Eklesiasti 3 - Buka Blahi Ka Cheke Holo

Gobigna lepo igre thoke mei ka thofno narane gna

¹ Gobigna lepo fateote'o te edi tahati ka nauthoglu igne thoke mei ka nogna thofno narane na.

² God lilisei narane mala karhada nei narane mala leheda ka nauthoglu igne. Mana lilisei narane mala joꞌu nei narane mala hata gano ka nagare.

³ Narane mala falehe naikno nei narane mala fakarha naikno fogra. Narane mala paꞌe nei narane mala babana.

⁴ Narane mala tanhi nei narane mala glealeꞌa. Narane mala diꞌanagnafa nei narane mala ragi.

⁵ Narane mala koko thina nei narane mala pulei thina. Narane mala thuru fodu nei narane mala theome thuru fodu.

⁶ Narane mala hara glepo, nei narane mala theome hara glepo. Narane mala hata glepo nei narane mala koko glepo.

⁷ Narane mala reku pohe nei narane mala susuki pohe. Narane mala au kmu nei narane mala cheke.

⁸ Narane mala namha nei narane mala theome namha. Narane mala magra nei narane mala au ka pharikeli.

⁹ Unha glepo te keli gne nate hata tahati ka nakmusa te edi tahati igre? Theo kolho.

¹⁰ Iara lasenihi glepo teke tusu mei God te mala eni tahati na.

¹¹ Uve, God neke famane lilisei fakeli gobigna lepore ka thofno narane gna na. Eghuteuna Mana jaola farirhiu ghita mala lasedi tahati glepo teke edi mana tifare, nei unha nate edi ginaure. Nu tahati theome thofno lasedi glepo igre.

¹² Te laseni iara na kaisei glepo ngala te ulu fara te mala eni tahati na: Tahati mala glealeꞌa nei mala edi eghu glepo te kelire kate au teu tahati ka nauthoglu igne.

¹³ Doglou kolho te mala ima nei koꞌu nei glealeꞌa teu tahati na, naugna God neke tusu ranghi ghita puhi igne mala glealeꞌa na.

¹⁴ Te laseni iara na, gobigna lepo te edi God re ginauna au fabrahu na theome gnafa. Theo kaisei naikno na teke nhaꞌa lao kaisei glepo tagna na, eghuteuna theo kaisei naikno na teke hata koko kaisei glepo tagna na. Gobigna lepo te edi God re thofno doglo fara, mala ghatho tahuni tahati.

¹⁵ Gobigna lepo te edi gognaro igre neke edila tifa. Eghuteuna gobigna lepo nate edi ginaure jaola neke edila tifa. Naugna God magnahaghedi glepo igre teke pulo mei.

Kaisei God ngala te doglo na

¹⁶ Iara filoni kaisei glepo te thono diꞌa fara ka nauthoglu igne. Kate fateni naikno na, keha mae mala fate igre keha fata mare theome leghuni puhi te doglo na. Mare leghuni kolho puhi te diꞌa na.

¹⁷ Igne unha te ghathoni iara na, “God ginauna na kafe fate falehedi naikno te doglo nei naikno te diꞌa teu igre. Eigna mana liliseihi narane te mala fatedi gobigna lepo fateote'o te edi naiknore.”

¹⁸ Eghuteuna iara jaola ghathoni igne, “God ginauna fariuriu ghita mala laseni tahati, naikno na jateula glepo tautagu eghu kolho.”

¹⁹ Nakarhagna naikno na nei nakarhagna glepo te tautagu na eghu kaisei nanaba ngala. Uve, glepo te tautagu na mala lehe, eghuteuna naikno na mala jaola lehe. Jame te eghuna, naikno na theome tangomana te chekeni ne thofno keli fara ne salaꞌuni glepo te tautagu na teuna, naugna repa mala kafe lehe kolho kate thoke mei nodi narane na. Eghume, nakarhadi phei glepo igre kafe theo nafudi kolho ka gaoghathoda tahati na.

²⁰ Naugna God neke kafe vuavuhadi ka glose, eghume, repa mala ke kafe figri ka glose.

²¹ Theo kaisei naikno te thofno laseni tharunga gna naikno na nate haghe kligna na, eghuteuna tharunga gna glepo te tautagu na nate soru pari ke lamna glose teuna.

²² Eghume, igne unha te ghathoni iara na, tahati te gnafa na mala glealeꞌa ka unha teke edi tahatire. Theo kaisei glepo nate eni tahati na. Eghuteuna theo kaisei puhi nate laseni tahati unha nate thoke mei ginau ke leghugna te lehe tahati na.