Fapea Kings 16 - Buka Blahi Ka Cheke Holo

King Ehas gna Juda

¹ Ka nabotho fitu finogha King Peka thugna mae Remalaea te king Israel igre, mae Ehas thugna King Jotam igne neke king Juda.

² Ka narane tuare, mana varadaki finogha gnahi. Eghuteuna mana king Jerusalem nabotho namno finogha. Nu mana theome leghuni puhigna King Devet, kuꞌegna tifa ia. Mae Ehas gne edi fabrahu glepo te theome doglo ka tathagna Lord.

³ Mana leghudi puhidi mae king di Israel te diꞌa tifa ra. Eghuteuna mana neke gahu thofno thugna na neke fafara ka mumuju. Glepo igne thofno leghuni puhidi naiknodi tifa te thofno diꞌa fara ra, eghuteuna Lord neke khi fajifladi naikno bongihehe igre ka nodi vido glose naiknodi Israel.

⁴ Eghuteuna king neke fafara nei gahu insens eghu ka mumuju ka nodi vido blahi mae bongihehe ke kligna thogele nei ke pari gaju biꞌo.

⁵ Ka narane tuare, King Resin gna Siria ghe King Peka gna Israel, phiamare balu nodi armi ne haghe bara ligohoni Jerusalem, nu mare theome tangomana te uluni King Ehas.

⁶ Eghuteuna kaisei fata na, King Resin gna Siria ne mei magra ka naiknodi Juda ka namono Elat. Mana khi fajifladi naiknodi Juda neke hata fapulo nodi namono re. Eghuteuna naiknodi Idom igre mei ne au Elat, mare mei au jare ghilei mei posa ka narane gognarogne.

^7-8 King Ehas magnahaghei te tusu lao kaisei namha ka King Tiglat-Pilesa gna Asiria, mala mei mae king igne toghoni. Aonu mana ne hata silva nei gol teu teke au ka nogna Sugablahi Lord na, nei ka nogna suga thegna na teure ne fatei ka king baludi cheke igre, “King, iara nou mae gloku iagho, eghuteuna iara jateula thumu eghu iagho. Gognarona phei king di Siria ghe Israel gre phiamare mei magra ka iara. Mei fakarhi ghau.”

⁹ Kate nomhini king gna Asiria cheke igne, mana ne kuruni nogna armi na ne sukha Siria ka namono Damaskas. Mare magra ne hata namono igne. Aonu mare ne aknu faleheni King Resin, eghuteuna mare huhurudi naiknore mala tei au ka namono Kira.

¹⁰ Kate tei King Ehas Damaskas mala filoni King Tiglat-Pilesa tekuna na, mana ne filoni kaisei olta jare. Aonu mana ne eni kaisei te ikoi jateula olta igne teuna neke hata neke pulo ka mae Pris Uraea Jerusalem.

¹¹ Aonu mae Uraea ne horo kaisei te jateula te magnahagheni king na teuna, eghuteuna kate horo te gnafa olta igne, neke pulo meigna King Ehas.

¹² Ka teke pulo mei king funugna Damaskas na, mana ne filoni tela gnafahi olta na ne tei tagna.

¹³ Aonu mana ne fafara sipu te gahu te krono ka khaꞌaghi balu wit nei waen. Eghuteuna mana hata dadara gna fafara igne fagaglana gna mana te au ka pharikeli balugna Lord, eghuteuna mana ne toatofa dadara igne ke kligna olta.

¹⁴ Mana tuthugha olta tiatifa teke horo ka bras igne ne tei au ke ulugna Sugablahi na. Tifa na olta igne neke au farihoteidi olta majaghani ghe Sugablahi, nu king ne tuthugha olta tiatifa igne ne tei au ke raru gna olta majaghani na.

¹⁵ Eghuteuna mana ne cheke eghu ka mae Uraea, “Nogu olta biꞌo iara igne mala gahu buluka mala fafara hamerane, nei gahu flaoa mala fafara fei grafi. Iagho mala gahu buluka nei flaoa eghu malagna king. Eghuteuna iagho mala jaola gahu nodi fafara naiknore, eghuteuna mala hata mei nodi flaoa nei waen teu naiknore. Eghuteuna iagho mala hata dadara buluka teke fafara naikno ra mala fuafusa ka olta igne. Nu olta biꞌo teke horo ka bras igne, iara ginauna mala loku tagna mala laseni God unha nate eni iara na.”

¹⁶ Aonu Pris Uraea ne leghuni unha te chekeni King Ehas ka mana igne.

¹⁷ King Ehas ne hata koko geridi chariot te mala hata khoꞌu teke horo ka bras na, eghuteuna mana jaola koko dis biꞌo teke au ka chariot igne. Eghuteuna king ne hata koko tangk biꞌo teke horo ka bras teke gnokro ke klignadi nabotho phei mumuju buluka nalhaꞌudi teke horo ka bras. Eghuteuna mana ne nhaꞌa soru tangk igne ke kligna gna kaisei vido teke horo mare ka thina biꞌo.

¹⁸ Te mala kelitagna King Tiglat-Pilesa gna Asiria na, King Ehas ne hata fadelei suga tapuale te mala tarai ka narane Sabat na. Eghuteuna bobotho grengatha gna Sugablahi te mala leghuni king gna Juda na.

¹⁹ Keha glepo teke edi King Ehas re, mare neke rioriso soru ka Buka Eidi Glepo Teke Edi Hatimare Mae King Di Juda.

²⁰ Kate lehe mana na, mare neke giugilui ni mana ka bekudi hatimare mae king ka nogna namono biꞌo King Devet. Eghuteuna mae Hesekaea, thugna mana na neke king tughuni mana.