Fapea Kings 14 - Buka Blahi Ka Cheke Holo

King Amasaea gna Juda

¹ Ka fapea finogha te king mae Jehoas Israel igre, mae Amasaea thugna King Joas igne ne king Juda.

² Ka narane tuare, mana varadaki glima finogha gnahi, eghuteuna mana king Jerusalem varadaki nheva finogha. Idogna mana na thaugna Jerusalem, nanghagna na Jehoadin.

³ Mae Amasaea ne keli ka tathagna Lord na. Nu mana theome jateula King Devet, kuꞌegna mana tifa ia neu. Mana edi kolho unha teke edi mae Joas, mae kmagna na.

⁴ Eghume mana theome paꞌe soru nodi vido mala tarai mae bongihehe re, eghuteuna naiknore fafara nei gahu insens eghu fabrahu ka vido blahi igre.

⁵ Kate funei fruni King Amasaea Juda na, mana ne aknu falehedi phei mae biꞌo teke aknu faleheni mae kmagna na.

⁶ Nu mana theome aknu falehedi thudi phiamare re, naugna mana leghuni unha teke chekeni Lord ka nogna Vetula mae Moses igne, “Jame kaisei mae sitei theome leghuni vetula na, mana nabagna te lehe, nu ghotilo theome tangomana te faleheni kmagna mana na. Eghuteuna jame kaisei mae theome leghuni vetula na, ghotilo theome tangomana te faleheni thugna mana na. Eigna naikno igne mala lehe ka nogna najafra thegna.”

⁷ Nogna soldia mae Amasaea gre ne aknu falehe nabotho thogha soldia di Idom ka glogu te kiloi mare, “Glogu mala hata tahi.” Mana ne hata namono biꞌo Sela igne ka magra, eghuteuna mare kiloni namono igne Joktel, nangha igne au ngala mei thoke ka narane gognarogne.

⁸ Aonu mae Amasaea ne kuru tei keha mae mala tei filoni mae Jehoas king gna Israel mala magra ka mana.

⁹ Nu King Jehoas ne cheke eghu ka mana, “Kaisei fata, kaisei phono gna Lebanon ne fatei cheke ka kaisei gaju biꞌo gna Lebanon, ne cheke eghu, ‘Iagho snakreni thumu gaꞌase na mala tolaghi ka mae thugu nalhaꞌu iara gne.’ Nu kaisei bosu mhata gna Lebanon khale ka gnarho igne ne klopa.”

¹⁰ Eghuteuna mana neke cheke eghui, “Tutuani, iagho neke ulunihi armi gna Idom ia ka magra, eghuteuna gognarona iagho fahaehaghe fara. Te keli na iagho tei au kolho ka sugamu na mala fahaehaghe nigho themu. Thosei eni kaisei puhi, naugna mana ginauna na goigoni nigho mana nei naiknodi Juda.”

¹¹ Nu King Amasaea ne tirogna fanomho ka King Jehoas. Aonu King Jehoas gna Israel ne mei balugna nogna armi na magra ka King Amasaea gna Juda. Phei armi igre haghe ne farithafoi ne magra ka namono Bet-Semes.

¹² Ka magra igne, King Amasaea balugna nogna armi na suaraghi fapulo rikha neke pulo ka namono dire.

¹³ Nu King Jehoas lokini King Amasaea. Eghuteuna mana balugna nogna armi ne tei Jerusalem, eghuteuna mare ne paꞌe soru gringni thina gna namono biꞌo na, fufunu ka Grengatha gna Efrem, tei posa ka Grengatha gna Kona. Keha phile gna gringni te paꞌe soru mare igne jame kaisei gobi nhanasalei mita.

¹⁴ Mana ne hata gol nei silva teure baludi keha famane glepo te keli teke au ka nogna Sugablahi Lord na, eghuteuna mana jaola neke hata glepo te keli teke au ka suga gna king. Aonu mare hata glepo igre neke pulo Samaria. Eghuteuna mare jaola ne hata keha naiknodi Juda teke sesekai mare ka magra na.

¹⁵ Keha glepo teke edi mae King Jehoas, baludi glepo te biꞌo teke edi mana kani teke magra ka King Amasaea igre, mare neke rioriso soru ka Buka Eidi Glepo Teke Edi Hatimare Mae King Di Israel.

¹⁶ Eghuteuna kate lehe mae King Jehoas na, mare ne giugilu thini gna mana na Samaria, ka bekudi kuꞌegna re, eghuteuna thugna mana, mae Jeroboam neke king tughuni mana Israel.

King Amasaea gna Juda ne lehe

¹⁷ King Amasaea gna Juda karha neu nabagna nabotho glima finogha ke leghugna te lehe King Jehoas gna Israel.

¹⁸ Keha glepo teke edi mana re, mare neke rioriso soru ka Buka Eidi Glepo Teke Edi Hatimare Mae King Di Juda.

¹⁹ Keha mae jare Jerusalem ghaoghaho mala faleheni King Amasaea, nu mana rikha ne tei Lakis. Nu mare ne kurudi keha mae ne tei ke leghugna mana ne aknu faleheni mana ka namono igne.

²⁰ Aonu mare hata thini gna mae Amasaea na neke pulo Jerusalem ka hose neke giugilu ka bekudi hatimare mae king tifa ra ka nogna namono biꞌo King Devet.

²¹ Kate nabotho namno finogha gna mae Asaraea thugna mae Amasaea na, naiknodi Juda gre ne vahini mana mala king tughuni King Amasaea.

²² Ka narane ke leghu gna te lehe King Amasaea igre, King Asaraea tei ne magra Elat, eghuteuna mana neke hata fapulo namono igne neke babana fapulo.

Fapea Jeroboam king gna Israel

²³ Ka nabotho glima finogha mae Amasaea te king Juda igre, mae Jeroboam thugna King Jehoas igne jaola ne king Israel. Mana ne king ka namono biꞌo Samaria phiatutu kaisei finogha.

²⁴ Mae Jeroboam theome keli ka tathagna Lord na, naugna mana ne leghuni puhigna King Jeroboam, thugna mae Nebat tifa ia, eigna mana neke batudi naiknodi Israel re ka nakhibo.

²⁵ Fapea Jeroboam igne neke hata fapulo nodi vido glose mae Israel te funu ke raru Lebo-Hamat tei thoke ke mata Thongna Lehe. Mana neke leghuni unha teke chekeni Lord, nodi God mae Israel. Mana teke nhaꞌa cheke ka nogna mae gloku profet Jona thugna mae Amitai, maegna Gat-Hefa.

²⁶ Ka narane tuare, Lord neke filoni naꞌau papara te thokedi naikno te gnafa Israel igre, neubane naikno sneka ba snagla, theo kaisei naikno te toghodi re.

²⁷ Neke theome nogna gaoghatho Lord te mala thofno roꞌeni Israel na, nu mana neke cheke ka nagnafagna King Jeroboam, thugna mae Jehoas, mala fakarhidi mare.

²⁸ Gobigna lepo teke edi King Jeroboam igre, nei teke frane mana ka vido te magra igre, nei teke hata fapulo mana phei namono Damaskas ghe Hamat ka kantri Juda teke nogna mae Asaraea igre eghu, mare neke rioriso soru ka Buka Eidi Glepo Teke Edi Hatimare Mae King Di Israel.

²⁹ Kate lehe mae Jeroboam na, mare ne giugiluni mana ka bekudi mae kuꞌegna re, eghuteuna thugna mana, mae Sekaraea gne neke king tughuni mana.