Efesus 6 - Buka Blahi Ka Cheke Holo

Goro sua nei idodi kmadi

¹ Goro sua, igne puhi te keli na, leghudi idomi kmami are. Naugna Lord magnahaghe ghami ghotilo te eni tuana.

² Tutuani, u cheke ulu lahu ka vetula na au balugna kaisei nhaꞌa cheke ne cheke eghu, “Ghatho tahudi idomi kmami are,

³ aonu gobigna lepore ginauna keli ranghi nigho nei mala tangomana iagho te karha te tifa na ka nauthoglu igne.”

⁴ Iara magnahaghei cheke ka ghotilo mae iheire te kmadi suara, thosei eni kaisei puhi ba cheke te mala diꞌa tadi fara thumire. Nu ghotilo taji fakelidi nei farirhiudi eghu ka puhida tahati naikno khiloau.

Cheke eidi naikno sneka

⁵ Ghotilo naikno sneka ra, leghudi nomi funei ka nauthoglu gne balu mhaghu nei ghatho tahu eghu. Eghuteuna gaoghathomi ghotilo re mala au doglo, eigna ghotilo leghudi mare jateula ghotilo te leghuni Kraes.

⁶ Theome keli te leghudi ghotilo mare kate filo teu kolho mare na, tuana puhi mala famaemahedi kolho mare. Nu te keli na ghotilo thofno leghudi mare ka gaoghathomi fateo mala eni unha te magnahagheni God na, naugna ghotilo thofno nogna mae sneka Kraes.

⁷ Gleale'a ka nomi gloku na, naugna ghotilo theome loku ranghidi naiknore kolho, nu ghotilo loku ranghini noda Lord.

⁸ Ghotilo te gnafa na laseni igne, eigna Lord thegna ginauna tabadi iheire te loku fakelire, neubane mae sneka ba theome mae sneka.

⁹ Ghotilo mae funeira, jaola keli ranghidi nomi mae snekare. Eghuteuna koko nafnata puhi te famamhaghudi nomi mae sneka are. Naugna ghotilo laseni nomi funei ghotilo nei nodi funei mare teuna au kligna, eghuteuna naikno te gnafa na kaisei nanaba ngala ka mana.

Naikno khiloau na jateula mae soldia eghu

¹⁰ Nogu cheke leghu lahu iara ka ghotilo na igne. Kegra heta ka nogna nolaghi biꞌo Lord, eigna ghotilo kaisei balugna mana.

¹¹ Fahaghe nomi gobigna lepo mala magra teke tusu ari God ka ghotilo are mala nabami te kegra fanogradi nogna saosagro te diꞌa mae Satan.

¹² Tahati theome magrini nogna nanheta nei glalase eghu naikno kolho, nu tahati magrani mae Satan nei nogna nolaghi. Tutuani fara, tahati magridi naitu ka maloa gne nei keha nafnata nolaghi te au ka nauthoglu te romno te funei frunini mae Satan igne.

¹³ Eghume, gognaro na ghotilo fahaghe gobigna lepo te mala magra teke tusu ari God ka ghotilo ra. Eghuteuna ghotilo ginauna tangomana te fanograni mae naoka igne, neuba mana ne mei ka unha narane te mala eni ranghi ghami ghotilo glepo te diꞌa fara na. Eghuteuna kate magra te gnafa na, ghotilo ginauna kegra heta fabrahu.

¹⁴ Eghume, ghotilo kegra heta balugna nomi nhugha mala magra na, igne u cheke te tutuani na. Eghuteuna fahaghe nomi phokore, igne puhimi ghotilo te doglore.

¹⁵ Fahaghe sadol ka ghahemi are, igne puhi te mala tarabana fabrahu ghotilo mala toutonuni u Nonomho te Keli eigna pharikeli na.

¹⁶ Jaola ghotilo louloku fabrahu nomi greoreo na, mala tafradi jata khaꞌaghi te fada mei mae Satan ka magra na. Glepo mala tafra na igne nomi fatutuani ghotilo na.

¹⁷ Eghuteuna ghotilo fahaghe kaisei khepi mala magra, igne puhigna God te mala fakarhi ghami ghotilo na. Ghotilo jaola hata nogna naflahi biꞌo mae Tharunga te Blahi na, igne chekegna God na.

¹⁸ Kate edi ghotilo glepo igre, ghotilo tarai nei toreni God eghu mala togho ghami mana. Tarai fabrahu ka nogna nolaghi mae Tharunga te Blahi. Tutuani, ghotilo tarabana fakeli koba nei thosei babaꞌo nei taraidi koba hatimare nogna naikno God fateote'o.

¹⁹ Eghuteuna ghotilo jaola tarai ghau iara, mala tangomana God te tusu mei ka iara cheke te mala toutonuni iara na. Tarai ghau iara te mala theome mhaghuni te mala toutonu cheke te tutuani eigna Nonomho te Keli na.

²⁰ Naugna iara mae gloku mala toutonuni u Nonomho te Keli igne, neubane au ka suga sosolo iara gognaro gne. Ghotilo tarai ghau iara mala theome mhaghu iara kate toutonuni Nonomho te Keli ka puhi te naba te mala eni iara na.

Nogna cheke leghu lahu mae Pol

²¹ Mae Tikikas ginauna toutonu ka ghotilo thoutonu eigu iara na. Mana kaisei mae kherada keli tahati, nei kaisei mae gloku te rouronuni tahati. Mana mala loku baluda ranghini Lord.

²² Iara kuru arini mana ka ghotilo mala ke keli nagnafami ghotilo, naugna mana tangomana te toutonu fakeli eimi ghehati.

²³ Iara toreni God Kmada nei Jisas Kraes noda Lord, eigna phiamare ginauna tusu ranghi ghita pharikeli nei namha balu fatutuani ka kherada naikno khiloau fateote'o.

²⁴ Eghuteuna iara tarai eigna nogna khokofakasai God mala au balumi ghotilo hui iheire te namhani fabrahu noda Lord Jisas Kraes. Me gnafa. Iara, mae Pol.