Eklesiasti 8 - Buka Blahi Ka Cheke Holo

Ghatho tahuni king

¹ Ihei gne te au tagna gaoghatho te keli na? Ihei gne te lasedi u gaoghathodi glepo igre? Uve, gaoghatho te keli nei glalase teu igre kolho te tangomana te tuthughu tathagna nei foflogna teu ihei te romno soru ka diꞌanagnafa na mala ke gleale'a fapulo.

² Iagho mala leghuni chekegna king, naugna iagho neke nhaꞌa chekehi ka God te mala eni iagho igne.

³ Iagho thosei faghose tei kokoni king. Eghuteuna iagho thosei totogho ka ihei mala fapholai balugna mana, naugna mana tangomana te eni unha te magnahagheni mana na.

⁴ Naugna king au nogna nolaghi, eghuteuna tahati theome tangomana te cheke eghu ka mana na, “Unha site eni iagho ignea?”

⁵ Ihei te leghuni nogna cheke king na, king ginauna na theome eni kaisei puhi te diꞌa ranghini mana, eghuteuna mae ihei te autagna gaoghatho te keli na laseni thofno narane te mala fadoglidi glepo igre.

⁶ Neubane thoke ghita hoholo te biꞌo fara, tahati au noda narane nei puhi te doglo eghu te mala edi gobigna lepore.

⁷ Tahati theome laseni unha nate thoke ghita ginauna, eghuteuna theo kaisei naikno nate cheke ranghi ghita eidi glepo igre.

⁸ Ka narane glehe na tharungada tahati na magnahaghei te tei kokoni thinida tahati na, eghuteuna tahati theome naba te lothini na. Eghuteuna tahati theome naba te tughu naranegna glehe na. Ka narane te magra na, hatimare mae ofisa theome tangomana te snakredi mae soldiare te tei kokoni magra na teke pulo ka namono na. Jateula tuana eghu ihei te leghuni puhi te diꞌa na, mana na theome tangomana te lisa kokoni puhi te diꞌa igne te mala fakarhani thegna na.

⁹ Iara filodi glepo igre kate ghathodi iara unha nafnata puhi te edi naikno ka nauthoglu igne. Keha fata iara filodi mae funei te paradi nei fadiꞌadi teu naiknore.

Theo kaisei naikno te laseni puhigna God na

¹⁰ Iara filoni kaisei glepo te theome keli ka nauthoglu igne: Kate lehe mae te diꞌa na mare giugiluni mana ka beku te keli, eghuteuna hata fajiflani mana ka vido te blahi na mala tei giugiluni. Eghuteuna naiknogna namono biꞌo teke edi mana puhi te diꞌa igre, mare ne fafnaknoni mana jateula kaisei mae te keli ra neu. Puhi igne jaola theo nafugna.

¹¹ Kate theome ghosei te paradi mare naikno te edi puhi te diꞌa re, keha naiknore magnahagheni kolho te eni puhi te diꞌa na.

¹² Glahu kaisei mae te diꞌa tapla jafrahi kaisei gobi fata ka nakhibo, nu mana karha raugha ne theome ghosei lehe. Nu te laseni iara na, kaisei cheke te au agne na cheke eghu, “Jame iagho te leghuni God na, gobigna lepore ginauna keli kolho, naugna iagho ne ghatho tahuni God.

¹³ Nu naikno te diꞌa te theome ghatho tahuni God na, nakarhagna mana na ginauna theome keli, nei na theome brahu kolho eghu.”

¹⁴ Igne keha glepo te theo nafugna ka nauthoglu igne na, naikno te doglore au papara naba jame teke hata naikno te diꞌare. Nu naikno te diꞌare hata nodi fablahi naikno te doglore. Te chekeni iara na, puhi igne theo nafugna ka gaoghathogu iara na.

¹⁵ Eghume te ghathoni iara na, tahati mala glealeꞌa fabrahu, naugna kaisei nabrou aheva nga te mala leghuni tahati na. Nabrou te mala leghuni tahati igne, tahati mala ima, koꞌu nei glealeꞌa eghu ka unha teke loku hetadi tahati ka nakarha teke tusu ranghi ghita God ka nauthoglu igne.

¹⁶ Kate fariuriu mala hata glalase teu iara na, iara ne filodi naiknore ne loku heta, eghuteuna mare ne theome thuru fakeli bongi narane.

¹⁷ Eghuteuna iara ne filodi gobigna lepo teke edi God igre, nu theo kaisei naikno te thofno lasedi u gaoghathodi unha te edi God ka nauthoglu igne. Neuba tahati ne fariuriu hiohiro eidi glepo igre, nu tahati theome tangomana te thofno lasedi gaoghathodi gloku te edi God igre. Eghuteuna neuba kaisei mae glalase ne chekeni ne lasedi unha te edi God ka nauthoglu igne neu, nogna cheke mana igre theome tutuani, naugna theo kaisei naikno te laseni gaoghathogna God na.