Eklesiasti 10 - Buka Blahi Ka Cheke Holo

¹ Gilo te ruma te lehe ka botol sedi te siri keligna na ginauna siri diꞌagna. Jateula tuana eghu, kakatha puhi fameomekro kolho nate goigonini gaoghatho te keli na.

² Mae te au tagna gaoghatho te keli na leghuni puhi te doglo na. Nu mae te fameomekro na batuni puhi te diꞌa na.

³ Kate tei mae te fameomekro igne ka nabrou na, naiknore filo glani puhigna mana na, mae igne theo kaisei gaoghatho te keli ka mana.

⁴ Jame kaisei mae mala baubatu diꞌatagna ka iagho, iagho thosei lisa kokoni nou gloku na, jame te au kmu kolho iagho na, mana ginauna hata fadelei nakhibomu iaghore.

⁵ Iara filoni kaisei glepo te diꞌa te edi mae te mala baubatu igre ka nauthoglu igne.

⁶ Leuleghu fata na hatimare mae funei gre tusu lao gloku te keli ka mae te theome autadi gaoghatho te keli nei lalase teu gre, nu mare tusu lao gloku te theome keli ka mae biꞌo te fnakno nanghadi re.

⁷ Eghuteuna iara jaola neke filodi mae gloku kolho te saghe te tei ka hose, nu mae funei re nolo ghahe jateula mae gloku eghu kolho.

⁸ Mae te dokha huha mala snoꞌo naikno tagna teuna, mana ginauna snoꞌo thegna. Mae te horo khora ka gringnigna suga na, phanaga ginauna kathini mana.

⁹ Mae te kato thina mala horo suga teuna, glahula ghoreho tagna. Eghuteuna mae te kato thaba na ginauna jaola ghoreho tagna.

¹⁰ Jame te theome jaha fafnonu iagho nou nhirama na, iagho ginauna kmusa kate kato tagna. Eghume iagho ghaoghatho fakeli mala bligi ranghi nigho nou gloku na.

¹¹ Jame kaisei mogo te kathini kaisei mae tifa, nu mana tangomana te fakmugnani mogo tuana. Nu jame te snakreni mana mogo na teke kathini mana na, unha glepo te keli gne nate toghoni mae te ohogna mogo igne?

¹² Nogna cheke mae te autagna gaoghatho te keli na, naiknore ghatho tahuni mana. Nu nogna cheke mae te fameomekro na, faparini kolho thegna.

¹³ Kate funu cheke mae igne na, thua cheke fameomekro kolho nate chekedi mana re. Eghuteuna kate gnafa nogna cheke na, nogna cheke mana igre thofno diꞌa fara salaꞌui, jateula nogna cheke mae te fagoigoli ra eghu.

¹⁴ Mae te theome autagna gaoghatho te keli na khuru vese fara. Tahati theome laseni unha nate thoke mei nathuꞌu nauriha na. Eghuteuna tahati theome laseni unha glepo nate thoke mei ka nauthoglu igne kate lehehi tahati na.

¹⁵ Mae te theome autagna gaoghatho te keli na, mana theome deni nabrou te mala tei ka nogna suga na, nafnata mae igne ginauna fiti kmusa kolho ka unha te eni mana na.

¹⁶ Jame king gna kaisei kantri mae majaghani fara, eghuteuna mae mala baubatu gna kantri igne ei gaghamu leuleghu narane, eghume puhi biꞌo ginauna thoke mei ka kantri igne.

¹⁷ Nu jame king gna kaisei kantri na thugna kaisei mae funei, eghuteuna mae mala baubatu gna kantri igne tangomana te ghamu nei koꞌu eghu ka vido mala ghamu na mala rheta kolho thinidi re, theome mala koꞌu dranga tafri, eghume kantri igne ginauna au keli kolho.

¹⁸ Jame kaisei mae thodo fara, suga na ginauna lulu sorokoto, eghuteuna suga igne ginauna grofo pari.

¹⁹ Gano te keli na mala maꞌe naikno na, eghuteuna waen na mala fagleꞌa naikno, eghuteuna sileni na mala edi thua nafnata gloku.

²⁰ Neuba iagho ne poru neu ka nou sape na, iagho thosei cheke fadiꞌani funei ba mae dedei ka nagnafamu na. Glahula kaisei nanghaji nomhini nou cheke iagho na hata tei ka mare.