Fapea Kings 15 - Buka Blahi Ka Cheke Holo

King Asaraea gna Juda

¹ Ka varadaki fitu finogha te king fapea Jeroboam Israel igre, mae Asaraea thugna King Amasaea ne king Juda.

² Ka narane tuare, mana neke nabotho namno finogha gna. Eghuteuna mana neke king Jerusalem glimafulu phei finogha. Idogna na Jekolaea thaugna Jerusalem.

³ Mae Asaraea ne leghuni puhigna mae kmagna na ne edi glepo te doglo ka tathagna Lord.

⁴ Neubane eghu ngau, mana theome lhotidi naiknore te tei tarai ka keha vido blahi are, eghuteuna naiknore tei fafara nei gahu insens eghu fabrahu ka nodi vido blahi mala fafara mae bongihehe.

⁵ Lord ne nhaꞌa lao kaisei thubu te thono diꞌa fara te kiloi leprosi ka thinigna mae king na ne ghilei lehe mana. Aonu mana tei ne au sopa thegna ka kaisei suga, eghuteuna mae Jotam thugna mana igne teke gavana ka kantri Juda.

⁶ Keha glepo teke edi King Asaraea re, mare neke rioriso soru ka Buka Eidi Glepo Teke Edi Hatimare Mae King Di Juda.

⁷ Kate lehe mana na, mare ne giugiluni mana ka bekudi hatimare mae king ka nogna Namono biꞌo King Devet. Eghuteuna mae Jotam thugna mana igne teke king tughuni mana na.

King Sekaraea gna Juda

⁸ Ka tolufulu nhana finogha te king mae Asaraea Juda igre, mae Sekaraea thugna mae King Jeroboam neke king Israel. Eghuteuna mana neke king ka namono biꞌo Samaria namno nhigra.

⁹ Mae Sekaraea jateula mae kuꞌegna tifa ra neu ne edila unha te theome doglo ka tathagna Lord. Mana ne leghuni puhigna King Jeroboam thugna mae Nebat te diꞌa ia, eigna mana tifa na neke batudi naiknodi Israel re ka nakhibo.

¹⁰ Mae Salum, thugna mae Jabes, mana neke ghaoghatho mala faleheni King Sekaraea, aonu mana ne aknu faleheni mana Ibleam, aonu mana neke king tughuni mana.

¹¹ Keha glepo teke edi mae King Sekaraea re, mare neke rioriso soru ka Buka Eidi Glepo Teke Edi Hatimare Mae King Di Israel.

¹² Aonu nhaꞌa cheke teke cheke eghu Lord ka King Jehu tifa igne ne thoke mei tutuani, “Vikemu iagho te sukha ka fati phagusu igre ginauna mala king Israel.”

King Salum gna Israel

¹³ Ka tolufulu nheva finogha te king mae Asaraea Juda igre, mae Salum thugna mae Jabes ne king Israel. Mana neke king ka namono biꞌo Samaria kaisei nhigra kolho.

¹⁴ Ka narane tuare, mae Menahem thugna mae Gadi igne jifla Tiasa ne mei Samaria, eghuteuna mana ne aknu faleheni mae King Salum neke king thegna tughuni mana.

¹⁵ Keha glepo teke edi King Salum baludi nogna gaoghatho te theome doglo teke aknu faleheni King Sekaraea igre, mare neke rioriso soru ka Buka Eidi Glepo Teke Edi Hatimare Mae King Di Israel.

¹⁶ Ka narane tuare, mae Menahem jifla funugna Tiasa ne mei roꞌeni namono biꞌo Tapua, baludi naikno nei namono te gnafa te au faligohoni namono biꞌo tuana, naugna mare neke theome snakreni mana te ruma mei ke lamnagna nodi namono na. Mana blau gobi lepo gna namono biꞌo Tapua igne, nei goigonidi gaꞌase te bukla re, aonu mana alha pea thiꞌadi goro gaꞌase te bukla re.

King Menahem gna Israel

¹⁷ Ka tolufulu nheva finogha te king mae Asaraea Juda igre, mae Menahem thugna mae Gadi igne neke king Israel. Mana neke king ka namono biꞌo Samaria nabotho finogha.

¹⁸ Nu mana jaola neke theome keli ka tathagna Lord. Naugna ka narane te king mana te ghilei thokeni narane glehe gna na, mana leghuni puhigna King Jeroboam, thugna mae Nebat te diꞌa fara tifa ia, eigna mana neke batudi naiknodi Israel re ka nakhibo.

¹⁹ Ka narane tuare, King Pul gna Asiria ne mei Israel mala magra ka mare. Nu King Menahem ne tusu lao tolufulu fati thogha kilo silva ka King Pul, keha nanghagna mana na, mae Tiglat-Pilesa, mala snakreni mae Menahem te mala funei fruni di naiknodi Israel.

