Fapea Kings 4 - Buka Blahi Ka Cheke Holo

Profet Elisa ne toghoni kaisei glehe kokoi te kuma

¹ Kaisei narane, khetogna kaisei mae ka tothoghei mae profet tifa igre mei ne tanhi eghu ka mae Elisa, “Khetogu iara na la lehehi. Iagho laseni, mana neke jateula kaisei nou mae gloku iagho neku, eghuteuna mana neke ghatho tahuni Lord. Tifa na mana neke kaoni ka kaisei mae, eghuteuna gognarona mae igne magnahaghei te mei hata phei thugu nalhaꞌu iara gre mala nogna sneka.”

² Aonu mae Elisa nomhini cheke igne ne ghusna eghu ka naꞌa, “Faꞌunha eghu tangomana iara nate togho nigho iagho na? Cheke meini unha te au ka sugamu iagho na.” Naikno biꞌo igne ne cheke eghu, “Iara theo kaisei glepo, nu kaisei botol oliv oel ikoi kolho te au na.”

³ Aonu mae Elisa ne cheke eghu ka naꞌa, “Iagho tei filodi iheire te au rhemu iagho ra, eghuteuna iagho tore kmana khune botol ka mare mala kulu hata ghu.

⁴ Eghuteuna iagho baludi phei mae thumu re, ghotilo ruma lamna suga eghuteuna bobotho suga na, aonu ghotilo totoho oel igne ka botol tuare. Kate fodu kaisei botol na, iagho lilisei ka vido mala tathaji gna na, eghuteuna iagho ke fafodu keha na eghu ghilei gnafa botol tuare.”

⁵ Aonu naikno biꞌo igne baludi phei thugna re nomhi igne ne tei lamna suga ne bobotho grengatha na. Phei mae sitei igre hata ne mei khune botol igre ka naꞌa. Naꞌa hata oel igne ne funu toho lao ka botol igre.

⁶ Kate kafe fodu te gnafahi botol igre na, naꞌa ne cheke eghu, “Hata mei keha botol.” Nu kaisei mae thugna naꞌa ne cheke eghu ka idogna na, “Tuana ngala leghu lahu na.” Aonu oel igne ne theome loloro soru.

⁷ Aonu naikno biꞌo igne tei neke filoni mae profet Elisa. Eghuteuna mae Elisa ne cheke eghu ka naꞌa, “Iagho tei fofoli oel, mala tei foli falehe nogna kaoni khetomu na. Eghuteuna niha sileni te salaꞌu na, iagho tangomana te foli gano malami ghotilo tharakna na.”

Profet Elisa ne toghoni naikno biꞌo gna Sunem

⁸ Kaisei narane, profet Elisa ne tei ka namono Sunem. Eghuteuna ka namono igne na au kaisei naikno biꞌo te dedei. Naꞌa ne kiloni mae profet mala tei ghamu baludi repa khetogna. Funu ka narane tuana, kate tei mana Sunem na, mana tei ghamu koba ka sugadi repa na.

⁹ Kaisei fata naikno biꞌo igne ne cheke eghu ka khetogna na, “Iara thofno laseni, mae te mei ghamu koba baluda tapa igne kaisei mae blahi nogna God.

¹⁰ Unha te ghathoni iara na, tapa na eni kaisei chogho mala thuru mana. Eghuteuna lilisei sape nei tevo nei chea nei juta eghu tagna. Eghuteuna kate mei mana te sigho ghita na, mana ginauna mei au ka chogho tuana.”

¹¹ Kaisei narane, mae Elisa neke mei Sunem, eghuteuna mana haghe ne gnafa ka chogho igne.

¹² Mana ne kuruni mae Gehasi, nogna mae gloku na mala kilo meini naikno biꞌo igne. Aonu naꞌa mei ne kegra ke kosi chogho.

¹³ Aonu mae Elisa ne chekeni mae Gehasi mala tei ghusna eghu ka naikno biꞌo na, “Iagho loku heta fara te mala togho ghami ghepa na. Unha ghepa tangomana te togho nigho na? Ba, ghepa tangomana te tei filoni king ba mae komanda gna armi mala eni mare kaisei glepo te keli ranghi nigho iagho?” Nu naikno biꞌo igne ne cheke eghu, “Keliu ngala. Iara au fabrahu baludi kheragu gre ka namono igne.”

¹⁴ Nu ke leghu, mae Elisa mei ne cheke eghu ka mae Gehasi, “Nu unha nate eni iara te mala toghoni naꞌa na?” Mae Gehasi ne cheke eghu, “Iagho laseni, naikno biꞌo igne theo thugna, eghuteuna khetogna na la mae biꞌohi eghu.”

¹⁵ Mae Elisa ne cheke eghu ka mae Gehasi, “Chekeni naꞌa mei.” Aonu mae Gehasi tei ne cheke ka naꞌa, eghuteuna naꞌa mei ne kegra ka grengatha na.

