Fapea Kings 10 - Buka Blahi Ka Cheke Holo

Tharaknagna King Ehab na ne lehe

¹ Fitusalei vikegna King Ehab re au ngau Samaria. Aonu mae Jehu ne rioriso letas ne fatei ka mae biꞌo nei ka mae mala baubatu ka namono igne, nei ka iheire te reireghidi tharaknagna King Ehab.

² Mana ne cheke eghu, “Ghotilo mae te reireghidi vikegna mae Ehab te au teu ka khamemi ghotilo ra, nei ghotilo mae te fiofilodi chariot nei hose nei glepo mala magra teu ra, nei ghotilo te au ka namono biꞌo te bara te lithui ka thina teu ra. Kate filoni ghotilo letas igne,

³ ghotilo vahini kaisei mae te keli ka tharaknagna mae King mala king gna Israel. Aonu ghotilo tarabana mala magra fothi ghami.”

⁴ Nu mae biꞌodi Samaria igre nomhini igne ne mhaghu nodi fara, ne cheke eghu, “Tahati gne theome naba te tei magra ka mae Jehu na. Phei mae king igre, Joram ghe mae Ahasaea ra neke theome tangomana teke uluni mana na.”

⁵ Aonu mae biꞌo te mala reireghi gna nogna suga biꞌo king na, mae gavana gna namono biꞌo na, nei keha mae mala baubatu, nei mae iheire te mala reireghidi vikegna King Ehab igre eghu ne cheke eghu fapulo ka mae Jehu, “Ghehati nou mae gloku iagho, eghuteuna ghehati tarabana te mala eni unha te chekeni iagho na. Nu ghehati ginauna na theome tangomana na teke vahini keha mae king na. Eni sagho unha te doglo ka gaoghathomu iagho na.”

⁶ Aonu mae Jehu neke rioriso tei keha letas na ka mare, ne cheke eghu, “Gognarona iara au agne Jesrel. Jame te phile tutuani ghotilo ka iara na, eghuteuna leghudi nogu cheke iara igre teuna, ghotilo hata mei ka iara phaꞌudi vikegna nomi mae funei ghotilo ia, jateula gognarogne eghu nathuꞌu na.” Fitusalei mae majaghani igre au ka khamedi hatimare mae mala baubatu gna namono Samaria.

⁷ Kate filoni mae mala baubatu igre nogna fapea letas mae Jehu igne, mare ne kafe aknu falehe fitusalei mae igre, eghuteuna mare ne kusu koko phaꞌudi re. Eghuteuna mare hohono ka kharaꞌo phaꞌudi mae igre hata ne tei ka mae Jehu Jesrel.

⁸ Kate hata te tei mare Jesrel phaꞌu igre, kaisei mae tei ne cheke ka King Jehu. Aonu mae Jehu ne chekedi nogna mae gloku re mala lilisei mare phaꞌu igre ka phei bukrei kosi ka grengatha gna namono na, mala au jare ghilei thoke ka keha narane na.

⁹ Hamerane, mana ne tei ka grengatha igne, ne cheke eghu ka naiknore, “Ghotilo thosei mhaghu, ghotilo theome nabami te papara ka puhi igne. Iara neke eni gaoghatho igne ranghini King Joram, eghuteuna iara neke faleheni mana. Nu mae iheire teke falehedi mae igre? Theome iara kolho!

¹⁰ Ghotilo laseni, gobigna lepo teke chekedi Lord eidi vikegna mae Ehab ra la thoke mei tutuani. Lord neke eni unha teke nhaꞌa chekeni mana tifa ka nogna profet Elija.”

¹¹ Aonu mae Jehu ne aknu falehe ne gnafa keha mae ka vikegna King Ehab teke au ka namono Jesrel, eghuteuna hatimare mae biꞌo, eghuteuna hatimare mae kheragna fofodu king, eghuteuna nogna mae pris mana re eghu ne kafe lehe, theo kaisei te karha na.

