Fapea Kings 25 - Buka Blahi Ka Cheke Holo

Naiknodi Babilonia ne hata namono biꞌo Jerusalem

¹ Aonu, ka faheva finogha te king Sedekaea gna Juda igre, mae Nebukadnesa king gna Babilonia igne ne mei balu nogna armi ne magra Jerusalem. Mare mei ne au ke kosi Jerusalem, eghuteuna mare ne fafodu glose ne lithui ka baragna namono na mala tangomana mare te poru ke leghugna kate magra na.

² Jerusalem gne au ka khamedi mae Babilonia ne ghilei thokeni nabotho kaisei finogha te king mae Sedekaea.

³ Ka nabotho kaisei finogha te king mae Sedekaea, ka nabotho nhanai gna nigra Julae, naikno gna namono biꞌo igne ne kafe rofo, naugna la huihila gano na.

⁴ Aonu hatimare mae soldia di Babilonia igre ne paꞌe gringni gna namono na ne ruma lamna. Neuba mae soldia gre ne kegra ligohoni neu namono na, King Sedekaea baludi nogna soldiare ne fariuriu rikha bongiro ne jifla farihoteidi phei gringni thina ke leghugna nogna nagare king na rikha ne tei ka glogu rhegna Khoꞌu biꞌo Jordan.

⁵ Nu hatimare mae soldia di Babilonia igre ngolho ne tei lokini King Sedekaea rhegna namono Jeriko, nu nogna soldia mana teke rikha balugna mana igre ne tei kokoni mana.

⁶ Mare tathaleini mana ne tei ka King Nebukadnesa Ribla. King Nebukadnesa ne fateni mana jare.

⁷ Mare filo neu mae Sedekaea ne aknu falehe thugna mana re. Eghuteuna mare ne bilo koko phei tathagna mae Sedekaea re, aonu mare ne haru phei khamegna manare ka chen hata ne tei Babilonia.

Mare ne goigoni nogna SugablahiLord

⁸ Ka fabotho nheva finogha te king Nebukadnesa Babilonia, ka falima nhigra, ka fabotho narane gna nhigra igre, Nebusaradan mae komanda gna nogna armi king igne ne mei posa Jerusalem.

⁹ Mana ne gnubra nogna Sugablahi Lord na, balugna nogna suga biꞌo king na, nei suga te gnafa Jerusalem. Mana goigoni fahui suga te ulu ke lamnagna namono biꞌo igne.

¹⁰ Eghuteuna mana cheke ranghidi nogna soldiare mala paꞌe soru bara thina te falithuini namono igne.

¹¹ Eghuteuna mae Nebusaradan ne hata naikno teke au faleghu teku ka namono igne, nei iheire teke rikha mala tei loku fodu baludi maedi Babilonia ke kosi, aonu mana kafe hata naikno igre ne tei au Babilonia.

¹² Nu komanda Nebusaradan snakredi keha naikno te kuma re mala au faleghu Juda mala loku ka nagare grep nei ka thobi.

¹³ Mae soldia di Babilonia igre ne goigoni Sugablahi na ne pala ne tei glepo teke horo ka bras igre: phei khegra biꞌo gna Sugablahi na, nei chariot mala hata khoꞌu na, nei dis biꞌo teu igre hata ne tei Babilonia.

¹⁴ Mare jaola ne hata baket mala lilisei nakrofu, sevol ikodi, glepo mala falehe juta, tapera, baludi gobigna lepo teke horo ka bras te mala loku ka Sugablahi na.

¹⁵ Eghuteuna komanda Nebusaradan ne hata besin nei glepo mala gahu insens, nei keha glepo teke horo ka famane gol nei silva.

¹⁶ Phei khegra biꞌo igre neke horo ka bras neke lilisei King Solomon ka Sugablahi na tifa, baludi chariot mala pala khoꞌu nei dis biꞌo. Bras igre tahu fara theome tangomana te skel na.