¹⁶ Eghuteuna mae Elisa ne cheke eghu ka naꞌa, “Jateula gognarogne teu ka finogha te mei gne, iagho ginauna au kaisei thumu nalhaꞌu.” Nu naikno biꞌo igne ne cheke eghu, “Mae biꞌo! Iagho mae nogna mae gloku God, thosei chaghi ghau iara!”

¹⁷ Nu naikno biꞌo igne ginauna na bukla, eghuteuna ka nhigra tuanala ka finogha ke leghu na, naꞌa ne karha kaisei thugna nalhaꞌu jateula teke chekeni mae Elisa na neu.

¹⁸ Keha finogha ke leghu kate biꞌo haghe mae sitei igne, mae kmagna na baludi mae glokure ne tei kato wit ka nagare na. Mae sitei igne tei ka nagare na mala filoni mae kmagna na.

¹⁹ Mae sitei igne filo neu ka mae te lokure, aonu mana megei nga ne tanhi eghu fabiꞌo, “Ei, mama iara kabru fara phaꞌugu na! Phaꞌugu na kabru fara!” Mae kmagna na ne cheke eghu ka kaisei mae gloku, “Iagho hata mae sitei igne tei ka idogna na.”

²⁰ Aonu mae gloku igne papa mae sitei igne ne tei ka idogna na. Mae sitei igne thuru neu ka boebokegna idogna na ne ghilei aublatha, eghuteuna mae sitei igne ne lehe.

²¹ Kate lehe thugna na, idogna na pala thinigna mae sitei na ne haghe ka nogna chogho mae Elisa na ne fathuru soru ka sape na, eigna mae Elisa dofini jare. Aonu naꞌa jifla kosi ne bobotho grengatha na.

²² Eghuteuna naꞌa ehani khetogna na ne cheke eghu, “Iagho kuru meini kaisei mae gloku balugna kaisei dongki. Naugna iara magnahaghei te ghosei te tei filoni mae profet. Eghuteuna iara ginauna theome raugha nake pulo mei.”

²³ Nu mae khetogna na ne cheke eghu ka naꞌa, “Naugna unha sagho te magnahaghei tei ngala gognaro gnea? Theome narane Sabat, nei theome narane khafa la ngau eghu.” Naikno biꞌo igne ne cheke eghu, “Thosei nanga nou. Keliu kolho!”

²⁴ Naꞌa saghe ka dongki na ne cheke eghu ka mae gloku na, “Faghose ari, thosei paipalighi, ghilei cheke ranghi nigho iara.”

²⁵ Aonu repa ne tei filoni profet Elisa ka Thogele Kamel. Nu kate mei khaba teu naꞌa na, mae Elisa ne filo teinihi naꞌa ne cheke eghu ka mae Gehasi nogna mae gloku na, “Filo sagho! Naikno biꞌogna Sunem tela mei ana.

²⁶ Faghose tei thafoni naꞌa, eghuteuna iagho ginauna ghusna eghu ka naꞌa, ‘Iagho keliu kolho? Khetomu thumu teu iagho ra ba, keliu kolho ba theo?’ ” Kate ghusna eghu mana na, naikno biꞌo na ne cheke eghu, “Ghetilo keliu kolho.”

²⁷ Nu kate mei naꞌa ka mae Elisa ka thogele na, naꞌa turupuku soru ne loku ka ghahegna mae Elisa na. Mae Gehasi filoni te eni naꞌa igne ne magnahaghei huju fadeleini naꞌa. Nu mae Elisa ne cheke eghu ka mae Gehasi, “Lisani naꞌa. Iara laseni, naꞌa au diꞌanagnafa fara. Nu Lord ne theome chekeni ka iara nogna diꞌanagnafa naꞌa na.”

²⁸ Aonu naikno biꞌo igne ne tanhi ne cheke eghu, “Funei, ka chekemu iagho kolho, God neke tusu mei sua igne ka iara. Iara neke theome toreni ka iagho. Nu iara neke cheke eghu ka iagho, ‘Thosei chaghi ghau iara.’ ”

²⁹ Mae Elisa nomhini cheke igne, ne cheke eghu ka mae Gehasi, “Iagho tarabana mala tei. Hata nogu khodo iara na, eghuteuna faghose tei Sunem. Jame te thafoni iagho kaisei mae ka nabrou na, iagho thosei kegra snoto mala hamerane keli eghu ka mana. Iagho doglo tei ka sugagna naikno biꞌo ia, eghuteuna iagho hata nogu khodo iara gne lisei lao ke klignadi tathagna nei foflogna teu mae sitei na.”

³⁰ Nu naikno biꞌo na ne cheke eghu ka mae Elisa, “Ka nanghagna Lord mae ihei te karha te tifa, jame te theome mei iagho balugu iara na, iara ginauna theome tangomana teke pulo na.” Aonu mae Elisa ne tei balugna naꞌa.

