Eklesiasti 2 - Buka Blahi Ka Cheke Holo

Thua nafnata puhi te mala gleale'a na jateula te theo nafudi eghu kolho

¹ Iara cheke eghu ka nagnafagu thegu na, “Iara ginauna fariu riudi gobigna lepo te keli igre mala laseni unha nate glealeꞌani iara na.” Nu puhi igne jaola theo nafugna kolho.

² Thono fameomekro kolho jame te fiti maꞌe leuleghu narane na. Eghuteuna unha te gleale'ani naikno igne, glepo tuana ginauna theome toghoni nakarhagna mana na.

³ Iara fariuriu fara mala lasedi gobigna lepore, aonu iara koꞌu waen mala glealeꞌa nogu, nu neuba iara loku jateula mae te fameomekro eghu. Iara magnahaghei fara te filo glanidi gobigna lepo te keli te edi naiknore ka vido te kmoꞌei kolho te au ka nauthoglu igne.

⁴ Iara edi kmana gloku te biꞌo fara. Iara horo kmana suga biꞌo, eghuteuna iara joꞌu kmana nagare grep malagu thegu.

⁵ Iara joꞌu kmana gano nei thua nafnata gaju mala ima.

⁶ Eghuteuna iara hata khoꞌu mei mala faboubothudi gano teke joꞌu iara re.

⁷ Iara au kmana naikno gloku nalhaꞌu nei gaꞌase, eghuteuna kmana sua karha mei ka naikno te loku ka iara igre. Eghuteuna nogu sipu, nanigot nei buluka teu iara re thono kmana fara. Funu tifa te mei posa ka narane gognarogne, theo kaisei naikno agne Jerusalem te au nogna kmana glepo te tautagu jateula iara teuna.

⁸ Iara neke hata nodi silva nei gol, nei dedei ka hatimare mae king nei ka provins te gnafa te funei frunidi iara igre. Iara au nogu gaꞌase nei nalhaꞌu eghu te mala koje ranghi ghau te mala glealeꞌa na. Eghuteuna iara jaola au kmana gaꞌase mala glealeꞌa nogu jateula te edi keha mae are eghu.

⁹ Iara fnakno nanghagu na heva heva, eghuteuna theo kaisei mae ka mae iheire teke kulu funei fruni ke ulugu iara agne Jerusalem te fnakno nanghadire jateula iara teuna. Eghuteuna nogu glalase iara na au fabrahu theome khoko ka iara.

¹⁰ Uve, iara au nogu gobigna lepo te magnahaghedi iara re, eghuteuna iara eni unha te magnahagheni fara iara na. Iara thofno glealeꞌa fara ka gobigna lepo te edi iara re, eghuteuna glepo igre jateula nogu taba eghu iara.

¹¹ Nu kate ghathodi iara unha te edi nei loku branadi teu iara igre na, iara haimini ka glamnagu na, unha te edi nei loku branadi teu iara igre theo nafudi kolho. Iara jateula mae ihei te ngolho leghu ka nuri ia eghu kolho. Iara theome filoni kolho kaisei glepo te keli tagna.

Gaoghatho te keli na uluni unha te fameomekro na

¹² Iara ghathodi phei nabrou, gaoghatho te keli nei gaoghatho te fameomekro teu igre. Te filoni iara na mae ihei nate king ke leghugu iara na, mana na theome eni kolho kaisei glepo majaghani. Leuleghu narane na mana ginauna na edila unha teke edila hatimare mae king tifa ra.

¹³ Eghuteuna unha te filoni iara na, gaoghatho te keli na uluni puhi te fameomekro na, jateula naphae te uluni gromno na.

¹⁴ Mae ihei te au tagna gaoghatho te keli na, mana filo glani ne leghuni naphae na. Nu mae ihei te fameomekro na, mana leghuni kolho nabrou te romno na. Nu neuba, te laseni iara na, glehe na ginauna kafe thokedi phei mae igre.

¹⁵ Eghume, unha te filoni iara na igne, unha te thokeni mae te fameomekro ginauna na jaola thoke ghau iara. Jame teuna, unha glepo te keli gne nate uluni iara ka nogu glalase na? Theo fara! Igne jaola theo nafugna kolho ka gaoghathogu iara na.

¹⁶ Uve, mae te fameomekro ghe mae te lalase igre ginauna kafe lehe. Theo kaisei naikno nate ghathodi mae glalase ghe mae te fameomekro igre.

¹⁷ Eghume, iara tiroguni nakarhagu na. Gobigna lepo fateote'o te loku hetadi iara ka nauthoglu igne hata mei puhi biꞌo ka nakarhagu iara na. Nakarha igne theo nafugna kolho. Khogla jateula mae te ngolho leghu ka nuri na ia eghu kolho.

¹⁸ Iara tirogudi gobigna lepo te loku branadi iara ka nauthoglu igne, naugna te laseni iara na, mae na teke mei ke leghugu iara na ginauna ke khotodi gobigna lepo igre.

¹⁹ Iara theome laseni glahu mae igne autagna gaoghatho te keli, ba kaisei mae fameomekro kolho. Mana ginauna funei frunidi gobigna lepo teke loku branadi iara ka nogu glalase na. Igne jaola theo nafugna ka gaoghathogu iara na.

²⁰ Eghume iara thono diꞌanagnafagu fara eidi nakmusa biꞌo teke edi iara ka nauthoglu igne.

²¹ Naikno na loku heta ka nogna glalase nei ka nogna gaoghatho, nu kate lehe na, mana lisei lao gobigna lepo igre ka mae ihei teke theome loku heta tagna na. Puhi igne theome doglo, nei theo nafugna eghu ka gaoghathogu iara na.

²² Ka nakarhada na tahati loku heta koba balu huruhanga, nu unha nate hata tahati ka nakmusa biꞌo igre? Theo kolho!

²³ Leuleghu narane na tahati huruhanga nei diꞌanagnafa eghu ka gloku te edi tahati igre. Tahati theome thuru fakeli bongi narane na. Nafnata nakarha igne jaola theo nafugna ka gaoghathogu iara na.

²⁴ Eghume, glepo ulu te mala eni tahati na igne kolho, tahati mala ima nei koꞌu nei glealeꞌa eghu kolho ka unha te au ka thedare. Te laseni iara na, glepo igre mei ka khamegna God.

²⁵ Jame te theome tusu mei God glepo igre ka tahati na, tahati ginauna theo gheda gano, eghuteuna tahati ginauna na theome glealeꞌa.

²⁶ Leuleghu narane na God tusu lao gaoghatho te keli nei glalase eghu ka iheire te leghuni manare, mala jaola glealeꞌa mare. Nu God tusu lao gaoghatho ka naikno te diꞌa re mala loku heta mala hata kmana glepo te keli nei dedei. Eghuteuna keha narane ke leghu, glepo igre tangomana te tei toghodi naikno te keli re. Puhi igne jaola theo nafugna ka gaoghathogu iara na. Eigna igne jateula mae ihei te ngolho leghu ka nuri na ia eghu kolho.