhigrana, nu ka glepo te bligi te tangomana ghotilo te laseni teu iu'iju gna na. Neuba ghotilo ne theome thofno lase fakeli eimi ghehati neu, ghehati ghathoni eigna ghotilo ginauna thofno lasedi gobigna lepore eimi ghehati. Eghume kate pulo meigna noda Lord Jisas na, ghotilo ginauna tangomana te fahaehaghe ghami ka ghehati jateula ghehati ginauna tangomana te fahaehaghe ghami ghotilo.

¹⁵ Iara neke magnahagheni fara te kulu ari filo ghami ghotilo tifa na naugna iara thofno fatutuani ghami ghotilo te lase ghau iara te loku fadoglo ke ulumi. Tutuani, iara neke ghathoni kate filo ghau iara na ghotilo tangomana te phei fata gleale'a na.

¹⁶ Uve, kate ghathoni iara te mala ari ka Provins Masidonia na, iara neke magnahaghei te filo ghami ghotilo ka nogu thei na. Eghuteuna iara neke ghaoghatho mala fapea filo ghami ka teke pulo meigu na. Ka narane tuana iara neke ghatho ghami ghotilo te togho ghau mala tei thoke iara Judia.

¹⁷ Ba, kate tughu iara gaoghathogu na ne cheke kolho iara naugna ne theome leghuni unha teke kulu ghathoni iara na neu si ghotilo ia? Theo, iara theome edi gaoghatho igre mala leghudi kolho unha te magnahaghedi thegure, nei iara theome nafnata naikno te kaisei fata chekedi ngala “Uve” ghe “Theo” gne.

¹⁸ God na cheke tutuani koba eghuteuna iara jaola chekeni unha te tutuani ka ghotilo. Eghume nogu nhaꞌa cheke iara ka ghotilo na theome kaisei “Uve” nei theome kaisei “Theo” eghu kaisei fata ngala.

¹⁹ Tutuani, iara baludi mae Silas ghe mae Timoti neke toutonu eigna mae Jisas Kraes Thugna God. Eigna mae Jisas na neke theome nafnata naikno te kaisei fata chekedi ngala “Uve” ghe “Theo” gre. Theo, nu mana chekeni koba unha te tutuani na.

²⁰ Nogna nhaꞌa cheke te gnafa God re tutuani ka mae Jisas. Naugna igne tahati chekei “Amen” ka nanghagna mana mala cheke fakelini God.

²¹ God thegna te togho ghami ghotilo nei togho ghami ghehati teu te mala au rheta noda fatutuani na ka Kraes. God thegna neke vahi ghita mala nogna naikno mana.

²² Mana neke lilisei nogna fagaglana na ka tahati mala laseni te nogna mana na. Eghuteuna lilisei ke lamnada nogna Tharunga te Blahi na mala laseni nogna nhaꞌa cheke mana re ginauna mei tutuani ka tahati.

²³ God laseni unha te chekeni iara ka ghotilo igne thofno tutuani fara, naugna mana thofno laseni nagnafagu iara na. Tutuani, iara theome ariu ka ghotilo Korin, naugna iara theome magnahaghei te para ghami ghotilo na.

²⁴ Ghehati theome magnahagheni te sagheleghudi nomi fatutuani ghotilo re, naugna ghehati lase ghami ghotilo tela kegra hetahi ka nomi fatutuani na ka God. Nu ghehati magnahagheni te loku balumi ghotilo mala tangomana ghotilo te gleale'a na.