Eklesiasti 9 - Buka Blahi Ka Cheke Holo

Glehe na malada tahati gnafa

¹ Iara neke famane ghaoghatho fakeli eidi glepo igre. Eghuteuna iara lasenihi mae ihei te autagna gaoghatho te keli nei gaoghatho te doglo teu baludi nogna gloku fateote'o na, igre au ka khamegna God. Nu theo kaisei naikno te laseni God na te namhadi ba nate theome magnahaghedi thogheiro na.

² Glepo igne kafe thoke ghita tahati hui. Ihei te doglo, nei ihei te theome doglo, ihei te keli, nei ihei te diꞌa, ihei te klino ka tathagna God, nei ihei te theome klino ka tathagna Mana, ihei te fafara, nei ihei te theome fafara. Mare kaisei nanaba ngala, naugna mare te gnafa na ginauna lehe. Aheva te thokeni naikno te keli na, naikno te diꞌa na ginauna thokeni la. Eghuteuna aheva te thokeni iheire te nhaꞌa cheke ra theome jafra ka iheire te tirodi nhaꞌa cheke ra.

³ Mare te gnafa na ginauna lehe kolho. Igne kaisei glepo te diꞌa te eni ka nauthoglu igne. Eghume kate karha teu mare ka nauthoglu igne, mare fodu salaꞌui ka gaoghatho te diꞌa, nei ka puhi te fameomekro. Ke leghu mare na tei ka namonodi naikno te lehe ra.

⁴ Nu ihei te karha teuna au nogna grouronu biꞌo. Tutuani, khuma te karha teuna keli fara salaꞌuni lion tela lehehi na!

⁵ Uve, ihei te karha teuna laseni nate lehe ginauna. Nu iheire tela lehehi ra theome laseni kaisei glepo. Mare ginauna theome hata kaisei glepo te keli, eghuteuna naiknore ghatho ihodihi mare.

⁶ Uve, puhidi te mala namhadi keha naikno ra, nei puhi te mala sukudi keha naikno ra, nei puhi te mala goghotudi keha naikno re teura la lehehi baludi mare. Mare theome tangomana te au baludi gobigna lepo te edi fabrahu ka nauthoglu igne.

⁷ Eghume, iagho tangomana te gleale'a fara kate ghamu fakeli nei koꞌu waen teu kate karha nga teu iagho ka nauthoglu igne. Naugna igne te thofno doglo ka tathagna God na.

⁸ Leuleghu fata na iagho pipichi ka pohe te keli, nei ghiha oel ka khaklamu na mala famane filomu na.

⁹ Neuba nakarha igne ne theo nafugna ka gaoghathomu iagho na, God neke tusu ari ka iagho. Eghume leuleghu narane na, iagho mala gleꞌani nakarha igne balugna khetomu te namhani fara iagho na. Fablahi igne te mala eni iagho ka nakarha te theo nafugna ka gaoghathomu iagho na, nei ka gloku biꞌo te edi iagho ka nauthoglu igne.

¹⁰ Tahati mala thofno loku fakeli fara ka gobigna lepo te edi tahati re. Kate tei tahati ka namonodi naikno te lehehi ra, tahati ginauna theome loku, ba ghaoghatho, ba lalase, ba au gaoghatho te keli.

¹¹ Keha glepo te filoni iara ka nauthoglu na igne, keha fata mae te lase chari na theome uluni fangenghele na, keha fata mae te nheta na theome uluni magra na, keha fata mae te lalase na theome autagna nakarha te keli na, keha fata mae te ghaoghatho fakeli na theome dedei, keha fata mae te lalase fara na theome fnakno nanghagna na, naugna glepo te diꞌa na kafe thoke ghita hui.

¹² Tahati theome laseni niha nau nate thoke ghita hoholo biꞌo na. Jateula sasa te khale lamna fangna, ba jateula nanghaji te khale ka phighoro, tahati jaola, hoholo biꞌo ginauna thoke ghita ka narane tahati te theome ghathoni, eghume tahati gne jateula te au teu ke lamna phighoro eghu.

Puhigna ihei te au tagna gaoghatho te keli nei puhigna ihei te fameomekro

¹³ Iara jaola filoni kaisei glepo ka nauthoglu igne: igne kaisei thotoghale eigna puhigna ihei te autagna gaoghatho te keli na.

¹⁴ Kaisei namono ikoi te theome autagna kmana naikno. Nu kaisei king te nheta fara na mei magra ka namono igne. Mana na tei faligohoni namono igne, mana tarabana mala paꞌe soru bara thina gna namono igne mala ruma lamna.

¹⁵ Nu kaisei mae te kuma au ka namono igne, eghuteuna mae igne autagna gaoghatho te keli. Eghuteuna ka nogna gaoghatho te keli igne, mana tangomana te filoni kaisei nabrou te mala fanogradi mae naoka te mala theome mei hata namono ikoi igne. Nu neuba, ke leghu na theo kaisei naikno te ghathoni mae igne na.

¹⁶ Neuba, te chekeni iara na, gaoghatho te keli na thofno keli fara salaꞌuni nolaghi te biꞌo na, nu neuba, theo kaisei naikno te filo glani naikno te kuma igne. Uve, theo kaisei naikno te ghathoni nogna gaoghatho te keli mana na, eghuteuna gognarona theo kaisei naikno te fanomho ka nogna cheke mana re.

¹⁷ Te keli na iagho fanomho ka nogna cheke mae ihei te au tagna gaoghatho te keli na, ke kelignai te fanomho iagho ka nogna cheke mae lida te eha tongana farihoteidi mae iheire te fameomekro are.

¹⁸ Gaoghatho te keli na thofno keli fara salaꞌuni glepo mala magra na, nu kaisei mae te diꞌa puhigna na tangomana te goigonidi kmana glepo te keli.