Fapea Jone 1 - Buka Blahi Ka Cheke Holo

Thosei toghodi mae velepuhi chaichaghi

¹ Iara mae mala baubatu khiloau, magnahaghei te riso ari letas igne ranghidi nakrupe vavahi nei goro thugna te thofno namhadi iara. Theome thegu iara ngala, nu naikno khiloau te gnafa te lasei u tutuani eigna mae Kraes te au balugu iara igre kafe namha ghami ghotilo.

² Uve kheraguro, ghehati namha ghami ghotilo naugna u Nonomho te Keli eigna mae Jisas Kraes te au fabrahu ka nagnafadare.

³ God Kmada ghe mae Thugna Jisas Kraes, phiamare ginauna na fablahi ghita balu nodi khokofakasai, kokhoni ghita, pharikeli, nei balu tutuani nei namha.

⁴ Iara thofno keli tagu fara te filodi keha thumu iagho te thofno leghuni nabrou te tutuani, jateula mae Mama teke cheke ranghi ghita.

⁵ Uve nakrupe biꞌo, iara theome riso ari kaisei vetula majaghani ka ghotilo nu vetula teke kulu hata tahati tifa ia kolho. Iara tore ghami ghotilo mala fari namhai tahati.

⁶ Te namhani God tahati na, tahati na edi unha te chekedi mana re. Eghuteuna mana neke cheke ranghi ghita funu tifa mala fari namhai.

⁷ Kmana mae velepuhi chaichaghi ke lamnagna nauthoglu gne gognaro na. Mare tirodi fatutuani ni mae Jisas Kraes teke mei ka nauthoglu gne te vuhai thini jateula kaisei mae ka tahati. Nafnata naikno te tirogna fatutuani igne kaisei mae chaichaghi nei kaisei nogna naoka mae Kraes.

⁸ Fiofilo ghami, thosei jateula mare eghu. Nu ghotilo mala hata fahui nomi taba teke kmusani themi na.

⁹ Mae ihei lalase te tei sala'uni nogna farirhiu mae Kraes na, God na theome au ka mana. Nu mae ihei te leghuni fabrahu nogna farirhiu mae Kraes na, mae Mama ghe mae Thugna ginauna na kafe au balugna mana.

¹⁰ Jame kaisei mae mei ka ghotilo, nu mana theome hata mei nogna farirhiu mae Kraes igne teuna, thosei hata meini ka nomi sugare ba toutonu balugna mana.

¹¹ Ihei te toutonu balugna nafnata naikno tuana, mana toghoni mana ka gloku te diꞌa te edi mana re.

¹² Uve, kmana glepo fara iara te magnahaghei chekedi ka ghotilo re, nu iara theome magnahaghei te rioriso soru ka letas igne. Iara ghaoghatho mala ari sigho ghami thogheiro, eghuteuna iara ginauna tangomana te ari toutonudi ka ghotilo puhi te chekedi iara igre. Kate eni igne, tahati ginauna na gleale'a fodu.

¹³ Goro thugna thofno greghamu vavahi gne kubae ka iagho. Me gnafa. Iara, mae Jone.