Fapea Kings 22 - Buka Blahi Ka Cheke Holo

King Josia gna Juda

¹ Mae Josia neke nhana finogha gna kolho neke king gna Juda. Eghuteuna mana neke king Jerusalem tolufulu kaisei finogha. Eghuteuna idogna mana Jedida igne neke thugna mae Adaea ka namono Boskat.

² Mae Josia neke eni unha te doglo ka tathagna Lord na, eghuteuna mana neke leghuni fabrahu puhigna King Devet, mae kuꞌegna tifa ia, eghuteuna mana neke theome figri lao fei nheta ba fei maeri, nu mana neke eni kolho unha te doglo na.

Mae pris biꞌo Hilkaea ne filo deni buka gna vetula nognaLord

³ Ke lamnadi nabotho nhana finogha te king mae Josia Juda igre, mana ne kiloni mae Safan, nogna sekretri na mala tei ka nogna Sugablahi Lord na. Mae igne thugna mae Asalia, thugna mae Mesulam. King ne cheke eghu ka mana,

⁴ “Iagho tei filoni mae pris biꞌo Hilkaea, cheke ka mana mala fadoglidi sileni teke tufa naiknore ka mae pris te kegra ka grengatha gna Sugablahi ia.

⁵ Iagho cheke ka mana mala tusu lao sileni igne ka mae biꞌo te mala reireghidi gloku gre mala folidi mae te loku ka nogna Sugablahi Lord igne.

⁶ Mare mala folidi hatimare mae kapenta, mae te lase loku suga ka thaba nei ka thina baludi unha glepo te mala loku mare re.

⁷ Nu iagho chekedi mae pris ra mala thosei nangani mare sileni te au ka buka na, naugna puhidi mae gloku igre thofno doglo fara.”

⁸ Mae Hilkaea mae pris biꞌo na ne cheke eghu ka Safan mae sekretri na, “Iara kela filonihi Buka gna Vetula ia ke lamna nogna Sugablahi Lord.” Eghuteuna mana tusu lao buka igne ka mae Safan mala iuꞌiju mana.

⁹ Eghuteuna kate iuꞌiju te gnafa na, mana figri ka king ne cheke eghu ka mana, “Ghehati hatahi sileni teke au ka suga gna Lord ra, eghuteuna ghehati tusu laohi ka hatimare mae gloku nei ka hatimare mae biꞌo te mala areare gna gloku ka Sugablahi igne.”

¹⁰ Aonu Safan mae sekretri na ne cheke eghu ka king, “Mae pris biꞌo Hilkaea neke tusu mei buka igne ka iara.” Aonu mae Safan ne iuꞌiju buka igne ke ulugna king.

¹¹ Kate nomhidi king cheke te au ka Buka Vetula na igre, mana diꞌanagnafa gna ne rerheku nogna pohe na.

¹² Eghuteuna king ne kilo meidi mae pris biꞌo Hilkaea, mae Ahikam thugna mae Safan, mae Akiboa thugna mae Maekaea, mae sekretri Safan, nei mae Asaia nogna mae gloku mana igne. Eghuteuna kate mei mare na, mana ne cheke eghu ka mare,

¹³ “Ghotilo tei hironi gaoghathogna Lord na eigu iara, eidi naikno igre nei naikno te gnafa agne Juda eidi unha teke rioriso soru ka buka teke filoni mare igne. Lord diꞌatagna fara ka tahati, naugna kuꞌeda tahati ra neke theome leghudi unha te chekedi mala edi tahati teku ka buka na igre.”

¹⁴ Mae pris Hilkaea, mae Ahikam, mae Akiboa, mae Safan nei mae Asaia eghu tei ne toutonudi glepo igre ka kaisei profet gaꞌase, nanghagna na Hulda khetogna mae Salum thugna mae Tikva, thugna mae Hahas. Mae Hahas gne mae ihei te mala reireghidi pohe gna Sugablahi na. Profet Hulda gne au Jerusalem ka fapea distrik.

¹⁵ Naꞌa ne cheke eghu ka mare, “Igne unha te chekeni Lord, nodi God mae Israel: Chekeni mae ihei te kuru mei ghami ghotilo ka iara igne,

¹⁶ ‘Igne unha te chekeni Lord na. Iara ginauna goigoni ni Jerusalem, eghuteuna paradi naikno te au ka namono tuana, jateula gobigna lepo te rioriso soru ka buka te nomhidi king gna Juda igre eghu.

¹⁷ Naugna nogu naikno iara igre neke tei koko ghau iara neke gahu insens ka keha god delei, eghuteuna iara thono diꞌatagu fara ka mare eidi gobigna lepo te edi naikno igre. Eghuteuna diꞌatagu iara ka naiknore igne ginauna theo ka huigna.

¹⁸ Nu ghotilo tei ka king gna Juda mae ihei teke kuru mei ghami ghotilo gne mala cheke eghu ka mana, Igne unha te chekeni Lord, nodi God mae Israel eidi cheke te nomhidi iagho ra:

¹⁹ Iagho neke diꞌanagnafa nei nhaꞌa fapari nigho themu neku ke ulugna Lord kani teke nomhini iagho teke cheke faparini Jerusalem nei naikno gna ra. Iagho neke tanhi ke ulugu iara eidi nakhibomu re, eghuteuna iagho neke rerheku nou pohere kate nomhini iagho eigna namono igne ginauna groꞌe teuna. Tutuani fara, iara la nomhidihi nou tharai ghotilo ra.

²⁰ Eghume iagho ginauna theome filodi puhi biꞌo teke nhaꞌa chekedi iara ra nate thakle mei kate karha teu iagho na.’ ” Aonu mare hata nogna cheke tughu profet Hulda igre neke figri ka king.