Fapea Kings 2 - Buka Blahi Ka Cheke Holo

Lordhatani profet Elija ne haghe kligna

¹ Namo ka narane Lord te hatani profet Elija te haghe kligna na, Lord ne kuruni kaisei seseuru biꞌo mala mei hatani mae Elija. Ka narane igne, profet Elija ghe profet Elisa jifla Gilgal ne nolo ne tei.

² Aonu profet Elija ne cheke eghu ka profet Elisa, “Iagho ofou agne, eigna Lord na neke cheke ka iara mala tei Betel.” Nu profet Elisa ne cheke eghu, “Ka nanghagna Lord te karha te tifa, iara thofno cheke kate tutuani fara, iara ginauna tei balumu iagho, eghuteuna iara ginauna theome tei koko nigho iagho.” Aonu phiamare ne kafe tei Betel.

³ Kaisei tothoghei profet na au jare Betel. Mare mei ne filoni profet Elisa, ne cheke eghu ka mana, “Gognaro na Lord ginauna hata tei nou mae funei iagho gne. Iagho laseni ngau tuana ba theo?” Mana ne cheke eghu, “Uve, iara lasenihi, nu ghotilo theome tangomana te cheke eigna igne na.”

⁴ Phia mare au neu Betel, eghuteuna mae Elija ne cheke eghu ka mae Elisa, “Iagho na ofou agne, naugna Lord neke cheke ka iara mala tei Jeriko.” Nu mae Elisa ne cheke eghu ka mana, “Ka nanghagna Lord mae ihei te karha te tifa, iara thofno cheke kate tutuani ka iagho, iara ginauna tei balumu iagho, eghuteuna na theome tei koko nigho iagho.” Aonu phiamare ne kafe tei Jeriko.

⁵ Kaisei tothoghei profet na jaola au jare Jeriko. Mare mei ne filoni mae profet Elisa, eghuteuna mare ne cheke eghu ka mana, “Gognaro na Lord ginauna hata tei nou mae funei iagho igne. Iagho laseni igne ba theo?” Eghuteuna mae Elisa ne cheke eghu, “Iara lasenihi, nu ghotilo theome tangomana te cheke eigna igne na.”

⁶ Phia mare au neu Jeriko, eghuteuna mae Elija ne cheke eghu ka mae Elisa, “Iagho ofou agne, naugna Lord na neke cheke ka iara mala tei ka khoꞌu Jordan.” Nu mana ne cheke eghu, “Ka nanghagna Lord mae ihei te karha te tifa, iara thofno cheke kate tutuani fara, iara ginauna tei balumu iagho, eghuteuna iara ginauna theome tei koko nigho iagho.” Aonu phiamare ne kafe tei ka khoꞌu Jordan.

⁷ Glimafulu profet ne leghudi phiamare. Phia mare au neu ka geri khoꞌu na, eghuteuna mae profet igre ne au fakhaba neu kakatha ikoi ka khoꞌu Jordan.

⁸ Eghuteuna mae Elija hata koko nogna pohe brahu na ne lolhopo na ne proprosa pohe igne ka khoꞌu Jordan. Eghuteuna khoꞌu na ne fnota pea. Aonu khoꞌu na khapra ne kasa phiamare ka keha phile na.

⁹ Ke leghu kate kasahi phiamare na, mae Elija ne cheke eghu ka mae Elisa, “Lord na la namo mei hati ghauhi iara, eghuteuna iara ginauna na tei koko nigho iagho gognaro na. Jame te au iagho kaisei glepo te magnahaghei ghau iara te kulu eni ranghi nigho na, te keli na iagho cheke ranghi ghau iara.” Eghuteuna mae profet Elisa ne cheke eghu, “Iara magnahaghei nigho iagho te tusu mei ka iara u nolaghi teke tusu ari God ka iagho teke edi iagho nogna gloku mae profet igre. Eghuteuna eni sagho ka iara u nafnata puhi te eni mae mama ka thugna ulu lahu na te tusu lao kmana glepo ka mana ra, mala tangomana iara te hata sapemu iagho na te mala eni nogna gloku mae profet na.”

¹⁰ Mae profet Elija ne cheke eghu ka mana, “Glepo te toreni iagho ka iara igne, theome bligi ranghi ghau iara te mala eni na. Nu jame te filo ghau iara iagho kate mei Lord te hata ghau iara na, iagho ginauna hata u nolaghi te toreni iagho igne. Eghuteuna jame te theome filo ghau iara ka narane te tei iara na, iagho ginauna na theome tangomana te hata na u nolaghi tuana.”

¹¹ Phiamare toutonu nolo ne tei. Aonu kaisei khaꞌaghi te jateula chariot mala magra te korho ka hose ra teuna ne mei salaꞌu farihoteidi phiamare. Eghuteuna ka vido tuanala, kaisei seseuru ne mei hatani mae profet Elija ne haghe kligna.

