Fapea Kings 1 - Buka Blahi Ka Cheke Holo

Profet Elija cheke faheta ka King Ahasaea

¹ Ke leghugna te lehe King Ehab igne, naiknodi Moab gre theome magnahaghedi naiknodi Israel te funei frunidi re, aonu mare magra ne khi fajifladi naiknodi Israel.

² Kaisei narane, mae Ahasaea king gna Israel uka ne ghoreho ka nogna suga na Samaria. Aonu mana kurudi keha mae nogna mae gloku mala tei ka namono Ekron ka kantri Filistia mala toreni Baal-Sebub, nodi god mae Ekron, mala laseni nake keli ba theo teuna.

³ Nu nogna engel Lord na mei ne cheke ka mae profet Elija, maegna Tisbe mala tei thafodi nogna mae gloku king gna Samaria, eigna mana kurudi mare mala tei Ekron. Eghuteuna engel ne cheke ranghini mae Elija mala cheke eghu mana ka mare, “Tore, naugna unha si ghotilo te magnahaghei tei toreni Baal-Sebub nodi god naiknodi Ekron grea? Ba, ne theo kaisei God te au agne Israel na?

⁴ Naugna igne, Lord ne cheke eghu ka king, ‘Naugna te eni iagho igne, iagho ginauna na theome tangomana te jifla kokoni nou sape na, eghuteuna iagho ginauna lehe tutuani.’ ” Eghuteuna mae Elija tei ne eni unha teke chekeni Lord na.

⁵ Mae igre nomhini nogna cheke mae Elija igne neke figri ka mae king. Aonu king ne ghusna eghu ka mare, “Naugna unha si teke pulo mei ghotilo gnea?”

⁶ Eghuteuna mare ne cheke eghu, “Ghehati neke thafoni kaisei mae ka nabrou na, eghuteuna mana neke cheke ranghi ghami ghehati mala ke figri mala cheke ka iagho unha teke cheke Lord ka mana na. Lord neke cheke eghu, ‘Naugna unha sagho te kurudi mae igre te tei toreni Baal-Sebub nodi god naiknodi Ekron igrea!? Ba, naugna ne theo kaisei God te au agne Israel na? Naugna te eni iagho igne, iagho ginauna na theome tangomana te jifla kokoni nou sape na, eghuteuna iagho ginauna lehe tutuani.’ ”

⁷ King ne ghusna eghu, “Mana na jateula mae ihei eghu?”

⁸ Mare ne cheke eghu, “Mae igne pipichi ka pohe teke horo ka khakla kamel, eghuteuna hugha ka glepo teke horo ka guli buluka.” Eghuteuna king ne cheke eghu, “Elija gne kaisei maegna Tisbe!”

⁹ Aonu king ne kuruni kaisei mae komanda balugna glimafulu soldia, mala tei hata meini mae Elija. Eghuteuna kate posa mare ka mana na, mana gnokro neu ke kligna gna kaisei thogele. Aonu mae komanda igne ne cheke eghu ka mana, “Ei, iagho mae mala toutonuni chekegna God ia, king magnahaghei nigho iagho te soru mei mala tei filoni king.”

¹⁰ Nu mae Elija ne cheke eghu, “Jame te nogna mae profet tutuani God iara na, khaꞌaghi na ginauna soru mei funu kligna, mala gnubra nigho iagho baludi glimafulu nou mae soldia iagho are.” Theome raugha, khaꞌaghi na ne soru mei ne gnhubra mae komanda igne baludi nogna mae soldia re.

¹¹ Aonu mae king neke kuru teini keha mae komanda na balugna glimafulu soldia mala tei filoni mana. Mae komanda igne ne jaola ne cheke eghu ka mana, “Ei, iagho mae mala toutonuni chekegna God ia, king magnahaghei nigho iagho te faghose soru mei.”

¹² Nu profet ne cheke eghu, “Jame kaisei nogna mae profet tutuani God iara meuna, khaꞌaghi ginauna soru mei funu kligna mala gnubra nigho iagho baludi nou mae soldia iagho are.” Ka vido narane tuanala, khaꞌaghi na ne soru mei ne gnhubra mae komanda igne baludi nogna mae soldia re.

¹³ Aonu king neke kuru teini fatilo mae komanda na balugna keha glimafulu nogna soldia. Mae komanda igne ne haghe ka thogele na, ne tanhi eghu ka mae Elija, “Iagho mae mala toutonuni chekegna God. Ghatho tahuni nakarhagu iara gne nei nogu mae soldia iara gre eghu.

¹⁴ Phei mae komanda baludi nodi mae soldia ra neke lehe ka khaꞌaghi teke soru mei funugna kligna ia, eghume, iagho ghatho tahuni nakarhagu iara gne.”

¹⁵ Aonu kaisei engel nogna Lord ne cheke eghu ka mae profet, “Iagho thosei mhaghu, iagho soru pari baludi mare.” Aonu mana kegra haghe ne soru mala tei balugna mana mala filoni king.

¹⁶ Mae Elija tei ne cheke eghu ka king, “Lord ne cheke eghu, ‘Ne theohila kaisei God te au agne Israel na neu sagho te kurudi keha mae te tei toreni Baal-Sebub nodi god naiknodi Ekron grea? Naugna te eni iagho igne, iagho ginauna na thuru au ka nou sape na lehe tutuani.’ ”

¹⁷ Eghuteuna ke leghugna igne, King Ahasaea ne lehe jateula teke chekeni mae Elija igne neu. Nu King Ahasaea ne theo thugna nalhaꞌu, aonu mae thabusigna mana mae Joram igne neke tughuni mana neke kegra king. Ka fapea finogha king Jehoram, thugna King Jehosafat te king gna Juda na, mae Joram ne kegra king gna Israel.

¹⁸ Keha glepo teke edi King Ahasaea re, mare neke rioriso soru ka Buka Eidi Glepo Teke Edi Hatimare Mae King Di Israel.