³¹ Mae Gehasi ne kulu tei ne nhaꞌa lao nogna khodo mae Elisa na ke klignadi tathagna nei foflogna teu mae sitei na, nu mae sitei igne ne theome vese ba ne theome kaplo. Aonu, mae Gehasi pulo neke tei thafoni mae Elisa ne cheke eghu ka mana, “Iara ne leghuni unha teke chekeni iagho ia, nu mae sitei na ne theome kegra haghe kolho.”

³² Kate posa mae Elisa ka suga na, mana ne filoni mae sitei igne lehe thuru neu ka sape na.

³³ Aonu mana ruma ka chogho na ne bobotho grengatha na. Eghuteuna mana ne tarai ka Lord.

³⁴ Mana thuru ke kligna gna mae sitei igne, eghuteuna mana ne nhaꞌa lao foflogna na ka foflogna mae sitei na, eghuteuna tathagna re ka tathagna mae sitei na, eghuteuna khamegna re ka khamegna mae sitei na. Kate eghu mae Elisa igne, thinigna mae sitei na neke funu brana.

³⁵ Mae Elisa kegra haghe neke nolo tafri lamna chogho, eghuteuna mana neke pulo neke thuru ke kligna gna mae sitei na. Eghuteuna mae sitei igne ne megei nga ne chihe fitu fata, aonu phei tathagnare ne thora!

³⁶ Mae Elisa ehani mae Gehasi, ne cheke eghu ka mana, “Iagho eha meini naikno biꞌogna Sunem ia.” Aonu mae Gehasi ne eha meini naꞌa. Kate mei naikno biꞌo igne na, mae Elisa ne cheke eghu ka naꞌa, “Iagho mei hata thumu gne.”

³⁷ Aonu naikno biꞌo igne ne turupuku soru ka ghahegna mae Elisa re, eghuteuna tathagna nei foflogna teure ne tei thoke ka glose na. Gnafa teuna, naꞌa hata thugna na ne jifla ka suga na.

Mae Elisa eni gano te diꞌa na neke famane keli

³⁸ Kaisei fata, narane te theo gano na ne thoke mei ka kantri Israel. Eghuteuna naiknore ne theome naba ghedi gano. Eghuteuna ka narane igre mae Elisa neke pulo Gilgal. Kaisei narane keha mae profet mei ne thafoni mana jare, eghuteuna mare gnokro soru ne fanomho ka mana. Mana ne chekeni kaisei nogna mae gloku mala nhaꞌa lao suspen biꞌo na ka khaꞌaghi na mala gahu susupu maladi hatimare mae profet.

³⁹ Aonu kaisei mae profet tei mata ne hiro khuromu mala nhaꞌa lao ka susupu na. Eghuteuna mana tei ne filoni kaisei gnarho te au kmana sisigna. Mana hata sisi igre duduki ka pohe na, eghuteuna vuivuri lao ka suspen biꞌo na. Nu theo kaisei mae ka mare te laseni ne poesen sisigna gnarho igne teuna.

⁴⁰ Mare kuki hata ne mei mala ghamu hatimare mae profet igre. Kate ghamu na, mare ne haimini te raha na, aonu mare ne eha eghu ka mae Elisa, “Ei, profet nogna God, susupu igne diꞌa! Poesen signe!” Aonu mare ne theome ghamuni kolho susupu igne.

⁴¹ Aonu mae Elisa ne cheke eghu ka mae te kuki gre, “Ghotilo hata mei keha flaoa.” Aonu mae Elisa hata flaoa igne ne tofa lao ka susupu na. Eghuteuna mana ne cheke eghu ka nogna mae glokure, “Ghotilo krisu ka tapera susupu ana mala ke ghamu hatimare mae profet ra.” Eghuteuna kate ghamu mare na, susupu igne neke theome raha ka mare.

Mae Elisa ne faghamudi kaisei gobi mae

⁴² Kaisei fata ke leghudi igre, kaisei mae jifla ka namono Baal-Salisa hata ne mei varadaki bret balu keha bali. Bret igne eni ka bali te saro ulu ka nagare are. Mana hata ne tei gano igre ka mae Elisa. Aonu profet Elisa ne cheke eghu ka nogna mae gloku na, “Hata tei gano igre ka hatimare mae profet ra mala ghamu mare.”

⁴³ Nu nogna mae gloku mana igne ne cheke eghu, “Gano igne thono ikoi fara, theome nabadi kaisei gobi mae profet igre.” Nu mae Elisa ne cheke eghu, “Hata tei sagho mala ghamu mare, naugna Lord na neke cheke eghu, ‘Mare ginauna ghamu boho, eghuteuna kehare ginauna salaꞌui u ngala.’ ”

⁴⁴ Aonu nogna mae gloku mana igne ne salao gano igre ka mare. Mare ghamu ne boho, nu keha ka gano igre ne salaꞌui jateula teke chekeni Lord na neu.