Fapea Kings 12 - Buka Blahi Ka Cheke Holo

Mae Joas king gna Juda

¹ Ka fitu finogha te king mae Jehu Israel igne, mae Joas ne king gna Juda. Mana neke king Jerusalem phiatutu finogha. Idogna mana Sibia igne neke thau gna Bereseba.

² King Joas ne au doglo ka tathagna Lord na, naugna mae pris Jehoeada neke farirhiuni mana.

³ Neuba, mana neke theome goigoni nodi vido mala tarai mae bongihehe igre, naugna igne, naiknore ne theome gnafa te fafara nei gahu insens teu jare na.

⁴ Kaisei fata, King Joas ne cheke eghu ka hatimare mae pris, “Sileni teke fafara naiknore ka nogna Sugablahi Lord igre mala tusu lao ka mana, ghotilo mala tathajiu mala ke babana Sugablahi ana. Sileni teke takis ka sensas, sileni teke famei naiknore te mala fagnafa gna nodi nhaꞌa cheke na, nei sileni teke koko naiknore ka Sugablahi na leghuni unha teke magnahagheni mare na.

⁵ Kate fadoglini ghotilo glokugna Sugablahi gne, ghotilo tangomana te hata sileni ka mae iheire te mala reireghi sileni are. Tuare sileni te mala loku ghotilo te mala fakekheligna unha te diꞌa ka Sugablahi na.”

⁶ Nu ke lamnadi varadaki thilo finogha te king mae Joas igre, hatimare mae pris igre neke theome eni kaisei gloku ka Sugablahi na.

⁷ Aonu king ne kilo meini mae pris Jehoaida baludi keha mae pris, ne cheke eghu ka mare, “Naugna unha si ghotilo te theome edi keha gloku ka Sugablahi ignea? Funu gognaro gne, ghotilo thosei ke hata sileni ka mae iheire te reireghidi sileni are. Sileni tuana, ghotilo mala ke fakekheli kolho Sugablahi igne.”

⁸ Aonu mae pris igre ne kaisei gaoghatho ka nogna cheke mae king igne. Eghuteuna mare ne jaola ne kaisei gaoghatho te mala lokugna Sugablahi igne ginauna, theome ka khamedi mare thedi kolho, nu ka khamedi hatimare mae gloku kolho.

⁹ Eghuteuna mae Pris Jehoaida ne hata kaisei bokis ne eni kaisei khora ka fofotho gna na, aonu mana ne lilisei bokis igne rhegna olta na, phile fei nheta kate mala ruma haghe naikno ka Sugablahi na. Hatimare mae pris te loku ka grengatha gna Sugablahi na nhaꞌa lao sileni te hata te mei naiknore ka bokis igne.

¹⁰ Leuleghu fata na bokis igne fodu ka sileni, nogna sekretri mae king balugna mae pris biꞌo igne, phiamare mei ne kaha sileni igre ne hohono ka baeg.

¹¹ Ke leghugna te rioriso soru naba sileni igne, phiamare hata ne tei sileni igne ka mae funei gna gloku te mala loku gna Sugablahi igne. Sileni igne mala jaola folidi hatimare mae kapenta, mae iheire te loku,

¹² nei mae iheire te kato thina, nei keha glepo te mala loku ka Sugablahi igne.

¹³ Sileni igne theome mala foli glepo teke horo ka silva kapu, besin, glepo mala ifu, glepo mala fagagae juta, nei keha glepo teke horo ka silva ba ka gol.

¹⁴ Nu mala folidi kolho mae gloku, nei keha glepo te mala eni fakeligna Sugablahi igne.

¹⁵ Mae funeidi mae gloku igre loku fakeli fara fei sileni na, naugna puhidi mae igre thofno doglo fara.

¹⁶ Nu sileni te fafara kate poloru, nei sileni te fafara te mala doglo ka tathagna Lord na teu igre theome mala lilisei ka bokis, naugna mala nodi mae pris kolho.

¹⁷ Ka narane tuana, King Hasael gna Siria tei ne magra Gat ne hata namono biꞌo tuana. Ke leghugna igne, mana ghaoghatho mala mei snura Jerusalem.

¹⁸ Nu kate nomhini King Joas igne, mana tei ka nogna Sugablahi Lord na ne hata fajifla gobigna lepo te keli fara teke fafara King Jehosafat, nei King Joram nei King Ahasaea, thilo mae kuꞌegna mana neke fablahidi glepo igre. Mana hata fajifla glepo igre ne lilisei baludi nogna glepo thegna re. Eghuteuna mana jaola ne hata fajifla gol te gnafa teke nanhaꞌa naiknore ka Sugablahi igne, nei gol teke au ka nogna suga na. Aonu mana ne fatei glepo igre ka mae Hasael king gna Siria. Aonu king baludi nogna soldia re figri neke pulo ne theome mei Jerusalem.

¹⁹ Keha glepo teke edi mae King Joas re, mare neke rioriso soru ka Buka Eidi Glepo Teke Edi Hatimare Mae King Di Juda.

^20-21 Mae Josabad thugna mae Simeata ghe mae Jehosabad thugna mae Soma, phei nogna mae biꞌo King Joas igre ne ghaoghatho mala faleheni mana. Aonu phiamare ne aknu faleheni mana Jerusalem ka vido teke fasasare mare rhegna nabrou te tei posa Sila. Mare ne giugiluni mana ka bekudi mae kuꞌegna re ka nogna namono biꞌo mae King Devet, eghuteuna thugna mana, mae Amasaea igne neke king tughuni mana.