Efesus 5 - Buka Blahi Ka Cheke Holo

Tahati au ka naphae

¹ Ghotilo goro thugna God, eigna mana namha ghami ghotilo. Eghume ghotilo mala leghudi puhigna mana re.

² Ghotilo mala biꞌo nomi namha na jateula Kraes eghu ka nagnafamire. Eigna mana namha ghita fara neke snakreni thegna neke lehe eida tahati jateula kaisei fafara te keli tagna God. Jateula mare te fafara nafnahi ka mana te sisiri keligna nei gleꞌani mana teu ia eghu.

³ Nu te gnognoro ba eni te kaisei nafnata glepo te diꞌa ba mamagna teu igre, thofno theome naba ghotilo naikno blahi nogna God ra te edire.

⁴ Jaola, theome keli te nomhidi ka ghotilo te chekedi u nafnata cheke te diꞌa ba cheke glalama ba nafnata cheke muamugna te thona. Glepo igre theome doglo te edi ghotilo re. Nu te keli na ghotilo mala cheke fakelini God.

⁵ Ghotilo themi la lasenihi igne, nafnata naikno te gnognoro nei edi nafnata glepo te diꞌa igre teuna, mare theo sapedi ka nauthoglu majaghani Kraes ghe God te funei frunini na. Eghuteuna jaola iheire te mamagnadi nodi glepo keha naiknore, mare theo sapedi jare naugna naikno igre jateu te tufru soruni mumuju eghu kolho.

⁶ Ghotilo thosei snakreni kaisei naikno te mala chaghi ghami ka cheke te theome tutuani are. Tutuani fara, God ginauna na fatedi naikno te theome leghuni mana nu leghudi puhi te diꞌa igre teuna.

⁷ Eghume ghotilo thosei fofodu baludi nafnata naikno igre.

⁸ Tifa na, ghotilo neke au ka naromno, nu gognaro na ghotilo kela au ka naphae, naugna ghotilo nognahi Lord. Eghume ghotilo leghuni puhidi naikno te au ka naphae,

⁹ naugna puhigna u naphae na tangomana tahati te edi glepo te keli nei doglo nei tutuani.

¹⁰ Fariuriu mala filo glanini gloku te keli tagnadi Lord re.

¹¹ Eidi naikno te au nga teu kate romno gre, ghotilo thosei fofodu baludi mala edi glepo te diꞌare. Eigna glepo igre mala fadiꞌadi kolho nakarhadi naiknore. Nu ghotilo falalase ranghidi unha te eni mare igne mala filo glanidi mare nodi najafrare.

¹² Glepo te edi poru naiknore igre, neubane chekeni kolho tahati, thono mamaja noda ni fara.

^13-14 Nu kate thakle te gnafa gobigna lepo igre kate phae na, naiknore ginauna thofno filo glanidi glepo te edi thedi igre. Eigna u naphae na mala fathakledi gobigna lepore. Naugna igne kaisei cheke naba na cheke eghu, “Dofra haghe ghotilo iheire te thuru ra! Kegra haghe ka glehe, eghuteuna mae Jisas Kraes ginauna faphae ghami ghotilo.”

¹⁵ Eghume, kheraguro, famane filo fakelini u nafnata nakarha te batuni ghotilo na. Thosei jateula naikno te theome laseni kaisei glepo ra eghu, nu jateula naikno te au gaoghatho te keli ke lamnadi ra eghu.

¹⁶ Tutuani, naugna puhi te diꞌa na heta fara gognaro na, leuleghu fata na ghotilo tangomana te mala edi unha glepo te kelire.

¹⁷ Thosei fanolini nakarhami na, nu fariuriu mala filo glanini unha Lord te magnahaghei eni iagho na.

¹⁸ Thosei koꞌu me dranga ka waen, naugna igne ginauna batu fadiꞌadi puhimi ghotilo re. Nu snakreni mae Tharunga te Blahi na mala fodu ke lamnami mala batu fakeli ghami.

¹⁹ Eghuteuna kate khapru te koje na, ghotilo mala koje ka Sam nei ka himu nei keha khoje te tusu mei mae Tharunga te Blahi na. Ghotilo koje nei kilo fnaknoni Lord ka nagnafamire.

²⁰ Eghuteuna ka nanghagna mae Jisas Kraes noda Lord, ghotilo cheke fakelini God Kmada eidi gobigna lepo te edi leuleghu narane.

Cheke eigna tharakna ka khiloau

²¹ Lisa lao ghami fari themi naugna nomi ghatho tahu eigna Kraes.

²² Ghotilo gaꞌase tholaghi ra leghudi khetomi are jateula ghotilo te leghuni Lord eghu.

²³ Naugna mae nalhaꞌu na pha'ugna khetogna na, jateula Kraes te pha'ugna khiloau. Khiloau na u thinigna Kraes eigna mana neke fakarhinihi khiloau na.

²⁴ Eghuteuna ka puhi khiloau te leghuni Kraes igne, gaꞌase tholaghire mala jaola leghudi fabrahu khetodire.

²⁵ Ghotilo mae tholaghi ra, namhadi khetomi are jateula Kraes te namhani fara khiloau gne eghu. Naugna mana namhani khiloau na. Mana neke snakreni thegna neke lehe mala fakarhani khiloau na.

²⁶ Mana neke eni igne mala fablahini nei mala tihi fagaeni eghu khiloau na ka khoꞌu nei ka chekegna.

²⁷ Naugna kate hata mei Kraes khiloau na ka thegna na, mana magnahagheni khiloau na te famane keli fifilogna na mala theo kaisei najafra tagna, nu mala thofno doglo fara nei blahi eghu.

²⁸ Ghotilo mae nalhaꞌu ra mala namhadi khetomi are jateula ghotilo te namhadi fara thinimi themi are eghu. Kate namhani mana khetogna na, mana namhani thegna.

²⁹ Tutuani, theo kaisei mae te magnahaghei fadiꞌani thinigna thegna na. Theo. Tahati ima fakeli nei taji fakelini eghu thinida na jateula Kraes te taji fakelini khiloau.

³⁰ Naugna tahati ka khiloau na jateula vido thinigna mana eghu.

³¹ Naugna igne u grioriso te blahi na cheke eghu, “Mae nalhaꞌu na ginau jifla kokodi idogna kmagnare mala au fodu ka khetogna na, eghuteuna repa ginauna kaisei ngala.”

³² U cheke tuana e poru gaoghathogna na eghuteuna iara cheke eidi tuare agne naugna cheke tuana jaola cheke eigna Kraes nei nogna khiloau.

³³ Nu cheke tuana jaola eimi ghotilo. Eghume, ghotilo mae tholaghi te gnafa ra namhadi khetomi are jateula ghotilo te namha ghami themi are eghu, eghuteuna ghotilo gaꞌase tholaghi ra jaola ghatho tahudi khetomi are.