Fapea Kings 13 - Buka Blahi Ka Cheke Holo

King Jehoahas gna Israel

¹ Ka varadaki thilo finogha te funei fruni mae Joas thugna mae King Ahasaea igre, King Jehoahas thugna mae King Jehu ne king Israel. Mana neke king ka namono biꞌo Samaria nabotho fitu finogha.

² Mae king igne jaola ne theome keli ka tathagna Lord na, eghuteuna mana batudi naiknodi Israel ka nakhibo. Mana theome ke tughu puhigna te diꞌa na jateula King Jeroboam thugna mae Nebat tifa ia neu.

³ Aonu Lord ne diꞌatagna ka naiknodi Israel igre, kmana finogha mana neke snakredi mala au ke parigna nogna nolaghi King Hasael gna Siria ghe Ben-Hadad mae thugna na.

⁴ Aonu King Jehoahas ne tarai ka Lord mala toghodi nogna naiknore, eghuteuna Lord ne nomhini nogna tharai mana na, naugna mana ne filo glanini king gna Siria te thofno goigonidi naiknodi Israel igre, ne cheke tughuni nogna tharai mana na.

⁵ Aonu Lord ne kuruni kaisei mae lida mala tei fakarhidi ka khamedi mae Siria. Eghuteuna mare neke au fakeli ka nodi namonore jateula teke tifa ra neu.

⁶ Nu puhi te diꞌa teke batudi mae Jeroboam naiknodi Israel re igne theome gnafa ka mare, eghuteuna mumuju gna god gaꞌase Asera igne au ngala jare Samaria.

⁷ Ka narane tuare, King Jehoahas theome au nogna kmana soldia te mala magra na, naugna mae king gna Siria igne neke goigonidi nei falehedi neku mare. Mana au glimafulu soldia kolho te mala saghe ka hose na, eghuteuna nabotho chariot, nei nabotho thogha soldia.

⁸ Keha gobigna lepo teke edi mae Jehoahas baludi glepo te biꞌo teke edi mana ka magra igre, mare neke rioriso soru ka Buka Eidi Glepo Teke Edi Hatimare Mae King Di Israel.

⁹ Kate lehe mana na, mare ne giugiluni mana Samaria, eghuteuna thugna mana, mae Jehoas igne neke king tughuni mana.

King Jehoas gna Israel

¹⁰ Ka tolufulu fitu finogha te funei fruni King Joas Juda igre, mae Jehoas, thugna King Jehoahas igne neke king Israel. Mana neke king ka namono biꞌo Samaria nabotho namno finogha.

¹¹ Nu mae Jehoas neke jateula King Jeroboam teke diꞌa puhigna na ka tathagna Lord na, eigna mana neke batudi naiknodi Israel re ka nakhibo.

¹² Keha glepo teke edi King Jehoas baludi glepo te biꞌo teke edi mana ka teke magra ka King Amaesaea gna Juda igre, mare neke rioriso soru ka Buka Eidi Glepo Teke Edi Hatimare Mae King Di Israel.

¹³ Kate lehe mana na, mare ne giugiluni mana ka namono biꞌo Samaria ka bekudi kuꞌegna re, eghuteuna thugna mana, mae Jeroboam gne neke king tughuni mana.

Profet Elisa ne lehe

¹⁴ Ame lehe nga King Jehoas teuna, profet Elisa neke fogra fara neke namo lehe. Aonu King Jehoas tei ne sighoni mana, ne tanhi eghu eigna mana, “Mama ghe! Mama ghe! Iagho nodi greoreo maedi Israel!”

¹⁵ Aonu mae Elisa ne cheke eghu ka mana, “Iagho tei hata mei kaisei phaloho nei keha jata eghu.” Aonu mae Jehoas tei ne hata ne mei,

¹⁶ eghuteuna mae Elisa ne cheke ka mana mala tarabana mala fada, eghuteuna mae Elisa ne habo khamegna na ka khamegna king.

¹⁷ Aonu mae Elisa ne cheke eghu ka mana, “Iagho tei tora wida te filo tei fei Siria ana.” Aonu king tei ne tora. Eghuteuna mana neke cheke eghui ka King, “Aonu, fada gho.” Aonu king ne fada. Eghuteuna mae Elisa ne eha eghu fabiꞌo, “Iagho nogna jata Lord! Mana ginauna togho nigho iagho mala uludi naiknodi Siria! Iagho ginauna tei magra ka namono biꞌo Afek, eghuteuna iagho ginauna na thofno uludi naiknodi Siria.”

¹⁸ Mae profet Elisa ne cheke eghu ka mae king, “Iagho hata keha jata, eghuteuna iagho puri sukha ka glose na.” Aonu king hata jata igre ne thilo fata puri sukha ka glose na.

¹⁹ Nu puhi igne theome doglo ka mae profet, aonu mana ne cheke eghu ka king, “Jame puri sukha iagho ka glose gne glima fata ba namno fata meuna, iagho jame neke thofno uludi fara maedi Siria re, nu iagho ginauna thilo fata kolho nate uludi mare na.”

²⁰ Aonu mae Elisa ne lehe, eghuteuna mare ne giugiluni mana. Leuleghu finogha ka narane te mala joꞌu gano na, tothoghei soldia di Moab gre sughu mei koba Israel mala blau glepo.

²¹ Kaisei fata, keha naiknodi Israel pala kaisei thini mala tei giugilu. Eghuteuna mare ne filoni kaisei tothoghei soldia gna Moab ne mei, aonu mare ne koko sukha thini igne ka beku gna profet Elisa na ne rikha nodi. Nu kate tei te loku fodu thini igne ka nhubra gna mae Elisa gre, thini igne neke karha fapulo ne kegra haghe!

Naiknodi Israel magra ka naiknodi Siria

²² Ka narane teke king mae Jehoahas Israel igre, King Hasael gna Siria mei ne goigonidi koba mare.

²³ Nu Lord keli ranghidi nei kokhonidi eghu naiknodi Israel gre. Aonu mana theome snakreni armi gna Siria gne te mei goigonidi mare na. Leghu fata na Lord toghodi mare naugna mana neke nhaꞌa cheke balugna mae Ebraham, mae Isak nei mae Jekop tifa. Eghuteuna mana neke khidi maedi Israel mala tei au fakhaba ka mana.

²⁴ Kate lehe King Hasael na, mae Ben-Hadad, thugna mana igne neke king gna Siria.

²⁵ Aonu King Jehoas tei ne magra ka mae Ben-Hadad thilo fata. Eghuteuna mae Jehoas ne uluni mana thilo fata, eghuteuna mana neke hata fapulo namono te gnafa teke hata mae Hasael ka kmagna mana, mae King Jehoahas.