Eklesiasti 7 - Buka Blahi Ka Cheke Holo

Famane farirhiu

¹ Nafnakno na thofno keli fara salaꞌuni sedi te siri keligna na. Eghuteuna narane nate lehe iagho tagna igne thofno keli fara salaꞌuni narane teke karha meimu na.

² Jame te tei tahati ka suga aheva te tanhi teu naiknore ka naikno tela lehehi na, igne thofno puhi keli fara salaꞌuni puhi te tei tahati ka suga aheva te ei gaghamu biꞌo na. Naugna tahati mala kafe lehe. Eghume, kate au teu tahati ka nauthoglu igne tahati mala ghaoghatho fakeli.

³ Jame te diꞌanagnafa tahati ka kaisei glepo na, thofno keli fara salaꞌuni te maꞌe fabrahu tahati na. Naugna thofno keli fara te haimini tahati te diꞌanagnafa ke lamna nagnafada na, naugna tangomana nate tusu ranghi ghita gaoghatho te keli.

⁴ Jame te au ka iagho gaoghatho te keli na, iagho ginauna magnahaghei te au baludi naikno te tanhi ka naikno tela lehehi na. Nu ihei te theome au tagna gaoghatho te keli na, mana magnahaghei te au baludi naikno te edi thua nafnata puhi te mala gleale'a na.

⁵ Jame te fanomho iagho ka nogna farirhiu mae te autagna gaoghatho te keli te magnahaghei fadogli nigho iagho na, puhi igne keli fara salaꞌuni te fanomho iagho ka nogna khoje kilo fnakno mae te fameomekro na.

⁶ Jame te maꞌe naikno te fameomekro na, nogna maꞌe mana igne theo nafugna kolho. Khogla jateula naogla khaꞌaghi te nhako fahui gaju te mojara eghu kolho.

⁷ Jame kegra haghe mae te autagna gaoghatho te keli na te chaghini keha mae na, te eghu na mana jateula mae te fameomekro eghu. Eghuteuna jame te cheke famaemahe te mala hata keha mae na, nagnafagna mana na ginauna jaola diꞌa.

⁸ Jame kaisei mae eni fahui nogna gloku na, mana tangomana te glealeꞌa na uluni narane teke fufunu gna nogna gloku na. Jame nagnafamu iagho na theome ghosei diꞌatagna, igne keli fara uluni te fahaehaghe fara iagho na.

⁹ Theome keli te ghosei te diꞌatamu iagho na. Naugna tuana nogna puhi mae te fameomekro.

¹⁰ Theome puhi keli te ghusna eghu iagho na, “Ne faꞌunha si gobigna lepo tifara te keli fara uludi gognaro grea?”

¹¹ Gaoghatho te keli nei sileni eghu teke hata kasa iagho ka mae kmamu na tangomana te togho ka nakarhamu na.

¹² Gaoghatho te keli na tangomana te togho nigho na, nei sileni na mala jaola togho nigho iagho ka vido te ninhigrana. Nu gaoghatho te keli nei glalase teu igre tangomana te thofno toghoni nakarhamu iagho na.

¹³ Ghaoghatho fakeli eidi gobigna lepo teke edi God igre. Jame te eni God kaisei glepo te peko na, theo kaisei naikno na teke eni fadoglo na.

¹⁴ Kate keli gobigna lepore ka nakarhamu na, iagho mala gleale'a. Nu kate theome keli gobigna lepore, iagho mala laseni igne, eigna God neke tusu ranghi nigho narane te keli nei narane te diꞌa. Eghume, tahati theome laseni unha nate thoke mei ke leghugna te lehe tahati na.

¹⁵ Nakarhagu iara na theo nafugna kolho, nu kate karha teu na iara filodi kmana glepo. Naikno te doglo na ghosei lehe kokodi puhigna te doglore, eghuteuna naikno te diꞌa na, karha raugha ka nauthoglu igne balugna nakarhagna te diꞌa na.

¹⁶ Iagho thosei doglo fara ka gaoghathomu themu na, eghuteuna iagho thosei lalase fara ka gaoghathomu themu na. Naugna unha sagho te magnahaghei falehe nigho themu gnea?

¹⁷ Eghuteuna iagho mala jaola thosei loku famaku ka puhi te leghudi thua nafnata puhi te diꞌa nei puhi fameomekro teu are. Naugna unha sagho te magnahaghei ghosei te lehe gnea?

¹⁸ Te keli na iagho famane ghaoghatho fakeli eidi phei farirhiu igre. Jame te ghatho tahuni iagho God na, iagho ginauna thofno keli fara.

¹⁹ Gaoghatho te keli na tangomana te toghoni kaisei mae mala uludi nodi nanheta nabotho mae funei te funei frunini kaisei namono biꞌo.

²⁰ Tutuani, theo kaisei naikno te doglo fara te au ka nauthoglu igne. Uve, theo kaisei naikno te doglo fara te theome tapla jafra ka nakhibo na.

²¹ Thosei fanomho ka thoutonu te chekedi naiknore, glahu nomhini iagho te cheke fadiꞌa nigho nou mae gloku na.

²² Naugna kmana fata iagho jaola cheke fadiꞌadi keha naiknore.

²³ Iara ghaoghatho fakeli mala fariu riudi cheke te gnafa teke chekedi iara ra. Iara magnahaghei fara te lalase, nu nogu gaoghatho iara igne theome naba.

²⁴ Gaoghatho te keli na khaba fara nei jaola mamhara fara. Ninhigrana fara ranghi ghita te mala laseni na.

²⁵ Eghume, iara neke fariuriu fara mala lasedi gaoghatho te keli nei mala hata thua nafnata glalase. Eghuteuna iara neke loku heta mala lasedi thofno gaoghathodi thua nafnata puhi te diꞌa nei puhi te fameomekro teu igre.

²⁶ Unha te filoni iara na igne, kaisei glepo te haimini iara te diꞌanagnafani iara na uluni glehe na, nafnata gaꞌase te jateula kaisei phighoro teu igne, eghuteuna khamegna na tangomana te loku famaku ka iagho jateula kaisei chen eghu. Ihei te leghuni God na tangomana te rikha na, nu naikno te diꞌa na ginauna khale ka phighoro.

²⁷ Iagho mala filo fakeli ka unha te hironi iara igne. Iara thoghei neke hiro eidi gobigna lepo igre.

²⁸ Iara loku heta mala hirodi cheke tughudi re, nu iara ne theome tangomana te filodire. Kaisei mae te doglo kolho te filoni iara ka kaisei thogha naikno igre, nu iara theome filoni kaisei gaꞌase te doglo kate kmana igre.

²⁹ Igne ngala unha te laseni iara na, God neke toghodi naiknore mala doglo, nu tahati leghudi kolho thua nafnata puhi te diꞌa re.