Fapea Kings 8 - Buka Blahi Ka Cheke Holo

Naikno biꞌo gna Sunem neke pulo mei ka nogna namono na

¹ Tifa na, mae Elisa neke cheke eghu ka naikno biꞌo gna Sunem teke lehe thugna na, eghuteuna ke fakarha fapulo mae profet teku ia, “Te chekeni Lord na heva heva agne Israel na ginauna theo gano nabagna fitu finogha. Eghume te keli na iagho balugna tharaknamu na jifla ka vido igne mala tei au ka keha kantri delei.”

² Aonu naikno biꞌo igne ne leghuni nogna cheke mae profet igne ne jifla balugna nogna tharakna na ne tei au ka kantri Filistia nabagna fitu finogha.

³ Kate gnafadi fitu finogha igre, naꞌa neke pulo mei funu Filistia, eghuteuna naꞌa tei ka king ne toredi nogna vido glose nei nogna suga teure.

⁴ Eghuteuna ka narane tuana, king ne cheke balugna Gehasi nogna mae gloku mae Elisa. King magnahaghei te nomhidi thoutonu eidi kofubobhoi teke edi mana re.

⁵ Kate toutonu teu mae Gehasi ka king eigna mae Elisa teke fakarha fapuloni mae teke lehe na, idogna mae sitei teke lehe igne mei ne toredi nogna vido glose nei nogna suga teu igre ka king. Gehasi ne cheke eghu, “King, nogu funei, igne ngala naikno biꞌo tuao, eghuteuna igne ngala mae thugna naꞌa mae ihei teke fakarha fapulo mae Elisa na!”

⁶ Eghuteuna king ne ghusnani naikno biꞌo na eigna igne, eghuteuna naꞌa ne toutonu ranghini mana. Aonu king ne lisa lao ka nogna mae biꞌo na nogna puhi naikno biꞌo igne, ne cheke eghu ka mana, “Iagho ke tusu fapulo gobigna lepo teke nogna naꞌa ra, baludi nogna sileni teke hata iagho ka gano ka nogna vido glose naꞌa tifa ra funu ka narane teke jifla naꞌa ka kantri igne te ghilei mei posa ka narane gognarogne.”

Profet Elisa ghe King Ben-Hadad maegna Siria

⁷ Profet Elisa ne tei ka namono biꞌo Damaskas ka kantri Siria, eghuteuna mae Ben-Hadad king gna Siria igne ne fogra. Eghuteuna mare ne cheke eghu ka king, “Elisa mae nogna God na la mei agne Damaskas.”

⁸ Aonu king ne cheke eghu ka mae Hasael nogna mae gloku na, “Hata kaisei namha balumu tei thafoni mae nogna mae gloku God. Eghuteuna iagho toreni mana mala ghusna eghu ka Lord, ‘Ba, king gna Siria nake keli fapulo ka fogra igne ba theo?’ ”

⁹ Aonu mae Hasael hata balugna phiatutu kamel te fodu ka famane glepo di Damaskas ne tei thafoni mae Elisa. Mana tei ne kegra ke ulugna mae Elisa ne cheke eghu, “Thumu Ben-Hadad king gna Siria neke kuru mei ghau iara mala ghusna nigho iagho, mana nake keli fapulou ka fogra igne ba theo?”

¹⁰ Mae Elisa ne cheke eghu, “Iagho tei cheke eghu ka mana, ‘Uve, iagho ginauna nake keli fapulou.’ Nu Lord fakakhana hi ka iara mana ginauna lehe.”

¹¹ Mae Elisa ne filo tutu ka mae Hasael ne ghilei mamaja nogna mana. Eghuteuna mae Elisa ne funu tanhi.

¹² Eghuteuna mae Hasael ne ghusna eghu, “Mae biꞌo, naugna unha site tanhi iagho gnea?” Mae Elisa ne cheke eghu, “Naugna iara laseni unha nate eni iagho ka ghehati agne Israel. Iagho ginauna gnubra nomi vido mala poru ghehati gre. Eghuteuna iagho ginauna aknu falehe nomi famane mae majaghani gre ka magra, eghuteuna iagho ginauna fada ruaruja sua gegeꞌe gre ka thina. Eghuteuna goro gaꞌase te bukla gre iagho ginauna vahe thiꞌadire.”

