Eklesiasti 1 - Buka Blahi Ka Cheke Holo

Theo kaisei glepo te horoghoto ka gaoghathoda tahatire

¹ Cheke te au ka buka na igre nogna cheke mae glalase. Mae glalase igne neke thugna King Devet, eghuteuna mana tifa na neke king ka namono biꞌo Jerusalem.

² Mae glalase igne neke cheke eghu, “Gobigna lepo fateote'o te ghathodi tahati ka nauthoglu igne firi ka gaoghathoda tahati gre! Uve, tutuani fara te fariuriu mala lasedi glepo igre teu tahati na jateula mae te ngolho leghu ka nuri ra eghu kolho.”

³ Leuleghu narane na tahati loku heta fara, nu tahati theome hatini kaisei glepo te keli ka gloku te edi tahati igre.

⁴ Tahati te gnafa na karha mei ka nauthoglu igne, theome raugha tahati lehe. Nu nauthoglu igne theome ke tughu ba filo nhogri, nanaba fabrahu kolho.

⁵ Leuleghu narane na naprai na haghe hamerane boibongi, eghuteuna ke plulu fei grafi. Eghuteuna ke tei falithui mala ke haghe ka keha narane na.

⁶ Nuri na ghaghafa mei ke mata, eghuteuna ke ghaghafa mei ke raru. Aonu ke pulo mei jateula tuana eghu fabrahu kolho.

⁷ Leuleghu narane na khoꞌu te gnafa re loloro soru lamna thongna, nu thongna na theome fodu tei salaꞌuni vido aheva te mala snotogna na. Leuleghu narane na khoꞌu na figri ke pulo ka vido aheva teke jifla meigna tifa na, eghuteuna ke jaola ke leghuni nogna nabrou na ke soru lamna thongna.

⁸ Eghume, gobigna lepo igre na eghu fabrahu kolho tifa tifa. Leuleghu narane na tahati filo tathada glepo igre, eghuteuna tahati nomhidi glepo igre, nu tahati theome chekeni la nabahi teuna.

⁹ Glepo te edi tifa ra ginauna nake pulo mei. Theo kaisei glepo majaghani te au ka nauthoglu igne.

¹⁰ Keha naiknore cheke eghu, “Tore! Kaisei glepo majaghani si igne!” Nu cheke igne theome tutuani! Naugna, glepo igne au mei funu tifa.

¹¹ Naiknore theome ke ghathodi kuꞌeda tifa ra. Eghuteuna naikno nate karha mei ke leghuda tahatire, mare ginauna na jaola theo kaisei ka mare nate ghathodi kuꞌeda tifara.

Gobigna lepo igre theo nafudi kolho ka gaoghathoda tahatire

¹² Iara kaisei mae glalase, eghuteuna iara king gna Israel, iara au ka namono biꞌo Jerusalem.

¹³ Iara magnahaghei fara te lasedi unha teke edi naiknore ka nauthoglu igne. Eghuteuna unha teke filoni iara na, nakarha teke tusu mei God ka tahati igne thono tahu fara.

¹⁴ Iara la filodihi gobigna lepo teke edi ka nauthoglu igne, nu unha te chekeni iara na, gobigna lepo igre theome nanaba ka gaoghathoda tahati re. Tahati jateula te ngolho leghu ka nuri ia eghu kolho.

¹⁵ Unha te theome doglo na, tahati theome tangomana teke fadoglini na. Eghuteuna unha te magnahagheni tahati na tahati theome tangomana te kahani unha glepo te theome au jare na.

¹⁶ Igne unha te ghathoni iara na, “Iara kaisei mae biꞌohi, eghuteuna iara lalase fara salaꞌudi hatimare mae king teke kulu funei fruni agne Jerusalem tifa ra. Eghuteuna iara thofno lase fakelini puhigna mae ihei te au tagna gaoghatho te keli na.”

¹⁷ Eghume, iara fariu riu fara mala laseni gaoghathogna mae ihei te au tagna gaoghatho te keli na, nei gaoghathogna mae ihei te fameomekro na eghu. Nu iara jateula mae ihei te ngolho leghu ka nuri na ia eghu kolho.

¹⁸ Naugna, kate lalase te salaꞌui na, naikno na jaola nanga nogna fara, eghuteuna kate lalase te salaꞌui na, mana na jaola diꞌanagnafa fabrahu.