¹² Mae Elisa ne filoni mae Elija te tei na ne eha eghu, “Mama! Mama! Iara filodi chariot nei maedi Israel te saghe ka hose!” Kate haghehi mae Elija kligna na, mae Elisa ne diꞌanagnafagna fara ne rerheku nogna pohe na.

¹³ Kate haghe mae Elija kligna na, nogna pohe mana na ne khoko soru pari ka glose na. Aonu mae Elisa hata pohe igne neke pulo mei ne kegra ka geri Khoꞌu biꞌo Jordan.

¹⁴ Mana hata nogna pohe mae Elija igne ne prosa ka khoꞌu na. Eghuteuna kate prosa ka khoꞌu na, mana ne cheke eghu, “Ba, nogna God mae Elija gne au balugu iara signea?” Eghuteuna kate prosa mana ka khoꞌu na, khoꞌu na ne fnota pea ka phei vido, eghuteuna mae Elisa ne nolo ne kasa ka keha phile.

¹⁵ Glimafulu mae profet di Jeriko ne filoni unha te eni mae Elisa ka narane igne. Eghuteuna mare ne cheke eghu, “Tore! Nolaghi te mala cheke jateula mae profet Elija teuna la meihi ka mae Elisa!” Aonu mare tei ne thafoni mana, eghuteuna mare ne pogho soru pari ka glose na ne fafnaknoni mana.

¹⁶ Eghuteuna mare ne cheke eghu ka mae Elisa, “Ghehati glimafulu mae nheta. Eghuteuna ghehati magnahaghei te tei hironi nou mae funei iagho na. Glahula mei Tharunga gna Lord na hata tei liseini mana ka kaisei thogele ba ka kaisei glogu.” Nu mae Elisa ne cheke eghu ka mare, “Theo, ghotilo thosei tei.”

¹⁷ Nu mae profet igre heta ghedi te ghusnani mana, ne ghilei mamaja nogna ka unha te ghusnani mare na, aonu mana ne snakredi mare ne tei. Mare tei ne hironi mae profet Elija ka vido te gnafa re nabagna thilo narane, nu mare ne theome tangomana te filoni mana na.

¹⁸ Aonu mare neke pulo mei ka mae profet Elisa. Mana ofodi mare neu Jeriko, eghuteuna mana ne cheke eghu ka mare, “Iara neke chekehi ka ghotilo mala thosei tei. Nu ghotilo tiromi fanomho ka nogu cheke iara igre.”

Phei kofubobhoi teke edi mae profet Elisa

¹⁹ Mae Elisa au neu Jeriko, eghuteuna naiknogna namono na mei ne cheke eghu ka mana, “Profet, iagho laseni, namono igne kaisei famane namono biꞌo, nu khoꞌu igne nga te diꞌa na eghu. Eghuteuna gano na theome karha ka glose ghehati igne.”

²⁰ Aonu mae profet Elisa ne cheke eghu ka mare, “Ghotilo hata mei kaisei dis majaghani, eghuteuna fafodu solt tagna.” Mare hata ne mei dis na ka mana.

²¹ Eghuteuna mana tei ka glokha na ne tofa lao solt igne ka khoꞌu na. Aonu mana ne cheke eghu ka mare, “Lord na ne cheke eghu, ‘Iara Lord, iara eni khoꞌu igne mala ke keli fapulo. Eghuteuna ginauna na theo kaisei naikno nate lehe ka khoꞌu igne na, eghuteuna theo kaisei gano nate lehe ka glose igne na.’ ”

²² Eghume, khoꞌu igne kela keli fapulohi ghilei mei thoke ka narane gognarogne, jateula teke chekeni mae Elisa ia eghu.

²³ Mae Elisa jifla jare Jeriko ne haghe Betel. Kate haghe mana ka nabrou na mana ne thafoni kaisei tothoghei biꞌo mae sitei nalhaꞌu te mei funudi ka namono tuana. Mare maꞌeni mana ne cheke eghu, “Ei, iagho mae phaꞌu klaja, tei delei! Iagho phaꞌu klaja, fasnagla ka vido igne!”

²⁴ Nu mae Elisa figri ne filo tutu ka mare, eghuteuna mana ne eha ka nanghagna Lord mala thokedi hoholo mae igre. Theome raugha, phei bea gaꞌasedi megei nga ne suplu mei ka namhata na ne falehedi phiatutu phei mae ka mae sitei igre.

²⁵ Eghuteuna mae Elisa jifla jare ne tei ka Thogele Kamel, eghuteuna ke leghudi igre, mana neke pulo Samaria.