Fapea Kings 3 - Buka Blahi Ka Cheke Holo

Naiknodi Israel tei ne magra ka naiknodi Moab

¹ Ka nabotho nhana finogha te king mae Jehosafat ka kantri Juda, mae Joram thugna King Ehab igne ne king gna Israel. Eghuteuna mana neke king ka namono Samaria nabagna nabotho phei finogha.

² Mae Joram ne eni puhi te diꞌa na ka tathagna Lord, nu mana ne theome jateula kmagna ghe idogna tifa ra neu. Naugna mana neke pa'e soru mumujugna god Baal teke eni kmagna na.

³ Neuba, mana leghuni puhigna King Jeroboam, thugna Nebat te diꞌa tifa ia neke batudi naiknodi Israel ka nakhibo.

⁴ Ka narane igne, King Mesa ka kantri Moab au nogna kmana sipu. Mana baludi nogna naiknore au ke parigna mae king gna Israel, aonu mare tangomana te hata te tei kaisei gobi thogha sipu ikodi nei khakla teke kuchi ka kaisei gobi thogha sipu nalhaꞌudi igre neu ne tusu ranghini King Ehab gna Israel, jateu te foli takis mare na.

⁵ Nu ke leghugna te lehe King Ehab igne, King Mesa ne tirogna fanomho ka king majaghani King Joram gna Israel na ne tirogna foli takis ka mana.

⁶ Aonu King Joram laseni igne ne ghosei ne jifla Samaria, eghuteuna mana ne kilo fodu meidi nogna soldia di Israel.

⁷ Eghuteuna mae Joram ne fatei cheke ka King Jehosafat gna Juda, ne cheke eghu ka mana, “Gognarona mae king gna Moab gne la tirogna fanomho ka iara la theome leghu ghau iara. Eghuteuna iara magnahaghei te tei magra ka mana gognarona. Iagho tangomana te mei balugu iara na ba theo?” Eghuteuna King Jehosafat ne cheke eghu ka mana, “Iara tangomana te tei balumu iagho na. Iara tarabanau kolho te mala leghuni unha te magnahagheni iagho na. Eghuteuna nogu mae soldia nei hose teu iara igre kaikaliti fabrahu kolho te mala togho nigho iagho na.”

⁸ “Nu tahati na leghuni nabrou aheva gne te mala tei magra ka mare na?” King Joram ne cheke eghu, “Tahati ginauna leghuni nabrou te tei fei namono nagou Idom.”

⁹ Aonu king gna Idom igne ne hata nogna armi na ne tei baludi mae king igre. Eghuteuna thilo armi igre lithui ne tei fei namono nagou nabagna fitu narane. Nu jare na theo khoꞌu maladi mare baludi nodi hose nei kamel teu re.

¹⁰ Aonu King Joram ne cheke eghu, “Phiamae! Thofno kahi ghita fara! Lord gognarona lisa lao ghitahi ka khame gna king gna Moab!”

¹¹ Nu King Jehosafat ne ghusna eghu, “Theo kaisei nogna profet Lord te au agne na? Jame au teu mana agne na, tahati na tei filoni mana mala laseni gaoghathogna Lord na.” Aonu kaisei nogna komanda King Joram na ne cheke eghu, “Mae Elisa, thugna mae Safat na au agne. Tifa na mana neke loku ranghini mae profet Elija.”

¹² King Jehosafat nomhini igne ne cheke eghu, “Uve, mae Elisa gne kaisei nogna mae profet tutuani Lord.” Aonu thilo mae king igre tei ne filoni mae Elisa.

¹³ Mae Elisa filoni mae King Joram gna Israel igne ne cheke eghu, “Naugna unha sagho te mei ka iara gnea? Tei sagho filodi nodi profet idomu ghe kmamu ra!” Nu mae king gna Israel igne ne cheke eghu, “Theo. Lord na jame lisa lao ghamihi ghetilo ka khame gna king gna Moab.”

¹⁴ Aonu mae Elisa ne cheke eghu ka mae Joram, “Iara kaisei nogna mae gloku Lord mae ihei te au nolaghi fateote'o. Eghuteuna ka nanghagna mana, iara na cheke fadoglo ari ka iagho, jame theome au balumu iagho king Jehosafat gne meuna, iara ginauna theome togho nigho. Nu iara ginauna togho nigho, naugna iara ne ghatho tahuni King Jehosafat.