¹⁷ Haghedi phei khegra biꞌo igre thokedi nhana mita, eghuteuna phaꞌudire neke horo ka bras. Haghegna kaisei khegra na kaisei mita tolufulu sentemita. Mare lalaoni pha'udi khegra igre ka bras mala jateula fangna eghu lithui. Mare jaola lalaoni phaꞌudi khegra igre ka mumuju sisi pomegranet, kaisei nafnata sisi pomegranet. Phaꞌugna keha khegra na nanaba jateula keha na eghu.

Mare ne aknu falehe keha mae biꞌodi Juda

¹⁸ Mae Nebusaradan komanda gna nogna armi King Nebukadnesa king gna Babilonia igne ne hata ne tei balugna ka sosolo mae pris biꞌo Seraia ghe mae pris Sefanaea, mae mala toghoni mae pris biꞌo, baludi thilo mae biꞌogna nogna Sugablahi Lord.

¹⁹ Eghuteuna mana hata kaisei mae biꞌo, mae ihei te mala batuni armi gna Juda na. Mana jaola ne hata glima nogna mae biꞌo te mala toghoni king ka groghe na, nei nogna sekretri mae komanda mae ihei te mala hata maedi Juda te au ka magra na, baludi namno salei mae funei teke au fapulo teku Jerusalem.

^20-21 Nebusaradan hata ne tei naikno igre Ribla ka king Nebukadnesa. Aonu king chekedi nogna soldia re ne aknu falehe. Ka puhi igne, mare hata naiknodi Juda igre mala jifla kokodi mare nodi thofno namono re mala tei au ka keha kantri delei.

Gedalaea gavana gna Juda

²² Ka narane tuare, King Nebukadnesa ne vahini mae Gedalaea thugna mae Ahikam, thugna mae Safan mala gavana ka provins Juda. Mana ne reireghidi naikno te au fapulo teu Juda te theome tei Babilonia.

²³ Kate nomhini keha mae armi komanda di Juda teke tei poru teku ke kosi Jerusalem igre king gna Babilon te vahini mae Gedalaea te mala gavana gna provins igne, mae igre tei ne filoni mana Mispa: mae Ismael, thugna mae Netania, thugna mae Elisama, mae Johanan thugna mae Karea, mae Seraia thugna mae Tamumet maegna Netofa, nei mae Jasania maegna ka namono Maka.

²⁴ Mae Gedalaea ne baubahu ne cheke eghu ka mare, “Tore, ghotilo thosei mhaghudi mae biꞌodi Babilonia are. Jame lisa lao ghami themi ghotilo ke parigna nodi nolaghi mae igre, eghuteuna leghuni ghotilo king gna Babilonia gne meuna, ghotilo ginauna au fakeli nomi fabrahu ka namono igne.”

²⁵ Nu mae Ismael thugna mae Netania igne mana ne kheragna king gna Juda. Ka finogha tuana, ka fafitu nhigra na, mana ne hata nabotho mae balugna ne tei Mispa. Mare ne aknu faleheni mae gavana Gedalaea. Eghuteuna mare jaola neke aknu falehe naiknodi Juda nei Babilonia teke au teku baludi mare ka namono tuana.

²⁶ Aonu naiknodi Juda, neubane mae dedei ba mae te kuma, baludi mae komandadi armi, mare ne kafe rikha ne tei Ijep, naugna mare ne mhaghudi maedi Babilonia.

King Evil-Merodak ne snakre teini mae Jehoiakin

²⁷ Ke lamnadi tolufulu fitu finogha te au teu King Jehoiakin ka suga sosolo Babilonia igre, King Evil-Merodak ne kegra king gna Babilonia. Eghuteuna ka finogha tuanala, ka fabotho pea nhigra, ka varadaki fitu narane gna na, mae king igne ne hata fajiflani King Jehoiakin ka suga sosolo, ne snakre teini.

²⁸ King Evil-Merodak ne keli ranghini mana ne pala hagheni mana uludi keha king teke au balugna mana Babilonia.

²⁹ Aonu King Jehoiakin ne hata koko pohe sosolo na, funu ka narane igne te ghilei hui nakarha gna na, mana ghamu koba balugna king ka nogna tevo na.

³⁰ Aonu king gna Babilonia igne ne tufa sileni mala foli gano mae Jehoiakin leuleghu narane neke ghilei lehe mae Jehoiakin.