Eklesiasti 5 - Buka Blahi Ka Cheke Holo

Eigna nhaꞌa cheke ka God

¹ Iagho mala ghaoghatho fakeli kate tei tarai ka nogna Sugablahi God na. Thofno keli fara te tei iagho jare te fanomho na, nu iagho thosei fafara jateula mae te fameomekro ra eghu. Naugna mae te fameomekro na theome laseni unha te doglo ka tathagna God na.

² Iagho kulu ghaoghatho fakeli, ame tangomana nga iagho te kegra haghe te chekeni kaisei glepo na. Iagho thosei nananga te mala nhaꞌa cheke ka God na. Naugna God na au kligna, eghuteuna iagho au ka nauthoglu igne, eghume iagho thosei cheke me brahu.

³ Kate nanganou fara na, iagho ginauna filodi kmana mifi te diꞌa. Eghuteuna kate cheke te brahu na iagho ginauna na tharuma cheke jateula kaisei mae te fameomekro eghu.

⁴ Jame iagho eni kaisei nhaꞌa cheke ka God, iagho faghose leghuni nhaꞌa cheke teke eni iagho igne thosei ofo me raugha. God na theome kelitagna ka iheire te theome leghuni nodi nhaꞌa cheke na.

⁵ Te keli na iagho thosei eni kaisei nhaꞌa cheke, uluni te nhaꞌa cheke nu theome leghuni kolho iagho nou nhaꞌa cheke na teuna.

⁶ Thono diꞌa fara te chekeni iagho cheke te mala batu nigho ka nakhibo na. Jaola iagho thosei tei cheke eghu ka mae pris, “Nogu nhaꞌa cheke iara igne jafrau.” Ba, iagho magnahagheni God te diꞌatagna ka iagho te goigonidi gobigna lepo teke loku teke kmusadi iaghore sia?

⁷ Neuba iagho ne edi kmana mifi, kmana cheke, nei kmana nafnata gaoghatho te theo nafudi neu, iagho mala ghatho tahuni God.

Gaoghatho eigna dedei

⁸ Thosei jaglo nou kate filodi mae biꞌo te fakokhoanadi iheire te kuma, ba fatedi ka puhi te theome doglo, ba theome snakredi mala au kau pharikeli. Mae biꞌo igre theome ghatho tahudi naikno te kuma igre, naugna mare au ke paridi nodi nolaghi mae iheire te funei frunidi. Keha mae biꞌo igre jaola edi kmana nafnata puhi te diꞌa igre, naugna mare jaola au ke paridi nodi nolaghi mae iheire te funei frunidire.

⁹ Nu neubane mae king, ba mae ihei te theome fnakno nanghagna na, tahati te gnafa na lelheghu kolho ka glose te mala hata unha te nabada na.

¹⁰ Jame iagho magnahaghei sileni fara, iagho ginauna au diꞌanagnafa, naugna iagho ne theome au naba sileni. Eghuteuna jame iagho magnahaghei fara te kaisei mae dedei, iagho ginauna theome kafe hata unha te magnahagheni iagho na. Uve, nafnata puhi igne theo nafugna kolho.

¹¹ Kate kaisei mae dedei iagho na, iagho ginauna au kmana kheramu te mala toghodire. Eghume, dedei te magnahagheni fara iagho igne ginauna theome togho nigho iagho. Thono theo fara.

¹² Mae gloku te loku heta fabrahu na, glahu mana ghamu katha ikoi kolho, ba mana ghamu ghilei boho fara, nu mana tangomana te thuru fakeli bongiro na. Nu mae te dedei na theome thuru fakeli bongiro na, naugna mana ne nangadi fara nogna gobigna lepore.

¹³ Iara filoni kaisei glepo te diꞌa fara te au ka nauthoglu igne. Kaisei mae salo fodu kmana sileni tarabana eigna nathuꞌu nauriha. Nu puhi igne goigonini kolho thegna.

¹⁴ Nu ke leghu na, nogna bisnis mana igne ginauna luvu, eghuteuna nogna sileni mana igre ginauna jaola dofidi. Aonu theo kaisei sileni nate salaꞌui maladi thugnare.

¹⁵ Kate karha mei ka idoda na, tahati theome hata mei baluda kaisei glepo. Eghuteuna ka gleheda na, tahati ginauna na jaola theome atha tei baluda kaisei glepo. Tutuani, neuba tahati ne loku heta ne hata kmana glepo, nu ka gleheda na, tahati na theome hata tei baluda kaisei glepo.

¹⁶ Tahati ginauna nake pulo sasama jateula teke karha meida ka nauthoglu igne eghu. Glepo igne theome doglo. Eghume, nogna gloku mana igne jateula mae ihei te ngolho leghu ka nuri ia eghu kolho.

¹⁷ Nakarhagna mana leuleghu narane ka nauthoglu igne na theome keli kolho, eigna mana fogra koba, diꞌanagnafa koba, tanhi nei diꞌatagna koba eghu fabrahu.

¹⁸ Glepo ulu jame te eni tahati ka nakarha te kmoꞌei teke tusu ranghi ghita God igne na, eghu agne, tahati ghamu gheda, koꞌu gheda nei glealeꞌa noda eghu ka unha teke loku hetadi theda igre. Theo kaisei glepo nate eni tahati na.

¹⁹ Kate tusu lao God kmana glepo te keli ka kaisei mae na, mae igne ginauna kelitagna fara ka glepo igre. Uve, nabagnau mae igne te glealeꞌa ka nakarhagna nei ka nogna gloku teure. Naugna igne kaisei khokofakasai mei funu ka God.

²⁰ Eghume, mae igne theome nanga nogna fara ka nakarhagna na, naugna God ne faglealeꞌani mana ka vido kmoꞌei te au teu mana ka nauthoglu igne.