Eklesiasti 11 - Buka Blahi Ka Cheke Holo

Gloku te mala edi mae te au tagna gaoghatho te keli

¹ Te keli na iagho tufa glepo kmana ka keha naiknore, naugna ke leghu na iagho ginauna hata taba te keli.

² Eghume, iagho mala lilisei nou silenire ka fitui ba nhanai bisnis, naugna iagho theome laseni unha nafnata hoholo biꞌo nate thoke mei ka nauthoglu igne.

³ Kate fodu khoꞌu ka khoveo na, nakhete ginauna soru mei ka nauthoglu igne. Kate grofo pari gaju na, neubane grofo tei ke raru ba ke mata, ginauna thuru jare ka vido teke grofo sorugna na.

⁴ Jame te nanga nou iagho ka nuri na, iagho ginauna theome joꞌu nou nagare na. Eghuteuna jame te nanga nou iagho ka khoveo nakhete na, iagho ginauna theome hata gano ka nagare.

⁵ Iagho theome laseni faꞌunha ne karha nga neu sua na lamna ka thiꞌagna idogna na teuna. Jateula tuana eghu iagho theome laseni nogna gloku God na, mae ihei teke vuavuhadi gobigna lepore.

⁶ Iagho mala joꞌu gano ka nagare hamerane boibongi, eghuteuna keha fei grafi. Iagho theome laseni unha nafnata gloku nate keli na. Glahu te joꞌu iagho hamerane igre te au ganodi re, ba te fei grafi igre, ba phei igre kafe keli hui.

Cheke mala toghodi naikno majaghani

⁷ Naphae na glepo keli fara. Eghuteuna kate filoni tahati naphaegna naprai na, tahati thofno kelitada fara.

⁸ Tahati mala glealeꞌa ka finogha te au teu tahati ka nauthoglu igne. Neuba tahati ne au kmana finogha, tahati theome tangomana te ghatho ihoni glepo igne: tahati ginauna au kmana finogha ka namonodi mae tela lehehi ra. Glepo nate thoke mei ke leghu re, igre theo nafudi kolho.

⁹ Ghotilo naikno majaghani ra, ghotilo glealeꞌa kani majaghani ngau. Ghotilo leghuni unha te magnahagheni ka nagnafami re. Nu fiofilo ghami eghu, God ginauna fatedi puhimi ghotilo re.

¹⁰ Nomi narane te mala majaghani teu ghotilo na theome brahu. Jateula glepo te theo nafudi ra eghu kolho. Eghume ghotilo thosei nanga nomi ka puhi biꞌo nate thoke ghami ghotilo are. Eghuteuna ghotilo thosei leghudi puhi nate fakabrudi thinimi are.