¹⁵ Eghume, ghotilo tei hata mei keha mae te lase lalahu gita.” Aonu kate gita teu mae igne na, nogna nolaghi Lord na ne mei ka profet Elisa.

¹⁶ Eghuteuna mae Elisa ne cheke eghu, “Igne unha te chekeni Lord na, ‘Ghotilo tei dokha kmana khora mala fura haghe khoꞌu ka glogu te moja igne.

¹⁷ Neuba ghotilo ne theome filoni kaisei nakhete nei nuri teuna, nu vido igne ginauna fodu ka khoꞌu. Ghotilo ginauna au naba khoꞌu malami themi nei nomi buluka nei dongki teu are.’ ”

¹⁸ Mae Elisa ne cheke eghu, “Kaisei glepo bligi kolho te mala eni Lord na. Naugna mana ginauna togho ghami ghotilo mala tapla soruni ghotilo armi gna Moab.

¹⁹ Ghotilo ginauna hata nodi famane namono biꞌo mare te bara te ligoho ka thina biꞌo are, nu ghotilo ginauna tangomana te goigonidi mare na. Eghuteuna ghotilo ginauna na kato soru nodi famane gaju te mala ghamu sisidi re, nei dokha fruni nodi glokha khoꞌu, nei koko thina lamna ka nodi nagare mare are mala theome tangomana mare te filoni kaisei gano na.”

²⁰ Aonu hamerane boibongi ka vido narane te mala fafara na, khoꞌu na ginauna loloro soru funu Idom mei fodu heva heva ka vido te gnafa re.

²¹ Kate nomhini naiknodi Moab nate mei magra ka mare thilo mae king igre na, mare ne kilo meidi mae te gnafa naba te mala magra na, funu ka mae biꞌo posa ka mae majaghani. Eghuteuna mare tarabana mei ofo neu ka nohigna nodi kantri na.

²² Nu hamerane boibongi ka keha narane na, mare dofra haghe ne filoni khoꞌu na ne ukru jateula dadara neu heva heva kate agha naprai na.

²³ Aonu mare ne cheke eghu, “Tore, dadara! Jauna thilo mae king nei nodi mae soldia teu ra jame magra fari falehei fari thedi kolho! Tahati na ari ka nodi suga tapuale mare are mala hata nodi gobigna lepo mare ra!”

²⁴ Nu kate mei mae soldiadi Moab gre ka vido te au teu mae Israel igre na, mae soldia di Israel igre tei ne magra ka mare ne ngolhi fapulodi ka kantri Moab. Eghuteuna soldiadi Israel igre ne tei ke leghudi ne aknu falehe kmana soldia ka mare.

²⁵ Eghuteuna soldiadi Israel igre ne goigoni fahui nodi namono mare re. Kate tei te salaꞌu soldia di Israel igre ka kaisei nodi vido glose te keli maedi Moab igre na, mare hata thina ne koko lao tagna, nagare te gnafa Moab igre ne fodu ka thina. Mare tatafru glokha khoꞌu are eghuteuna kato soru nodi gaju te mala ghamu sisidi re. Mare eni fabrahu igne ne ghilei kaisei namono biꞌo Kira-Hareset ngala te au na. Eghuteuna mae soldia te fada ka piri kuava igre mei ne au faligohoni namono biꞌo igne.

²⁶ Kate filoni King Mesa gna Moab te theome nheta hila na, mana ne hata fitu gobi soldia te lase magra ka naflahi ne jifla ne tei magra rhegna mae king gna Idom, nu soldia di Moab faꞌiho te jifla te tei na.

²⁷ Aonu king gna Moab igne ne hata mae thugna teke kulu karha mala ke king tughuni teku na, ne aknu faleheni mana ke kligna bara thina gna namono biꞌo na. Mana ne gahu mae thugna na ne fafara ka nodi god na. Mae Israel gre filoni igne ne mhaghu nodi fara. Aonu mare jifla ka namono igne neke figri ka nodi kantri na.