Fapea Kings 21 - Buka Blahi Ka Cheke Holo

King Manase gna Juda

¹ Mae Manase neke nabotho phei finogha gna neku neke king, eghuteuna mana neke funei Jerusalem glimafulu glima finogha. Idogna mana na, Hefsiba.

² King igne neke theome keli ka tathagna Lord. Mana leghudi fabrahu puhidi naikno di Israel tifa ra. Naugna igne Lord teke khi fajifladi ka nodi namono naiknodi Israel.

³ Mana tei neke babana fapulo nodi vido blahi mae bongihehe teke paꞌe soru kmagna mana mae Hesekaea ra. Mana horo olta mala tarai ka Baal, eghuteuna horo kaisei mumuju gaꞌase Asera, jateula teke edi King Ehab gna Israel tifa ra neu. Eghuteuna mae Manase jaola neke tarai ka nathunu.

^4-5 Mana horo olta ka phei philegna nogna Sugablahi Lord na mala pogho soru ka nathunu. Nu Lord neke cheke eghu, “Nogu Sugablahi iara Jerusalem igne mala pogho soruni kolho Nanghagu iara na.”

⁶ Mana gahu neke fafara mae thugna thegna na ka mumuju. Mana loku ka nunughere nei khoraphaꞌu, khaekae, eghuteuna mana tei filodi iheire tangomana te cheke baludi tharungadi iheire tela lehehi. Eghuteuna mana edi kmana glepo te thono diꞌa fara ka tathagna Lord na, aonu Lord ne diꞌatagna fara ka mana.

⁷ Mana hata mumuju gna god Asera igne ne lilisei ka nogna Sugablahi Lord na. Nu Lord neke cheke eghuhi ka King Devet ghe mae thugna na, King Solomon, “Iara neke vahini Jerusalem ka nodi vido nabotho phei vikegna Israel mala babana haghe nogu Sugablahi na mala pogho soruni fabrahu mare Nanghagu Iara na.

⁸ Jame te leghudi ghotilo nogu cheke iara igre, nei tajidi nogna vetula mae nogu gloku iara mae Moses teke tusu ari iara ka kuꞌemi ghotilo tifa ra meuna, iara ginauna na theome snakredi keha naiknore mala khi fajifla ghami ka namono teke tusu ari iara ka kuꞌemi ghotilo ra.”

⁹ Nu naiknodi Juda igre neke theome leghuni Lord, eghuteuna King Manase neke batudi naiknore ka nakhibo te thono diꞌa fara salaꞌudi naikno bongihehe teke goigonidi Lord kani teke hata mei mana naiknodi Israel teke au ka kantri igne.

¹⁰ Lord neke cheke eghu ranghidi nogna mae gloku hatimare mae profet,

¹¹ “Mae Manase king gna Juda igne mana edi glepo te thono diꞌa fara igre. Mana edi kmana nakhibo ke tulaodi naiknodi Amo tifa ra, mana fatutuanidi mumuju igre ne batudi naiknodi Juda ka nakhibo.

¹² Eghume igne unha te chekeni Lord, nodi God mae Israel: Iara ginauna hata mei kaisei hoholo te thono diꞌa fara ka naiknodi Jerusalem ghe Juda. Eghuteuna kate nomhini naiknore eigna igne, mare ginauna na jaglo nodi fara.

¹³ Iara ginauna para ghami ghotilo, jateula teke paradi iara naiknodi Samaria balugna King Ehab nei vikegna teku mana ra. Iara ginauna hata fadelei ghami ghotilo mala famane gae namono igne, jateula tapera te famane titihi te gae, eghuteuna fapogru sukha teura eghu.

¹⁴ Iara ginauna lisa lao naikno te karha nga teu igre ka khamedi mae naoka. Eghuteuna mae naoka igre ginauna uludi mare, eghuteuna mae naoka igre ginauna hata tei ka namono dire nodi gobigna lepore.

¹⁵ Iara ginauna eni igne ka ghotilo, naugna ghotilo ne edi glepo te diꞌa igre ka tathagu iara na ne ngigno hagheni diꞌatagu iara na, funu ka narane teke jifla mei Ijep kuꞌemi ghotilo ra te ghilei posa mei ka narane igne.”

¹⁶ King Manase jaola ne aknu falehe kmana naikno fara, aonu dadaradi naikno te theo kaisei nakhibodi igre ne fodu ka namono Jerusalem. Nu jaola, mana neke batudi naiknodi Juda igre neke edi glepo te diꞌa ka tathagna Lord.

¹⁷ Keha glepo teke edi mae Manase baludi nakhibo teke edi mana kani teke funei fruni igre, mare neke rioriso soru ka Buka Eidi Glepo Teke Edi Hatimare Mae King Di Juda.

¹⁸ Kate lehe mana na, mare ne giugiluni mana ka nagare rhegna nogna suga na. Nagare igne mare kiloni, “Nogna Nagare mae Usa.” Eghuteuna mae Amon thugna mana na neke king tughuni mana.

King Amon gna Juda

¹⁹ Mae Amon neke varadaki phei finogha gna kate king mana na, eghuteuna mana neke funei Jerusalem phei finogha kolho. Idogna mana na neke Mesulemet, thugna mae Harus maegna ka namono Jotba.

²⁰ Mana jateula mae Manase mae kmagna na neku neke edi kmana glepo te diꞌa ka tathagna Lord.

²¹ Mana leghuni puhigna kmagna na, eghuteuna mana neke pogho soru ka mumuju teke pogho sorudi mae kmagna re.

²² Mana neke figri tagruni Lord, nodi God mae kuꞌegna ra neke tirogna leghuni chekegna Lord.

²³ Nogna mae funei mana re ne roghe poru ne aknu faleheni mana ka nogna suga na.

²⁴ Nu naiknodi Juda igre tei ne aknu falehedi mae iheire teke aknu faleheni mae Amon, eghuteuna mae Josia thugna mana igne neke king tughuni mana.

²⁵ Keha glepo teke edi mae Amon re, mare neke rioriso soru ka Buka Eidi Glepo Teke Edi Hatimare Mae King Di Juda.

²⁶ Mare neke giugiluni King Amon ka nagare te kiloni mare, “Nogna Nagare mae Usa.” Aonu mae Josia, thugna mae Amon igne neke king tughuni mana.