Eklesiasti 4 - Buka Blahi Ka Cheke Holo

Gaoghatho eidi glepo te biꞌo ka nakarha

¹ Iara ghathodi fabrahu thua nafnata puhi te theome doglo te edi naikno gre ka nauthoglu igne. Keha naiknore paradi keha naiknore, eghuteuna naikno te au papara igre tanhi nodi fara, nu theo kaisei naikno te fameomegodire. Naugna mae te paradi naiknore igre au nodi nolaghi te mala eni unha te magnahagheni mare na.

² Eghume, te ghathoni iara na, naikno tela lehehira keli tadi fara salaꞌu ghita tahati naikno te karha teu ka nauthoglu igne.

³ Nu mare keli fara salaꞌudi iheire te theome karha mei nga teu ka nauthoglu igne, naugna mare theome lasedi glepo te diꞌa te edi naiknogna nauthoglu igne.

⁴ Eghuteuna iara jaola filodi thua nafnata nakmusa biꞌo nei thua glepo te keli eghu te edi tahati igre, naugna tahati goghotu ka nagnafadare ka unha te edi keha naiknore. Glepo igne jaola theo nafugna kolho, jateula ihei te ngolho leghu ka nuri na ia eghu kolho.

⁵ Naikno te fameomekro na tirogna loku, aonu naikno tuana ginauna goigonini kolho nakarhagna thegna na.

⁶ Nu te keli na, tahati loku kakatha kolho mala hata katha glepo ikoi kolho, salaꞌuni te hata glepo kmana tahati na, na eghunu kmusa kolho tahati jateula mae ihei te ngolho leghu kokho ka nuri na ia eghu kolho.

⁷ Iara jaola filoni kaisei glepo ka nakarhada tahati te theo nafugna igne.

⁸ Jame kaisei mae au sopa thegna, mae igne theo thabusigna, ba thugna, nu leuleghu narane na mana loku heta fabrahu theome gnafa kaisei narane, naugna mana magnahaghei sileni biꞌo. Nu mae igne theome ghusna eghu ka thegna, “Mala toghoni ihei si gloku biꞌo te edi iara leuleghu narane te theome gnafa igrea?” Nafnata puhi te eni mana igne thofno diꞌa fara nei theo nafugna eghu kolho.

⁹ Nu te loku fodu phiamare na thofno keli fara salaꞌuni te kaisei mae kolho na, naugna jame te loku fodu phiamare na phiamare na thofno loku fakeli fara.

¹⁰ Eigna jame kaisei mae ka phei mae igre uka, keha mae na au jare mala toghoni mana. Nu thofno kokhonini fara mae ihei te au teu thegna te uka na, naugna theo kaisei naikno te mala toghoni mana na.

¹¹ Eghuteuna ka vido te reka na, phia mare na thuru fodu mala theome reka. Nu jame mae te thuru sopa na, mana na reka kolho.

¹² Eghuteuna jame kaisei naoka posa mei, kaisei mae na theome tangomana te uluni magra igne. Nu jame phiamare loku fodu, phei mare na uluni mana. Uve, phukri te pukri fodu mare ka thilo gnarho na theome tangomana te ghosei khusu na.

¹³ Jame king na kuekuꞌe fara, nu theome fanomho ka famane cheke te keli na teuna, jau te keli na kaisei mae majaghani te kuma, eghuteuna au tagna gaoghatho te keli teuna mala tughuni king.

¹⁴ Neuba mae majaghani igne neke au ka sosolo tifa, ba neke karha ka tharakna te kuma, nu te keli na mana tughuni mae king igne.

¹⁵ Iara filodi kmana naikno ka nauthoglu igne, mare magnahaghei te leghuni keha mae majaghani te tughuni king tela kuekuꞌehi igne.

¹⁶ Eghuteuna neuba mana ne funei frunidi kmana naikno, nu kate lehe mae king majaghani igne na, theo kaisei naikno kolho nate ghathodi nei glealeꞌadi teu unha glepo te keli teke edi kani karha teku mana ka nauthoglu igne. Igne jaola theo nafugna ka gaoghathoda tahati na jateula mae ihei te ngolho leghu ka nuri na ia eghu kolho.