Eklesiasti 6 - Buka Blahi Ka Cheke Holo

¹ Iara filoni keha glepo te diꞌa fara te goigonidi fabrahu naiknogna nauthoglu igne.

² God na toghoni naikno na mala dedei, mala fnakno, nei mala au nogna kmana glepo. Mana mala au nogna gobigna lepo te magnahaghedi manare. Nu neuba, ke leghu na God ginauna na theome snakreni mana te glealeꞌa ka glepo igre. Eghuteuna kaisei mae phosa kolho nate mei te hata gobigna lepo igre te mala glealeꞌa nogna na. Puhi igne thofno diꞌa fara nei theo nafugna eghu kolho.

³ Jame kaisei mae nakarhagna na fabrahu fara, eghuteuna mana au kmana thugna. Nu jame te theome glealeꞌa kolho mana ka nakarhagna na, ke leghu thugnare theome famane bebekuni thinigna mana na ka puhi te keli. Ka gaoghathogu iara na, nakarha igne thofno diꞌa fara salaꞌuni sua te lehe ka thiꞌagna idogna na.

⁴ Nafnata sua igne jateula te theo nafugna ra eghu kolho, naugna theo kaisei naikno te laseni nanghagna na. Eghuteuna kate giugilu te gnafa na, mare ginauna na theome ke ghathoni sua igne.

⁵ Sua igne theome filoni naphaegna naprai na nei theome laseni kaisei glepo eghu. Nu gognarona mana la gnafa fakeli nogna salaꞌuni mae te dedei na.

⁶ Neuba mae te dedei igne ne karha fabrahu nabagna kaisei thogha finogha ba phei thogha finogha, kokhoni ni fara mae te dedei igne jame te theome gleꞌadi mana glepo te keli teke tusu lao God ka mana re. Neuba, tahati te gnafa na ginauna na kafe lehe, eghuteuna kafe tei ka kaisei vido ngala.

⁷ Leuleghu narane na tahati loku mala ghamu kolho, nu gano te loku hetadi tahati igre theome naba kolho ka unha te magnahagheni tahati na.

⁸ Unha glepo te keli gne nate toghoni nakarhagna mae te lalase igne te mala uluni nakarhagna mae te fameomekro na? Thono theo fara! Jame kaisei mae te kuma keli fara puhigna na kate au baludi naiknore, puhigna mana te keli igne ginauna na theome toghoni mana.

⁹ Te keli na tahati mala glealeꞌa kolho ka glepo tela auhi tadare, thosei magnahaghei glepo te kmana. Nakarha te theome glealeꞌani tahati unha tela auhi tada igne, theo nafugna kolho. Eigna nafnata nakarha tuana jateula mae ihei te ngolho leghu ka nuri na ia eghu kolho.

¹⁰ Gobigna lepo te filodi tahati gognaro igre God neke lilisei nanghadi. Eghuteuna God na neke kulu lasedihi puhida tahati naiknore. Eghume, tahati theome tangomana te fapholai balugna God mae ihei te rheta ulu ghita igne.

¹¹ Fapholai te edi tahati igre theo nafudi kolho, eghuteuna theo kaisei glepo te keli nate jifla mei ka faripholai te edi tahati igre.

¹² Nakarhada tahati ka nauthoglu igne thofno kmoꞌei fara, jateula naungo gaju te ghosei te dofini kate thafru naprai na ka khoveo ra eghu. Eghume, ihei gne nate baubatu ghita ka puhi te keli te mala leghuni tahati na? Ihei gne nate tangomana te chekedi unha nate thoke mei ka nauthoglu igne ke leghugna te lehehi tahati na?