Mae Jehu ne aknu falehe kheragna King Ahasaea

¹² Aonu mae Jehu baludi nogna soldia re jifla Jesrel ne tei Samaria. Mare ne mei ka vido aheva te au fabrahu tagna mae te reireghi sipu gre.

¹³ Ka vido igne, mare ne thafodi keha kheragna King Ahasaea gna Juda. Mae Jehu ne ghusna eghu ka mare, “Ghotilo mae iheire sia?” Mare ne cheke eghu, “Ghehati kheragna King Ahasaea. Eghuteuna ghehati mala tei Jesrel mala sighodi tharaknagna king ra nei goro thugna Kuin Jesebel.”

¹⁴ Mae Jehu ne cheke eghu ka nogna mae soldia re, “Lolhoku ghotilo are!” Aonu mare hatadi ne tei rhegna seu Bet-Eked ne aknu falehedi. Khaputidi mae igre thokeni phiatutu phei mae, eghuteuna theo kaisei te karha na.

Tharakna gna King Ehab teke karha teku re ne kafe lehe

¹⁵ Mae Jehu jifla jare ne tei thafoni mae Jehonadab, thugna mae Rekab. Eghuteuna king ne kubae ka mana, ne cheke eghu, “Ba, tapa kaisei gaoghatho kolho?” Mae Jehonadab ne cheke eghu ka mana, “Uve.” Eghuteuna mae Jehu ne cheke eghu ka mana, “Keli fara! Kubae gho!” Aonu mae Jehu loku ka khamegna mana na ne korho haghe ka nogna chariot na.

¹⁶ Mae Jehu neke cheke eghui, “Gognarona iagho mei balugu iara mala filoni themu te loku iara ranghini Lord na.” Aonu phiamare kafe saghe ka chariot na ne tei Samaria.

¹⁷ Kate thoke phiamare Samaria na, mae Jehu ne kafe aknu falehe ne gnafa vikegna mae King Ehab re, theo kaisei te karha na. Igne unha teke chekeni Lord ka mae Elija tifa ia.

Naikno te pogho soru ka Baal igre mala lehe

¹⁸ Aonu mae Jehu ne kilo meidi naikno di Samaria. Eghuteuna mana ne cheke eghu ka mare, “King Ehab neke loku ranghini Baal katha kolho, nu iara ginauna thono pogho soruni mana.

¹⁹ Ghotilo kilo meidi nogna mae profet te gnafa nei mae pris te gnafa teu Baal ra mala mei filo ghau iara, eghuteuna naikno te pogho soru ka Baal ra mala jaola mei. Iara ginauna na eni kaisei fafara biꞌo ka Baal, eghuteuna ihei te theome mei na, iara ginauna faleheni mana.” Nu mae Jehu chaghidi mare, naugna mana ghaoghatho mala aknu falehe gnafa naikno te pogho soru ka Baal.

²⁰ Mae Jehu ne cheke eghu ka mare, “Ghotilo vahini kaisei narane mala kafe mei tarai tahati ka Baal.” Aonu mare ne vahini kaisei narane.

²¹ Mae Jehu ne fatei cheke ka namono te gnafa Israel. Aonu naikno te gnafa te pogho soru ka Baal igre ne kafe mei, eghuteuna theo kaisei te fanu-nhughui na. Aonu mare ne kafe tei ruma lamna Sugablahi mala pogho soru ka Baal, eghuteuna Sugablahi igne fou ne ngata ka naikno.

²² Mae Jehu ne chekeni mae ihei te reireghidi mae pris mala hata mei nodi phoko blahi nogna pris Baal gre mala thofno tufa ka naikno te tarai ka Baal igre.