²⁰ Mae Menahem huhurudi mae te dedei di Israel igre mala tusu lao sileni ka mana mala folini King Tiglat-Pilesa. Mare te gnafa na ne sopa falao namno gobi gram silva. Eghuteuna King Tiglat-Pilesa hata sileni igne neke pulo ka nogna kantri na.

²¹ Keha glepo teke edi King Menahem re mare neke rioriso soru ka Buka Eidi Glepo Teke Edi Hatimare mae King Di Israel.

²² Eghuteuna kate lehe mana na, mare ne giugiluni mana ka bekudi mae kuꞌegna ra, eghuteuna mae Pekahaea thugna mana igne neke king tughuni mana.

King Pekahaea gna Israel

²³ Ka glimafulu finogha te king mae Asaraea Juda igre, King Pekahaea thugna King Menahem igne neke king Israel. Mana neke king ka namono biꞌo Samaria phei finogha.

²⁴ Nu mana jaola neke theome keli ka tathagna Lord na, naugna mana neke leghuni puhigna King Jeroboam thugna mae Nebat teke diꞌa fara tifa ia, eigna mana neke batudi naiknodi Israel ka nakhibo.

²⁵ Kaisei mae komanda ka nogna armi mae Peka, thugna mae Remalaea, mana ne ghaoghatho mala aknu faleheni King Pekahaea. Aonu mae Peka ne hata glimafulu maedi Gilead, eghuteuna mare mei ne aknu faleheni King Pekahaea ka vido mala poru ke lamnagna suga biꞌo mae king na jare Samaria. Eghuteuna mare jaola ne falehedi mae Agob ghe mae Arie. Aonu mae Peka neke king tughuni mana.

²⁶ Keha glepo teke edi King Pekahaea re mare neke rioriso soru ka Buka Eidi Glepo Teke Edi Hatimare Mae King Di Israel.

King Peka gna Israel

²⁷ Ka glimafulu phei finogha te king mae Asaraea Juda igre, mae Peka thugna mae Remalaea te king Israel na, eghuteuna mana ne funei ka namono biꞌo Samaria nabagna varadaki finogha.

²⁸ Nu mana jaola neke theome keli ka tathagna Lord na, naugna mana neke leghuni puhigna King Jeroboam thugna mae Nebat te diꞌa fara tifa ia, eigna mana neke batudi naiknodi Israel re ka nakhibo.

²⁹ Ka narane tuare, King Tiglat-Pilesa gna Asiria mei ne magra Israel. Mana uluni magra igne ne hata namono igre: Ijon, Abel-Bet-Maka, Janoa, Kedes, Haso. Mana jaola ne uludi namono te au ka thilo nohi Gilead, Galili nei ka nohi Naftali, eghuteuna mana hata naiknore ne tei Asiria.

³⁰ Ka varadaki finogha te king mae Jotam thugna King Asaraea Juda igre, mae Hosea thugna mae Ela igne ne ghaoghatho mala aknu faleheni King Peka. Aonu mae Hosea mei ne magra ne aknu faleheni mae Peka. Aonu mae Hosea neke king tughuni mana.

³¹ Keha glepo teke edi King Peka re mare neke rioriso soru ka Buka Eidi Glepo Teke Edi Hatimare Mae King Di Israel.

King Jotam gna Juda

³² Ka phei finogha King Peka thugna mae Remalaea te king Israel igre, Jotam thugna mae Asaraea igne neke king Juda.

³³ Ka narane tuare, mana varadaki glima finogha gnahi. Eghuteuna mana neke king Jerusalem nabotho namno finogha. Idogna mana na Jerusa neke thugna mae Sadok.

³⁴ King Jotam neke jateula teke edi mae kmagna ra neku neke edi glepo te theome doglo ka tathagna Lord.

³⁵ Nu vido blahi te mala tarai mae bongihehe ka nodi god re au ngala, eghuteuna naiknore fafara nei gahu insens eghu fabrahu ngala jare. Aonu mae Jotam neke babana fakeli grengatha ke raru gna nogna Sugablahi Lord na.

^36-37 Ka narane tuare, Lord neke kurudi King Resin gna Siria ghe King Peka gna Israel baludi nodi armi re mala tei magra ka naiknodi Juda. Keha glepo teke edi King Jotam re, mare neke rioriso soru ka Buka Eidi Glepo Teke Edi Hatimare Mae King Di Juda.

³⁸ Kate lehe mana na, mare ne giugiluni mana ka bekudi mae king tifa ra ka nogna namono biꞌo King Devet. Eghuteuna mae Ehas thugna mana igne neke king tughuni mana.