Fapea Kings 11 - Buka Blahi Ka Cheke Holo

Kuin Atalaea gna Juda

¹ Kate filoni Kuin Atalaea, idogna King Ahasaea gna Juda, te lehe thugna na, naꞌa ne funu aknu falehe tharakna gna king.

² Nu kaisei thugna mae Ahasaea ngala te rikha na, nanghagna na mae Joas. Mana namo lehe baludi keha thudi hatimare mae king, nu kaisei fapea idogna mana Jehoseba, thugna gaꞌase King Jehoram, ne fakarhini mana. Naikno biꞌo igne greghagna King Ahasaea. Naꞌa tei ne tathaleini mae Joas balugna thau te mala fachuꞌuni mana na, ne tei pophorudi ka kaisei chogho ke lamna Sugablahi. Aonu kuin ne theome tangomana te faleheni mana na.

³ Mae Joas ne poru fabrahu neu ka Sugablahi na nabagna namno finogha ka narane te kuin Atalaea te funei fruni ni Juda.

⁴ Nu ka fafitu finogha gna na, mae Pris Jehoeada ne fatei cheke ka hatimare mae komanda te mala reireghidi tharaknagna mae King nei mae komanda te mala reireghi gna nogna suga Kuin na teu igre, mala mei ka nogna Sugablahi Lord na, mala eni kaisei nhaꞌa cheke ka mare. Eghuteuna mana ne fakakhana ka mare mae Joas thugna mae King Ahasaea.

⁵ Eghuteuna mana ne cheke faheta eghu ka mare cheke igre, “Kate mei te loku ghotilo ka narane Sabat na, ghotilo ginauna fofota ka thilo tothoghei. Kaisei na mala reireghi gna nogna suga kuin na,

⁶ eghuteuna kehana mala reireghi gna grengatha te kiloi mare, Suri Grengatha, eghuteuna kaisei na mala reireghi gna grengatha ke leghugna fapea tothoghei na.

⁷ Keha phei tothoghei teke theome loku ka narane Sabat ra ginauna mei kegra ka Sugablahi gne mala reireghini mae sitei te mala king igne.

⁸ Ghotilo ginauna mala reireghini King Joas balu naflahi, eghuteuna ghotilo tei balugna aheva te tei mana na. Jame ihei te mei namo ka mana na, ghotilo aknu falehe mae tuana.”

⁹ Aonu hatimare mae komanda igre ne leghuni unha te chekeni mae pris biꞌo Jehoeada igne. Mare hata ne mei mae soldia teke theome loku ka narane Sabat ra baludi mae teke loku ra eghu ne kafe mei.

¹⁰ Mana falao ka mare neke nogna goru nei greoreo teku mae King Devet teke tathaji teku ka nogna Sugablahi Lord na tifa ra.

¹¹ Eghuteuna mae grereghi re ne fakegra faligohoni mae sitei na balu naflahi. Mare kegra rhegna olta na ka Sugablahi na, eghuteuna mare kegra vido te gnafa ka Sugablahi na.

¹² Aonu mae Jehoeada ne batuni mae Joas ne jifla mei ka Sugablahi na ne lisei lao khepi nafnakno na ka phaꞌugna mana na. Eghuteuna tusu lao ka mana kaisei buka vetula te mala leghuni hatimare mae king, eghuteuna tofa oel ka phaꞌugna mana na. Eghuteuna chekeni ka naiknore te mana ngala te king gognarona. Aonu naiknore ne proaprosa ne eha eghu fabiꞌo, “Iagho king fabrahu!”

¹³ Kate nomhini Kuin Atalaea naogla biꞌo te edi mae te reireghi nei naiknore teu igre, naꞌa ghosei ne tei ka nogna Sugablahi Lord na, ka vido aheva te au teu nakhapru biꞌo na.

¹⁴ Jare naꞌa ne filoni mae king majaghani te kegra teu rhegna khegra biꞌo gna Sugablahi na. Igne nogna vido mala au mae king ka nodi kastom mare na. Hatimare mae komanda ne kegra faligohoni mana. Eghuteuna naiknore ne kelitadi fara ne kafe eha fabiꞌo balu kufli. Aonu Kuin Atalaea diꞌanagnafa gna fara ne rerheku nogna pohe na ne eha eghu, “Majora! Majora!”

¹⁵ Pris Jehoeada theome magnahaghedi mare te faleheni kuin ka vido Sugablahi na, aonu mana ne cheke eghu ka hatimare mae komanda, “Ghotilo hata jifla thau tuana ka mae te reireghi are, mala hata tei mare kosi. Jame ihei te fariuriu fakarhini thau igne, ghotilo ginauna na jaola aknu falehe mae tuana.”

¹⁶ Aonu mare ne lokini naꞌa hata ne tei ka grengatha te mala ruma hose ka nogna vido king na ne faleheni naꞌa jare.

Pris Jehoeada ne paꞌe soru nogna Sugablahi Baal na

¹⁷ Mae Pris Jehoeada ne hata King Joas baludi naiknore mala baubahu leghuni nogna nhaꞌa cheke Lord na, aonu mare ne nhaꞌa cheke mala au jateula nogna naikno Lord eghu kolho. Eghuteuna mana jaola neke cheke ka king mala eni kaisei nhaꞌa cheke mala ghatho tahudi naiknore, eghuteuna naiknore mala leghuni king.

¹⁸ Mare kafe tei ka nogna Sugablahi Baal na ne paꞌe soru pari. Eghuteuna mare ne goigoni fahui olta te gnafa nei mumuju te gnafa teu ka vido te gnafa igre. Eghuteuna mare ne aknu faleheni mae Matan nogna pris Baal igne rhedi olta re. Pris Jehoeada ne cheke ka mae soldia re mala reireghini nogna Sugablahi Lord na.

¹⁹ Mana baludi nodi komanda mae mala reireghi, nei mae mala reireghi gna nogna suga mae king, mare hatani King Joas ne jifla funu ka Sugablahi na ne tei ka suga gna King na, eghuteuna naiknore ne tei ke leghudi mare. Mae Joas ne ruma ka nodi grengatha mae te mala reireghi igre, eghuteuna mana tei ne gnokro ka nogna sape nafnakno na.

²⁰ Aonu naikno te gnafa Juda igre ne kafe glealeꞌa fara, eghuteuna namono biꞌo na ne kafe muana soru, naugna mare neke aknu faleheni Kuin Atalaea ka nogna suga na.

²¹ Mae Joas ne fitu finogha gna kolho kate king mana Juda na.