²³ Aonu mae Jehu ghe mae Jehonadab thugna mae Rekab ne ruma ka Sugablahi na. Jehu ne cheke eghu ka nogna pris Baal re, “Filo faligoho, glahu kaisei naikno te pogho soru ka Lord na mei lamna Sugablahi. Tahati nogna naikno Baal ra kolho te mala mei agne na.”

²⁴ Aonu mae Jehu ghe mae Jehonadab ne tei ka nogna vido blahi Baal na ne gahu fafara ka mana. Eghuteuna mae Jehu ne vavahi nhanasalei soldia mala tarabana ke kosigna Sugablahi na. Mana ne cheke eghu ka mare, “Ghotilo thosei snakreni kaisei naikno ke lamnagna Sugablahi igne mala rikha. Jame ihei ka ghotilo te snakreni kaisei naikno te rikha na, mae tuana mala lehe tughuni naikno te rikha tuana.”

²⁵ Kate fafara te gnafa na, mae Jehu jifla kosi ne cheke eghu ka nogna mae komanda nei soldia teure, “Ghotilo ruma mala kafe aknu falehedi hui, thosei snakreni kaisei mala rikha!” Aonu mare ruma balu naflahi ne aknu falehedi ne hui naiknore. Eghuteuna mare ne koko fajifla thinidire kosi. Aonu mare neke ruma lamna ka chogho blahi na.

²⁶ Aonu mare pala ne jifla mumuju thina blahi teke au jare na ne gnubra ka khaꞌaghi.

²⁷ Mare ne thofno goigoni thina blahi igne, eghuteuna mare ne paꞌe soru nogna Sugablahi Baal. Eghuteuna mare horo Sugablahi igne mala ke nodi mala tei mata, igne eghu ngala ghilei mei thoke ka narane gognarogne.

²⁸ Ka puhi igne, mae Jehu ne goigoni fahui vido blahi te hui te mala pogho soru ka Baal Israel.

²⁹ Neuba, mae Jehu neke theome goigoni phei mumuju buluka nalhaꞌudi teke horo mae Jeroboam thugna mae Nebat ka gol. Mana neke lilisei kaisei Betel, eghuteuna keha na Dan. Mana neke batudi naiknodi Israel gre neke pogho soru ka phei mumuju igre.

³⁰ Lord ne cheke eghu ka mae Jehu, “Iagho la edihi gobigna lepo teke magnahaghedi iara ka vikegna mae King Ehab ra. Eghume, iara nhaꞌa cheke ka iagho, fati mae ka vikemu iagho gre tei thoke ka fafati phagusu na ginauna kegra King Israel.”

³¹ Nu King Jehu neke theome thofno leghu fakelidi nogna vetula Lord, nodi God mae Israel. Mana theome koko puhigna King Jeroboam te diꞌa tifa ra, eghuteuna mana neke batudi naiknodi Israel mala pogho soru ka phia mumuju buluka nalhaꞌudi igre.

King Jehu ne lehe

³² Ka narane te king mae Jehu igre, Lord ne funu tugha soru nohigna kantri Israel. Eghuteuna lisa lao ka King Hasael gna Siria mala mei uludi mare ka magra.

³³ King igne mei neke hata nodi vido glose mare ka keha phile ke maghati Khoꞌu biꞌo Jordan, funu ke raru ka nohi Besan, tei posa ka nohi Gilead, balugna namono Arona ke mata Khoꞌu Anon. Vido glose igre au ke maghati gna nodi vido glose mae Manase, mae Gad nei mae Ruben.

^34-36 King Jehu neke king gna Israel, eghuteuna mana neke funei fruni Samaria varadaki nhana finogha. Gobigna lepo teke edi mae Jehu, baludi glepo biꞌo teke frane teke edi mana igre mare neke rioriso sukha ka Buka Eidi Glepo Teke Edi Hatimare Mae King Di Israel. Kate lehe mana na, mare ne giugiluni mana Samaria, eghuteuna mae Jehoahas thugna mana igne neke king tughuni mana.