¹³ Nu mae Hasael ne cheke eghu, “Iara jateula khuma eghu kolho! Faꞌunha eghu edi iara glepo igre?” Mae Elisa ne cheke eghu, “Lord neke fakakhanahi ka iara iagho nate king gna Siria.”

¹⁴ Aonu mae Hasael jifla jare neke pulo ka nogna funei na. Eghuteuna king Ben-Hadad ne ghusna eghu, “Unha te chekeni mae Elisa ka iagho?” Mae Hasael ne cheke eghu, “Te chekeni mana ka iara na, iagho ginauna nake keli fapulou.”

¹⁵ Nu ka keha narane na, mae Hasael hata kaisei blanket thuta ne fabobothu ka khoꞌu, eghuteuna toku tafru tathagna nei foflogna teu king re, mala lehe mana. Aonu mae Hasael neke kegra king tughuni mana mala king gna Siria.

Mae Jehoram king gna Juda

¹⁶ Ka falima finogha mae Joram thugna King Ehab te king Israel, mae Jehoram thugna King Jehosafat ne funu funei fruni Juda.

¹⁷ Ka narane tuana, mana thokeni tolufulu phei finogha gna, eghuteuna mana ne king Jerusalem nhana finogha.

¹⁸ Nu mae Jehoram ne leghuni puhigna mae king Ehab te diꞌa na baludi keha mae king di Israel tifa ra, naugna mana neke tolaghi ka kaisei thugna gaꞌase King Ehab. Mana eni unha te diꞌa ka tathagna Lord.

¹⁹ Nu Lord neke theome goigonidi naiknodi Juda, naugna mana neke eni kaisei nhaꞌa cheke ka nogna mae gloku, king Devet tifa. Mana neke nhaꞌa cheke keha ka vikegna mae Devet igre mala king fabrahu Juda, jateula kaisei juta eghu mala agha fabrahu.

²⁰ Ka narane te king mae Jehoram tuare, naiknodi Idom igre ne theome magnahagheni king gna Juda te funei frunidi. Aonu mare ne magra ka naiknodi Juda igre ne vahini kaisei nodi king thedi.

²¹ Aonu king Jehoram ne tei Saia balu nogna chariot. Nu armi gna Idom na mei ne kegra faligohoni namono igne. King Jehoram baludi mae komanda di chariot igre jifla bongiro ne magra ka armi gna Idom, nu nogna armi mana na rikha neke pulo ka namonodi re.

²² Funu ka narane igne, naiknodi Idom magnahaghei te kegra sopa mala au fadelei ka naiknodi Juda. Eghuteuna mare au eghu ngala ghilei mei posa ka narane gognarogne. Eghuteuna naiknodi Libna gre jaola theome magnahagheni king gna Juda te funei frunidi re.

²³ Keha glepo teke edi king Jehoram re, mare neke rioriso soru ka Buka Eidi Glepo Teke Edi Hatimare Mae King di Juda.

²⁴ Kate lehe mae Jehoram na, mare ne giugiluni mana ka bekudi mae king tifa ka namonogna King Devet. Eghuteuna mae Ahasaea thugna mana na neke king tughuni mana.

King Ahasaea gna Juda

²⁵ Ka fabotho phea finogha king Joram thugna king Ehab, mana neke king Israel, eghuteuna mae Ahasaea thugna king Jehoram neke king Juda.

²⁶ Ka narane tuare, mana neke thokeni varadaki phei finogha, eghuteuna mana neke king Jerusalem kaisei finogha kolho. Idogna mana na, Atalaea thugna king Ehab, gragna King Omri mae ihei teke king Israel tifa.

²⁷ Eghuteuna, naugna te tolaghi mana ka kaisei gaꞌase ka tharakna gna king Ehab, mana jaola ne khibo ranghini Lord, eghuteuna mana ne leghuni puhidi vikegna King Ehab te diꞌa ra.

²⁸ Kaisei fata, mae Ahasaea neke tei balugna King Joram gna Israel mala magra ka King Hasael gna Siria. Mare magra rhegna namono Ramot-Gilead. Ka magra igne, King Joram ne ghoreho.

²⁹ Aonu mana figri neke pulo ka namono Jesrel. Mana ne au kmu ka namono mala ke ghaota fapulo. Ke leghu, King Ahasaea gna Juda mei ne sighoni King Joram gna Israel naugna mana neke ghoreho ka magra.