Fapea Kings 20 - Buka Blahi Ka Cheke Holo

King Hesekaea ne fogra

¹ Theome raugha armi gna Asiria igne mei ne magra Juda, King Hesekaea ne fogra fara ne ghilei namo lehe. Aonu profet Isaia thugna mae Amos, tei ne cheke eghu ka mana, “Lord ne cheke eghu, ‘Te keli na iagho fadoglidi nou gobigna lepore, eigna iagho ginauna lehe, eghuteuna iagho ginauna theome tangomana na teke keli fapulo na.’ ”

² Aonu king ne figri lao fei gringni ne tarai,

³ “Lord, ghatho mei ghau. Iara loku ranghi nigho iagho ka nogu nolaghi fateote'o nei ka gaoghathogu fateote'o, eghuteuna iara fariuriu mala edi gobigna lepo te magnahaghedi iagho re.” Eghuteuna mana ne funu tanhi fabiꞌo.

⁴ Kate theome jifla nga teu profet ka nogna suga king na, nogna cheke Lord na ne mei ka mana.

⁵ Lord ne cheke ranghini profet mala tei ka king mala cheke eghu ka mana, “King Hesekaea, Lord nogna God mae kuꞌemu King Devet na ne cheke eghu: Iara la nomhinihi nou tharai iagho ia, eghuteuna iara filoni te tanhi nei diꞌanagnafa teu iagho ia. Iara ginauna nake fakeli fapulo nigho, eghuteuna ka fatilo narane ke leghugna gognarogne iagho tangomana te tei ka Sugablahi na.

⁶ Iara ginauna togho nigho iagho mala karhau iagho nabagna nabotho glima finogha, eghuteuna iara ginauna fakarhi nigho iagho balugna namono biꞌo Jerusalem ka khame gna king gna Asiria. Nanghagu iara na au ka namono igne, naugna iara neke nhaꞌa chekehi balugna nogu mae gloku King Devet tifa te mala reireghi fakelini namono igne.”

⁷ Aonu mae Isaia ne chekedi nogna mae gloku mae king re mala tei hata mei keha sisi fig mala lama lao ka thubugna king na mala ke keli fapulo mana.

⁸ Mae Hesekaea ne ghusna eghu ka mae Isaia, “Unha nafnata fagaglana gne Lord nate fakeli ghau iara ginauna, eghuteuna iara ginauna haghe ka Suga gna Lord ka fatilo narane na?”

⁹ Isaia ne cheke eghu ka king, “Lord ginauna eni kaisei fagaglana ka iagho, mala laseni iagho mana te tajini nogna nhaꞌa cheke na. Ba, iagho magnahaghei te filoni naungo na te tugha faꞌulu nabotho nathapla, eghuteuna ke tugha faleghu keha nabotho nathapla re teuna?”

¹⁰ Eghuteuna king ne cheke eghu, “Bligi fara naungo igne te tugha faꞌulu nabotho nathapla na! Chekeni sagho naungo igne mala tugha faleghu nabotho nathapla!”

¹¹ Aonu profet Isaia ne tarai ka Lord, eghuteuna Lord ne tugha faleghu nabotho nathapla ka nathapla gna suga teke eni King Ehas tifa na.

Keha naiknodi Babilonia ne mei Jerusalem

¹² Ka narane tuana, King Merodak-Baladan, thugna mae Baladan, ne king Babilon. Mana nomhini te fogra fara King Hesekaea igne. Aonu mana ne kurudi keha naikno baludi keha letas nei kaisei namha eghu mala tusu ranghini King Hesekaea.

¹³ King Hesekaea ne keli tagna fara kate filodi naikno igre, eghuteuna mana ne fakakhana ka mare nogna dedei, nogna silva, gol, khuromu, oel nei nogna glepo mala magra teure. Mare ne filodi gobigna lepo te au ka suga gna mana re, nei jaola filodi gobigna lepo te au ke lamnagna nogna kantri mana na.

¹⁴ Profet Isaia mei ka King Hesekaea ne ghusna eghu ka mana, “King, mae igre neke mei funudi aheva, eghuteuna unha te chekeni mare ka iagho na?” King ne cheke eghu, “Mare mei funudi ka kantri te khaba fara, funudi Babilonia.”

¹⁵ Mae profet Isaia ne cheke eghu, “Unha te filoni mare ke lamnagna nou suga iagho na?” Mae Hesekaea ne cheke eghu, “Mare filodihi gobigna lepo fateote'o te au ke lamnagna nogu suga iara na, theo kaisei glepo te poruni iara ka mare na.”

¹⁶ Aonu mae Isaia ne cheke eghu ka mae Hesekaea, “Iagho fanomho mei ka nogna cheke Lord mae ihei te au nolaghi fateote'o igne.

¹⁷ Hesekaea, ginauna na thoke mei kaisei narane te mala mei armi gna Babilonia te hata fahui gobigna lepo teke tathaji teku kuꞌemu iagho tifa ke lamnagna nou suga na te ghilei thoke mei ka narane gognarogne. Naiknodi Babilonia ginauna mei hata tei gobigna lepo tuare ka nodi namono re. Eghuteuna ginauna na theo kaisei glepo nate au na.

¹⁸ Mare ginauna hata tei keha mae sitei nate karha mei ka vikemu iagho are mala loku ka suga gna king gna Babilonia.

¹⁹ “Nu te ghathoni mae king na, gaoghathodi cheke igre na toghoni mana mala au fakeli fabrahu ka nakarhagna na neu ne cheke eghu, ‘Unha te chekeni Lord ka iagho igne keliu kolho.’ ”

King Hesekaea ne lehe

²⁰ Keha glepo teke edi King Hesekaea nei thoutonu eigna khora biꞌo teke eni mana ke pari glose hata khoꞌu te mei ka namono Jerusalem teku igre, mare neke rioriso soru ka Buka Eidi Glepo Teke Edi Hatimare Mae King Di Juda.

²¹ Eghuteuna kate lehe mana na, mae thugna mana, mae Manase teke king tughuni mana na.